ໂຄງການພາກຂະຫຍາຍ ຈັກເບີ 6 ໄດ້ເລີ່ມລົງມືການກໍ່ສ້າງມາແຕ່ກາງປີ 2014 ແລະກໍ່ສ້າງສຳເລັດໃນຕົ້ນປີ 2022

ໂຄງການພາກຂະຫຍາຍ ຈັກເບີ 6 ໄດ້ເລີ່ມລົງມືການກໍ່ສ້າງມາແຕ່ກາງປີ 2014 ແລະກໍ່ສ້າງສຳເລັດໃນຕົ້ນປີ 2022 ນີ້ພ້ອມມີພິທີເປີດການຜະລິດໄຟຟ້າຢ່າງເປັນທາງການໃນວັນທີ 27 ສິງ ຫາ 2022 ໂດຍໃຫ້ກຽດເຂົ້າຮ່ວມ ເປີດປ້າຍ ພ້ອມລັ່ນກ້ອງ 9 ບາດ ຂອງທ່ານ ປອ ສອນໄຊ ສີພັນ ດອນ ຮອງນາຍົກລັດຖະມົນຕີ ຜູ້ ຊີ້ນຳວຽກງານເສດຖະກິດ. ນອກ ຈາກນີ້ຍັງມີທ່ານ ປອ ດາວວົງ ພອນແກ້ວ ລັດຖະມົນຕີກະຊວງ ພະລັງງານ ແລະບໍ່ແຮ່, ທ່ານ ຄຳພັນ ສິດທິດຳພາ ເຈົ້າແຂວງວຽງ ຈັນ, ທ່ານ Kenicchi Kobayas hi ເອກອັກຄະລັດຖະທູດແຫ່ງຍີ່ປຸ່ນ ປະຈຳ ສປປ ລາວ, ທ່ານ Toshio NAKASE ຫົວໜ້າອົງການ JICA ປະຈຳ ສປປ ລາວ ພ້ອມ ດ້ວຍການນຳ ແລະພະນັກງານຂອງທັງສອງຝ່າຍເຂົ້າຮ່ວມ.

ໂຄງການເຂື່ອນໄຟຟ້ານໍ້າງື່ມ 1 ເປັນໂຄງການທີ່ມີອ່າງກັກເກັບນໍ້າຂະໜາດໃຫຍ່ທີ່ສຸດໃນ ສປປ ລາວ ແຕ່ເມື່ອທຽບໃສ່ຄວາມອາດສາມາດຜະລິດໄຟຟ້າເຫັນວ່າຍັງບໍ່ສູງ, ຍ້ອນເຫັນໄດ້ເຖິງທ່າແຮງດັ່ງກ່າວລັດຖະບານຈິ່ງຕົກລົງເຫັນດີໃຫ້ມີການກໍ່ສ້າງພາກຂະຫຍາຍຈັກເບີ 6 ຊຶ່ງມີກຳລັງຕິດຕັ້ງ 40 MW ປະຈຸບັນເຂື່ອນໄຟຟ້ານໍ້າງື່ມ 1 ມີກຳລັງຕິດຕັ້ງເພີ່ມຂຶ້ນ ເປັນ 275 MW.

ໂຄງການກໍ່ສ້າງເຂື່ອນໄຟຟ້າ ນໍ້າງື່ມ 1 ພາກຂະຫຍາຍ ໂດຍສະເພາະແມ່ນຈັກເບີ 6 ເປັນໂຄງການໜຶ່ງໃນໂລກທີ່ມີລັກສະນະພິເສດເນື່ອງຈາກໄດ້ເຈາະເຂື່ອນທີ່ກໍ່ສ້າງສຳເລັດ ແລະເປີດການຜະລິດໄຟຟ້າມາໄດ້ເກືອບ 50 ປີ ເພື່ອກໍ່ສ້າງທໍ່ສົ່ງນໍ້າຍ້ອນມີຈຸດພິເສດຄືແນວນັ້ນເຮັດໃຫ້ການກໍ່ສ້າງຕ້ອງໄດ້ນຳໃຊ້ເຕັກນິກວິຊາການຂັ້ນສູງ ແລະປະຕິບັດຕາມມາດຕະຖານເຕັກນິກໄຟຟ້າລາວ ແລະ ໄຟຟ້າສາກົນຢ່າງເຄັ່ງຄັດເພື່ອຮັບປະກັນຜົນກະທົບຕໍ່ໂຄງສ້າງຂອງຕົວເຂື່ອນເພື່ອຮັບປະກັນທາງດ້ານຄຸນນະພາບ ແລະຄວາມປອດໄພຂອງເຂື່ອນເຈົ້າຂອງໂຄງການໄດ້ວ່າຈ້າງ 3 ບໍລິສັດທີ່ປຶກສາຂອງຍີ່ປຸ່ນເພື່ອດຳເນີນການຕິດຕາມ, ກວດກາ ແລະຄຸ້ມຄອງການກໍ່ສ້າງ, ຕິດຕັ້ງກົນຈັກ ແລະການຕິດຕັ້ງອຸປະກອນໄຟຟ້າໂດຍໄດ້ຮັບທຶນສະໜັບສະໜູນເງິນກູ້ຈາກລັດຖະບານຍີ່ປຸ່ນແບບຜ່ອນຜັນຈຳນວນ 5.547 ລ້ານເຢັນ.

ໂຄງການເຂື່ອນໄຟຟ້າພາກຂະຫຍາຍຈັກເບີ 6 ນີ້ ເມື່ອກໍ່ສ້າງສຳເລັດ ແລະເປີດຜະລິດໄຟຟ້າແລ້ວຈະເຮັດໃຫ້ລັດວິສາຫະກິດໄຟຟ້າລາວມີທ່າແຮງ ແລະເພີ່ມກຳລັງການສະໜອງພະລັງງານໄຟຟ້າໃຫ້ສັງຄົມໄດ້ຊົມໃຊ້ຢ່າງພຽງພໍໂດຍສະເພາະບັນດາແຂວງພາກກາງຊຶ່ງເປັນເຂດທີ່ມີການຂະຫຍາຍຕົວທາງດ້ານເສດຖະກິດ ແລະຄວາມຕ້ອງການຊົມໃຊ້ພະລັງງານສູງ.

แชร์