ລັດຖະມົນຕີ ກະຊວງ ອຄ ຕ້ອນຮັບທູດສິງກະໂປ ປະຈໍາ ລາວ

ໃນວັນທີ 26 ສິງຫາທີ່ຜ່ານມາທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນຮັບການເຂົ້າຢ້ຽມພົບປະຂອງທ່ານນາງ ລຽວ ຊິວ ລິນ ເອກອັກຄະລັດຖະທູດສິງກະໂປ ປະຈໍາ ສປປ ລາວ ເພື່ອສະແດງຄວາມຍິນດີຕໍ່ທ່ານ ມະໄລທອງ ກົມມະສິດ ທີ່ໄດ້ຮັບຕຳແໜ່ງເປັນລັດຖະມົນຕີກະຊວງ ອຄ ຄົນໃໝ່.

ໂອກາດດັ່ງກ່າວ, ທ່ານ ມະໄລທອງ ກົມມະສິດ ໄດ້ສະແດງຄວາມຂອບໃຈຕໍ່ ທ່ານ ນາງ ລຽວ ຊິວ ລິນ ທີ່ໄດ້ມາພົບປະຢ້ຽມຢາມ ແລະສະແດງຄວາມຍິນດີນໍາໃນຄັ້ງນີ້, ພ້ອມທັງສະແດງຄວາມຂອບໃຈທີ່ສິງກະໂປໄດ້ໃຫ້ການຮ່ວມມື ແລະຊ່ວຍເຫຼືອແກ່ ສປປ ລາວ ໃນຂະແໜງການຕ່າງໆ ໂດຍສະເພາະການຊ່ວຍເຫລືອດ້ານການພັດທະນາຊັບພະຍາກອນມະນຸດຂອງ ສປປ ລາວ. ພ້ອມນັ້ນ, ທັງສອງຝ່າຍ ຍັງໄດ້ປຶກສາຫາລືກ່ຽວກັບວຽກງານການສົ່ງເສີມການຄ້າ ແລະການລົງທຶນລະຫວ່າງ ສປປ ລາວ ແລະ ສິງກະໂປ, ປຶກສາຫາລືໃນຂົງເຂດວຽກງານບູລິມະສິດທີ່ຈະເສີມຂະຫຍາຍການຮ່ວມມືລາວ-ສິງກະໂປໃນຕໍ່ໜ້າ, ພ້ອມທັງແລກປ່ຽນກ່ຽວກັບສະພາບແວດລ້ອມການດໍາເນີນທຸລະກິດ ແລະການລົງທຶນ ຢູ ສປປ ລາວ.

ທ່ານ ນາງ ລຽວ ຊິວ ລິນ ກໍໄດ້ສະແດງຄວາມຂອບໃຈຕໍ່ທ່ານ ມະໄລທອງ ກົມມະສິດ ທີ່ໄດ້ຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງສະແດງຄວາມຊົມເຊີຍຕໍ່ ທ່ານ ມະໄລທອງ ກົມມະສິດ ທີ່ໄດ້ຮັບຕຳແໜ່ງເປັນລັດຖະມົນຕີ ກະຊວງ ອຄ ຄົນໃໝ່ ແລະອວຍພອນໃຫ້ທ່ານລັດຖະມົນຕີຈົ່ງປະສົບຜົນສຳເລັດໃນການປະຕິບັດໜ້າທີ່ໃໝ່ອັນມີກຽດຂອງທ່ານ.

• 29/08/2022