ເຈົ້າແຂວງຫົວພັນ ຮ່ວມສະຫຼອງປີສາມັກຄີມິດຕະພາບ ລາວ-ຫວຽດນາມ ທີ່ແຂວງແທັງຮວາ

ວັນທີ 25 ສິງຫາ ຜ່ານມາ, ສະຫາຍ ວັນໄຊ ແພງຊຸມມາ ກໍາມະການສູນກາງພັກ, ເລຂາຄະນະບໍລິຫານພັກແຂວງ, ເຈົ້າແຂວງຫົວພັນພ້ອມດ້ວຍຄະນະຜູ້ແທນຂັ້ນສູງຂອງແຂວງ ໄດ້ເຂົ້າຮ່ວມ ພິທີສະເຫລີມສະຫລອງວັນສ້າງຕັ້ງສາຍພົວພັນທາງການທູດຫວຽດນາມ-ລາວ ຄົບຮອບ 60 ປີ, ວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ-ລາວ ຄົບຮອບ 45 ປີ ແລະວັນເຊັນສັນຍາຮ່ວມມືມິດຕະພາບ ລະຫວ່າງ 2 ແຂວງ ແທັງຮວາ-ຫົວພັນ ຄົບຮອບ 55 ປີ ທີ່ນະຄອນແທັງຮວາ ສສ ຫວຽດນາມ ໂດຍມີສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາຫວຽດນາມ ແລະພາກສ່ວນກ່ຽວຂ່ອງສອງຝ່າຍເຂົ້າຮ່ວມ.

ໂອກາດນີ້, ສະຫາຍ ໂດຈ໋ອງຮຶງ ກຳມະການສູນກາງພັກ, ເລຂາພັກແຂວງ, ປະທານກຳມະການສະພາປະຊາຊົນແຂວງແທັງຮວາ ໄດ້ກ່າວຄໍາປາໄສໂດຍສະຫາຍໄດ້ຢືນຢັນເຖິງສາຍພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງລາວ-ຫວຽດນາມ ໂດຍປະທານ ໂຮ່ຈີມິນ, ປະທານ ໄກສອນ ພົມວິຫານ ແລະປະທານສຸພານຸວົງ ໄດ້ສ້າງຄວາມຮັກແພງ, ຊຸກຍູ້, ເສີມຂະຫຍາຍ ແລະ ບຳລຸງສ້າງຈາກການນຳຮຸ່ນຕໍ່ມາ ແລະ ປະຊາຊົນສອງປະເທດອັນໄດ້ກາຍເປັນປັດໄຈສຳຄັນເພື່ອປົກປັກຮັກສາຜົນສຳເລັດຂອງການປະຕິວັດຂອງແຕ່ລະປະເທດ; ລາວ ແລະ ຫວຽດນາມ ໄດ້ສ້າງຕັ້ງສາຍພົວພັນທາງການທູດຢ່າງເປັນທາງການ ໃນວັນທີ 5 ກັນຍາ 1962. ນີ້ແມ່ນເຫດການສຳຄັນ, ເປີດໄລຍະແຫ່ງການພັດທະນາໃໝ່ໃນການພົວພັນລະຫວ່າງ 2 ປະເທດ, ຢືນຢັນສາຍພົວພັນມິດຕະພາບອັນເປັນມູນເຊື້ອຂອງປະຊາຊົນສອງປະເທດໃນການຕໍ່ສູ້ປົດປ່ອຍຊາດ ແລະ ເປັນເອກະພາບ,ບົນພື້ນຖານຄວາມຕ້ອງການການຮ່ວມມືຢ່າງກວ້າງຂວາງ ແລະຮີບດ່ວນລະຫວ່າງສອງປະເທດໃນສະພາບການໃໝ່ ມາຮອດວັນທີ 18 ກໍລະກົດ 1977 ສອງປະເທດໄດ້ລົງນາມໃນສົນທິສັນຍາມິດຕະພາບ ແລະການຮ່ວມມືເຊິ່ງສົນທິສັນຍາໄດ້ກາຍເປັນພື້ນຖານດ້ານການເມືອງ, ກົດໝາຍທີ່ສຳຄັນ, ນຳການພົວພັນ ຫວຽດນາມ-ລາວ ໃຫ້ພັດທະນາຮອບດ້ານ, ປະກອບສ່ວນຢ່າງແຂງແຮງເຂົ້າໃນຂະບວນການປ່ຽນໃໝ່, ກໍ່ສ້າງ ແລະປົກປັກຮັກສາປະເທດຊາດ.

ດ້ວຍຄວາມຮຽກຮ້ອງຕ້ອງການຂອງຍຸກສະໄໝໃໝ່, ວັນທີ 2 ພຶດສະພາ 1967, ສອງແຂວງແທັງຮວາ ແລະແຂວງຫົວພັນ ໄດ້ລົງນາມໃນສັນຍາການຄ້າ, ວາງພື້ນຖານອັນໜັກແໜ້ນໃຫ້ແກ່ການພົວພັນ “ນໍ້າໃຈອ້າຍນ້ອງ” ໃນຊຸມປີມໍ່ໆມານີ້, ໄດ້ເຮັດໃຫ້ການພົວພັນຮ່ວມມືຮອບດ້ານສອງແຂວງນັບມື້ນັບເລິກເຊິ່ງກວ່າເກົ່າ, ມີການເຄື່ອນໄຫວພົບປະແລກປ່ຽນ, ຮຽນຮູ້, ເຈລະຈາ ແລະ ການພົວພັນຮ່ວມມືດ້ານເສດຖະກິດສືບຕໍ່ພັດທະນາ, ການຄ້າລະຫວ່າງສອງແຂວງຂະຫຍາຍຕົວຢ່າງຕໍ່ເນື່ອງ, ມູນຄ່າການຄ້າໃນໄລຍະ 2016-2020 ບັນລຸເກືອບ 74 ລ້ານໂດລາສະຫະລັດ, ເພີ່ມຂຶ້ນ 18% ເມື່ອທຽບໃສ່ໄລຍະ 2011-2015; ໃນປີ 2021 ບັນລຸ 28,72 ລ້ານໂດລາສະຫະລັດ, ເພີ່ມຂຶ້ນ 2,6 ເທົ່າ ເມື່ອທຽບໃສ່ປີ 2016 ແລະ ສະເພາະ 6 ເດືອນຕົ້ນປີ 2022 ບັນລຸເກືອບ 16 ລ້ານໂດລາສະຫະລັດ.
ໃນພິທີ, ສະຫາຍ ວັນໄຊ ແພງຊຸມມາ ໄດ້ກ່າວສະແດງຄວາມຂອບອົກຂອບໃຈມາຍັງພັກ, ລັດ ແລະປະຊາຊົນຫວຽດນາມ ໂດຍສະເພາະແຂວງ ແທັງຮວາ ທີ່ໄດ້ໃຫ້ການຊ່ວຍເຫລືອອັນລໍ້າຄ່າ, ທັນການ ແລະມີປະສິດທິຜົນໃນໄລຍະຜ່ານມາ. ພ້ອມນີ້ໂດຍໄດ້ຮັບອະນຸຍາດຈາກທ່ານປະທານປະເທດ ສປປ ລາວ, ສະຫາຍ ວັນໄຊ ແພງຊຸມມາຍັງໄດ້ຕາງໜ້າພັກ,ລັດຖະບານ ແຫ່ງ ສປປ ລາວ ປະດັບຫລຽນໄຊພັດທະນາຊັ້ນໜຶ່ງ ໃຫ້ I ກົມກອງ, ຫລຽນກາແຮງງານຊັ້ນ II ຈຳນວນ 2 ສະຫາຍ, ຫລຽນກາແຮງງານຊັ້ນ III ຈຳນວນ 4 ສະຫາຍ ແລະ 7 ກົມກອງລວມໝູ່ ແລະມອບໃບຍ້ອງຍໍຂອງລັດຖະບານ ແຫ່ງ ສປປ ລາວ ໃຫ້ແກ່ບໍລິສັດກໍ່ສ້າງ ແລະ ມະຫາວິທະ ຍາໄລ ຈໍານວນ 2 ໃບ.
ຂ່າວ-ພາບ: ໄອແກ້ວ

แชร์