ສອງສະມາຄົມນັກຂ່າວລາວ-ຫວຽດນາມສືບຕໍ່ເສີມຂະຫຍາຍການຮ່ວມມື

ໃນວັນທີ 27 ສິງຫາ 2022 ຢູ່ສະມາຄົມນັກຂ່າວແຫ່ງ ສສ ຫວຽດນາມ ນະຄອນຫລວງຮ່າໂນ້ຍ, ທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວແຫ່ງ ສປປ ລາວ ແລະ ທ່ານ ເລ ກວັກ ມິງ ປະທານສະມາຄົມນັກຂ່າວ ແຫ່ງ ສສ ຫວຽດນາມ ໄດ້ຮ່ວມລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືແຕ່ປີ 2022-2027 ໂດຍຄະນະຜູ້ແທນທັງຝ່າຍລາວ-ຫວຽດນາມ ຮ່ວມເປັນສັກຂີພິຍານ.

ໃນບົດບັນທຶກຄວາມເຂົ້າໃຈໄດ້ກຳນົດວ່າ: ໄລຍະ 5 ປີຕໍ່ໜ້າ, ສອງຝ່າຍຈະສືບຕໍ່ປະສານສົມທົບ ແລະຮ່ວມມືກັນແລກປ່ຽນຂໍ້ມູນຂ່າວສານຮອບດ້ານທັງດ້ານການເມືອງ, ເສດຖະກິດ ແລະ ສັງຄົມ ຂອງສອງປະເທດ ໃນຂະບວນການດຳເນີນນະໂຍບາຍປ່ຽນແປງໃໝ່ ໂດຍຖືວ່າ ນີ້ເປັນປັດໄຈສຳຄັນໃນການຊ່ວຍເສີມຂະຫຍາຍການພົວພັນຮ່ວມມືລະຫວ່າງລາວ ແລະ ຫວຽດນາມ ໃຫ້ເລິກຊຶ່ງຂຶ້ນກວ່າເກົ່າ; ຈະເສີມສ້າງການພົວພັນແລກປ່ຽນ ແລະການຮ່ວມມືໃນການສິດສອນ, ຝຶກອົບຮົມ ແລະ ຊຸກຍູ້ສົ່ງເສີມທັກສະຄວາມເປັນມືອາຊີບ ແລະຈັນຍາບັນຂອງນັກຂ່າວ, ການຍົກລະດັບຄວາມເປັນມືອາຊີບຂອງບັນດານັກຂ່າວ ແລະການຮູ້ນຳໃຊ້ຢ່າງຄ່ອງແຄ້ວວ່ອງໄວບັນດາຊ່ອງທາງຂອງສື່ຫລາຍຮູບແບບເພື່ອໃຫ້ສາມາດຕິດຕໍ່, ຕອບຮັບກັບທ່າອ່ຽງຂອງວຽກງານຂ່າວ-ສື່ມວນຊົນສະໄໝໃໝ່; ບົນພື້ນຖານໝາກຜົນອັນດີໃນການຮ່ວມຈັດຊຸດອົບຮົມໃນປີ 2019 ຜ່ານມາ, ສະມາຄົມນັກຂ່າວແຫ່ງ ສສ ຫວຽດນາມ ຈະສືບຕໍ່ສະໜັບສະໜູນຊ່ວຍເຫລືອລາວແຕ່ລະປີເພື່ອຈັດຊຸດຝຶກອົບຮົມໃຫ້ນັກຂ່າວຢູ່ປະເທດລາວ ຕາມຫົວຂໍ້, ເນື້ອໃນ ແລະການບໍລິຫານຈັດການຊຸດອົບຮົມໂດຍການໄດ້ຮັບການເຫັນດີຮ່ວມກັນຂອງສອງຝ່າຍ ແລະສອດຄ່ອງກັບສະພາບການຕົວຈິງ.

ຂະນະດຽວກັນ ຈະຮ່ວມກັນເຮັດບົດບາດເປັນຂົວເຊື່ອມຕໍ່ທີ່ຕັ້ງໜ້າລະຫວ່າງສະມາຄົມນັກຂ່າວລະດັບແຂວງ ແລະບຸກຄະລາກອນສື່ມວນຊົນຂອງສອງປະເທດໃນການແລກປ່ຽນການຢ້ຽມຢາມຄະນະຜູ້ແທນກໍຄືການຮ່ວມມື ແລະການສະໜັບສະໜູນວຽກງານທີ່ກ່ຽວຂ້ອງກັບສື່ມວນຊົນເພື່ອປະກອບສ່ວນຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງພັກ, ລັດຖະບານ ແລະ ປະຊາຊົນລາວ ແລະ ຫວຽດນາມ ເພື່ອສັນຕິພາບ, ສະຖຽນລະພາບ, ຄວາມຈະເລີນຮຸ່ງເຮືອງ, ການພັດທະນາແບບຍືນຍົງ ແລະ ຄວາມກ້າວໜ້າຮ່ວມກັນ. ນອກນີ້, ສອງຝ່າຍອາດພິຈາລະນາຮ່ວມກັນຈັດສໍາມະນາ ແລະ ກອງປະຊຸມພົບປະ ເພື່ອປັບປຸງລະບົບການຄຸ້ມຄອງນັກຂ່າວໃຫ້ຮັດກຸມກວ່າເກົ່າ ແລະເພີ່ມທະວີຄວາມເຂົ້າອົກເຂົ້າໃຈລະຫວ່າງສອງປະເທດ, ສອງຝ່າຍຈະຊຸກຍູ້ສົ່ງເສີມອົງການສື່ຂອງສອງປະເທດໃນການເຜີຍແຜ່ຂໍ້ມູນຂ່າວສານ ແລະ ບົດຂ່າວເຫດ ການສຳຄັນຕ່າງໆ ກໍຄື ຜົນສຳເລັດການສ້າງສາພັດທະນາປະເທດໃຫ້ຫລາຍຂຶ້ນ ໂດຍຜ່ານທັງສື່ເກົ່າ ແລະໃໝ່. ພ້ອມນີ້ຈະປະສານສົມທົບກັນຢ່າງໃກ້ຊິດອອກຂ່າວທີ່ລະອຽດອ່ອນຕ່າງໆຢ່າງເໝາະສົມ ແລະ ທົ່ວເຖິງ. ຂະນະດຽວກັນ, ສອງຝ່າຍເຫັນດີຈະແລກປ່ຽນການຢ້ຽມຢາມຄະນະຜູ້ແທນແບບໝູນວຽນແຕ່ລະປີເພື່ອປຶກສາຫາລືວຽກງານສື່ມວນຊົນໂດຍສອດຄ່ອງກັບຫລັກການແຫ່ງການເຄົາລົບຊຶ່ງກັນ ແລະກັນ ແລະຄວາມສະເໝີພາບ.

ການຕົກລົງຮ່ວມມືລະຫວ່າງສອງສະມາຄົມນັກຂ່າວ ລາວ-ຫວຽດນາມ ເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ,ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງສອງປະເທດທັງເປັນການສ້າງຂະບວນການສະຫລອງວັນສ້າງຕັ້ງສາຍພົວພັນທາງການທູດລາວ ແລະຫວຽດນາມ ຄົບຮອບ 60 ປີ (5 ກັນຍາ 1962-5 ກັນຍາ 2022 ແລະວັນເຊັນສົນທິສັນ ຍາມິດຕະພາບ ແລະ ການຮ່ວມມືຄົບຮອບ 45 ປີ (18 ກໍລະກົດ 1977-18 ກໍລະກົດ 2022) ທັງຢູ່ບົນນໍ້າໃຈສາມັກຄີ, ຄວາມສະເໝີພາບ ແລະ ເຄົາລົບເຊິ່ງກັນ ແລະ ກັນ, ຮັດແໜ້ນ ແລະເພີ່ມທະວີຄວາມສາມັກຄີ, ການຮ່ວມມື ແລະການແລກປ່ຽນຂໍ້ມູນຂ່າວສານລະຫວ່າງສື່ມວນຊົນສອງປະເທດບົນພື້ນຖານຄວາມຖືກຕ້ອງສອດຄ່ອງກັບໜ້າທີ່ວຽກງານພາລະບົດບາດ ແລະຂອບເຂດອຳນາດຂອງແຕ່ລະຝ່າຍລວມທັງຂໍ້ກຳນົດທາງກົດໝາຍຂອງແຕ່ລະປະເທດ ແລະສົນທິສັນຍາສາກົນຕ່າງໆ ທີ່ແຕ່ລະປະເທດຮ່ວມເປັນພາຄີ.

แชร์