ຜົນສຳເລັດ ກອງປະຊຸມການຮ່ວມມືດ້ານວິຊາການ ລາວ-ໄທ ຄັ້ງທີ 24

ກອງປະຊຸມການຮ່ວມມືດ້ານວິຊາການ ລາວ-ໄທ ຄັ້ງທີ 24 ຈັດຂຶ້ນໃນລະຫວ່າງວັນທີ 22-25 ສິງຫາ ຜ່ານມາ, ທີ່ນະຄອນຫຼວງພະບາງ, ສປປ ລາວ ຊຶ່ງຄະນະຜູ້ແທນຝ່າຍລາວນຳໂດຍທ່ານ ວິໂຣດ ສູນດາຣາ ຫົວໜ້າກົມອາຊີ-ປາຊີຟິກ ແລະ ອາຟຣິກກາ, ເລຂາທິການຄະນະກຳມາທິການຮ່ວມມື ລາວ-ໄທ, ກະຊວງການຕ່າງປະເທດ ແຫ່ງ ສປປ ລາວ ແລະຄະນະຜູ້ແທນຝ່າຍໄທ ນຳໂດຍ ທ່ານ ນາງ ອຸຣິຣັດ ຈະເລີນໂຕ ອະທິບໍດີກົມຄວາມຮ່ວມມືລະຫວ່າງປະເທດ, ກະຊວງການຕ່າງປະເທດ ແຫ່ງ ຣາຊະອານາຈັກໄທ, ມີບັນດາຜູ້ແທນຈາກພາກສ່ວນຕ່າງໆຂອງທັງສອງປະເທດ ລາວ-ໄທ ເຂົ້າຮ່ວມຢ່າງພ້ອມພຽງ.

ກອງປະຊຸມໃນຄັ້ງນີ້, ໄດ້ຮັບຟັງການລາຍງານຜົນຂອງກອງປະຊຸມກອງເລຂາ ລາວ-ໄທ ຈາກຫົວໜ້າກອງເລຂາຝ່າຍ ລາວ ແລະໄທ ທີ່ຈັດຂຶ້ນໃນວັນທີ 23 ສິງຫາ 2022 ໂດຍໄດ້ແຈ້ງໃຫ້ຊາບ ກ່ຽວກັບ ຜົນຂອງການຈັດຕັ້ງປະຕິບັດໂຄງການເພື່ອການພັດທະນາດ້ານວິຊາການ (2020-2022) ໃນໄລ ຍະຜ່ານມາ ຕາມທີ່ໄດ້ຕົກລົງກັນ ຂອງກອງປະຊຸມຮ່ວມມືດ້ານວິຊາການ ລາວ-ໄທ ຄັ້ງທີ 23 ທີ່ ເພັດສະບູລີ, ຣາຊະອານາຈັກໄທ ແລະ ທິດທາງແຜນການຮ່ວມມືໃນຕໍ່ໜ້າ. ພ້ອມກັນນີ້, ກອງປະຊຸມຍັງໄດ້ຮັບຮອງເອົາບົດບັນທຶກກອງປະຊຸມວິຊາການ ລາວ-ໄທ ຄັ້ງທີ 24 ແລະ ແຜນການຮ່ວມມືເພື່ອການພັດທະນາ ລາວ-ໄທ ໄລຍະ 3 ປີ (2023-2025) ເຊິ່ງກວມເອົາ 7 ຂົງເຂດ, 21 ແຜນງານ, 35 ໂຄງການທີ່ສອດຄ່ອງກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ທີ່ລັດຖະບານ ແຫ່ງ ສປປ ລາວໄດ້ກຳນົດໄວ້, ທັງເປັນການປະກອບສ່ວນເຂົ້າໃນການຜັນຂະຫຍາຍແຜນປະຕິບັດງານວ່າດ້ວຍການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ພັດທະນາແບບຍືນຍົງ ໄລຍະ 5 ປີ (2022-2026) ລະຫວ່າງ ສປປ ລາວ ແລະ ຣາຊະອານາຈັກໄທ ໃຫ້ໄດ້ຮັບໝາກຜົນເປັນຮູບປະທໍາ.

ໃນໂອກາດດັ່ງກ່າວ, ທ່ານ ວິໂຣດ ສູນດາຣາ ໄດ້ສະແດງຄວາມຂອບໃຈຕໍ່ລັດຖະບານ ແຫ່ງ ຣາຊະອານາຈັກໄທ ທີ່ໄດ້ໃຫ້ການຮ່ວມມືສະໜັບສະໜູນດ້ານວິຊາການແກ່ ສປປ ລາວ ຕະຫລອດໄລຍະ 30 ປີ ທີ່ຜ່ານມາເຊິ່ງໄດ້ປະກອບສ່ວນສຳຄັນເຂົ້າໃນການສ້າງຊັບພະຍາກອນມະນຸດ ແລະສົ່ງເສີມການພັດທະນາເສດຖະກິດ-ສັງຄົມ ຂອງ ສປປ ລາວ ຢ່າງຕໍ່ເນື່ອງ ໂດຍສະເພາະໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ. ໃນຂະນະດຽວກັນ, ທ່ານ ນາງ ອຸຣິຣັດ ຈະເລີນໂຕ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວ ແລະສະແດງຄວາມຍິນດີທີ່ຈະສືບຕໍ່ໃຫ້ການຮ່ວມມື ແລະສະໜັບສະໜູນ ສປປ ລາວ ກໍຄືການສົ່ງເສີມສາຍພົວພັນມິດຕະພາບ ແລະການຮ່ວມມືອັນດີ ລະຫວ່າງ ສອງປະເທດ ໄທ-ລາວ ໃຫ້ນັບມື້ຈະເລີນງອກງາມຍິ່ງໆຂຶ້ນ.
ກອງປະຊຸມການຮ່ວມມືດ້ານວິຊາການ ລາວ-ໄທ ຄັ້ງທີ 25 ຈະໄດ້ຈັດຂຶ້ນທີ່ ຣາຊະອານາຈັກໄທ ໃນປີ 2024.

ຂ່າວ-ພາບ: ກຕທ

แชร์