ສສ ຫວຽດນາມ ສືບຕໍ່ສ້າງພະນັກງານໄອຍະການປະຊາຊົນແກ່ ສປປ ລາວ

ໃນວັນທີ 26 ສິງຫາ ທີ່ຜ່ານມາທ່ານ ໄຊຊະນະ ໂຄດພູທອນ ກໍາມະການສູນກາງພັກຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມ ພິທີເປີດຊຸດຝຶກອົບຮົມວຽກງານໄອຍະການ ໃຫ້ພະນັກງານ-ພະນັກງານໄອຍະການປະຊາຊົນ ຂອງ ສປປ ລາວ ທີ່ໂຮງຮຽນບໍາລຸງສ້າງວຽກງານໄອຍະການ ນະຄອນໂຮຈິມິງ ສສ ຫວຽດນາມ, ມີທ່ານ ຫງວຽນ ກວາງ ຢູງ ຮອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ, ທ່ານ ມາວັນ ຊິງ ຮັກສາການຜູ້ອໍານວຍການໂຮງຮຽນບໍາລຸງສ້າງວຽກງານໄອຍະການ ນະຄອນໂຮ່ຈິມິງ, ທ່ານ ຫງວຽນວັນ ຄັວດ ຜູ້ອໍານວຍການມະຫາວິທະຍາໄລໄອຍະການຮ່າໂນ້ຍ,ມີບັນດາສະຫາຍຄະນະອຳນວຍການ, ພະນັກງານຫລັກແຫລ່ງ, ຄູອາຈານ ແລະນັກສຳມະນາກອນ ຈາກ ສປປ ລາວ ຈຳນວນ 20 ສະຫາຍ ເຂົ້າຮ່ວມ.

ການຝຶກອົບຮົມຄັ້ງນີ້ນັກສໍາມະນາກອນຈະໄດ້ຮຽນກ່ຽວກັບພາລະບົດບາດ, ສິດ ແລະໜ້າທີ່, ກົງຈັກການຈັດຕັ້ງອົງການໄອຍະການປະຊາຊົນ, ພະນັກງານອົງການໄອຍະການປະຊາຊົນ, ການສືບສວນ-ສອບສວນ, ການສັ່ງຟ້ອງ, ການດຳເນີນຄະດີ ແພ່ງ, ອາຍາ, ປົກຄອງ ແລະການປະຕິບັດຄຳຕັດສິນຂອງສານ. ມາຮອດປັດຈຸບັນ, ສສ ຫວຽດນາມ ໄດ້ຍົກລະດັບວຽກງານໄອຍະການໃຫ້ພະນັກ ງານ-ພະນັກງານໄອຍະການປະຊາຊົນ ຂອງ ສປປ ລາວ ຈຳນວ 6 ຊຸດ ນັບແຕ່ປີ 2014 ຮອດ 2022, ມີນັກສໍາມະນາກອນທັງໝົດ 112 ທ່ານ.

ໃນໂອກາດດັ່ງກ່າວ ທ່ານ ໄຊຊະນະ ໂຄດພູທອນ ໄດ້ເນັ້ນໃຫ້ບັນດານັກສຳມະນາກອນເອົາໃຈໃສ່ຄົ້ນຄວ້າຮໍ່າຮຽນນຳຄູອາຈານທີ່ມາສິດສອນດ້ວຍຄວາມຮັບຜິດຊອບ; ໃຫ້ມີການຮ່ວມມືລະຫວ່າງສະຖາບັນຝຶກອົບຮົມວຽກງານໄອຍະການຂອງສອງປະເທດເພື່ອເຮັດໃຫ້ການກໍ່ສ້າງພະນັກງານໄອຍະການຂອງ ສປປ ລາວ ມີຄວາມເຂັ້ມແຂງ ແລະໄດ້ຮັບການພັດທະນາຢ່າງບໍ່ຢຸດຢັ້ງ.

ໂດຍ: ອານຸສັກ ກວາງວັນ

แชร์