ກະຊວງກະສິກໍາ ແລະປ່າໄມ້ ແລະແຂວງຫູໜານ ຮ່ວມມືສ້າງໂຄງການ "ໜຶ່ງທາງ ສອງເຂດ"

ວັນທີ 26 ສິງຫາ ຜ່ານມາ ທີ່ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈ ການຮ່ວມມືສ້າງໂຄງການ “ໜຶ່ງທາງ ສອງເຂດ” ແລະພິທີມອບ-ຮັບ ການຊ່ວຍເຫຼືອລ້າເຄື່ອງກົນຈັກກະສິກຳ ລະຫວ່າງກະຊວງກະສິກໍາ ແລະ ປ່າໄມ້ ສປປ ລາວ ແລະ ອົງການປົກຄອງປະຊາຊົນແຂວງຫູໜານ ສປ ຈີນ ຮ່ວມລົງນາມໂດຍທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະປ່າໄມ້ ແລະທ່ານ ເຮີ ເບົ້າສຽງ ຮອງເຈົ້າແຂວງອົງການປົກຄອງປະຊາຊົນແຂວງຫູໜານມີທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະປ່າໄມ້ ສປປ ລາວ ທ່ານ Mao Wei Ming ເຈົ້າແຂວງອົງການປົກຄອງປະຊາຊົນແຂວງຫູໜານ ສປ ຈີນ ທ່ານນາງ ຄໍາເພົາ ເອີນທະວັນ ເອກອັກຄະລັດຖະທູດແຫ່ງ ສປປ ລາວ ປະຈໍາ ສປ ຈີນ ພ້ອມດ້ວຍພາກສ່ວນກ່ຽວຂ້ອງສອງຝ່າຍເຂົ້າຮ່ວມ.

ທ່ານ ເພັດ ພົມພິພັກ ກ່າວວ່າ: ການເຊັນບົດບັນທຶກຄວາມເຂົ້າໃຈໃນຄັ້ງນີ້ແມ່ນມີຄວາມໝາຍສໍາຄັນຕໍ່ການພັດທະນາຂອງສອງຊາດລາວ-ຈີນ ໂດຍສະເພາະແມ່ນການພັດທະນາໃນຂະແໜງກະສິກຳ, ປ່າໄມ້ ແລະພັດທະນາຊົນນະບົດຂອງສອງຊາດລາວ-ຈີນ. ພ້ອມດຽວກັນນັ້ນ, ສອງຝ່າຍຈະສ້າງຊ່ອງທາງການພັດທະນາກະສິກໍາແບບສີຂຽວລະຫວ່າງແຂວງຫູໜານ-ລາວ ຕາມວິທີການຄ້າສາກົນໃໝ່ ຜະລິດຕະພັນກະສິກໍາໂດຍຜ່ານຂະບວນຂົນສົ່ງທາງລົດໄຟແຂວງຫູໜານ-ລາວ ເພື່ອບັນລຸເປົ້າໝາຍການສົ່ງອອກສິນຄ້າກະສິກໍາຂອງລາວໄປແຂວງຫູໜານໄດ້ 1 ລ້ານໂຕນຕໍ່ປີ ພາຍໃນໄລຍະເວລາ 5 ປີຂອງບົດບັນທຶກສະບັບນີ້.

ທ່ານ Shen Yumou ຫົວໜ້າ ພະແນກການຄ້າແຂວງຫູໜານ ໃຫ້ຮູ້ວ່າ: ໂຄງການ "ໜຶ່ງທາງ ສອງເຂດ", ເປັນໂຄງການສໍາຄັນແບບນະວັດຕະກໍາທີ່ຈັດຕັ້ງປະຕິບັດແນວຄວາມຄິດການພັດທະນາໃໝ່, ໂດຍນໍາໃຊ້ແລວເສດຖະກິດທາງລົດໄຟລາວ-ຈີນ ເພື່ອເຊື່ອມໂຍງກັບໂຄງການເຂດພັດທະນາອຸດສາຫະກໍາ-ກະສິກໍາທັນສະໄໝ ນະຄອນຫຼວງວຽງຈັນ ຢູ່ ສປປ ລາວ ແລະເຂດພັດທະນາເສດຖະກິດ ຈິນເຊຍ ຊາງຊາ, ເຂດອຸດສາຫະກໍາ ໂລຊິດສຕິກ ສາກົນ (ອາຊຽນ) ຮວຍຮວ້າ ແລະ ເຂດພັດທະນາອຸດສາຫະກຳທີ່ຮອງຮັບດ້ານອື່ນໆ ແຂວງຫຸນານ ສປ ຈີນ. ໂຄງການ "ໜຶ່ງທາງ ສອງເຂດ", ເປັນໂຄງການບຸກບືນສ້າງວິທີທາງການຄ້າສາກົນທີ່ສຳຄັນ ແລະເປັນວິທີທາງແລກປ່ຽນວິທະຍາສາດ ແລະເຕັກໂນໂລຊີຢ່າງກ້າວກະໂດດ. ເຊິ່ງຈະສົ່ງເສີມການເຊື່ອມໂຍງໂດຍກົງຢ່າງມີປະສິດທິພາບ ແລະການເສີມປະສິດທິພາບລະຫວ່າງກຳລັງການຜະລິດ ແລະຕະຫຼາດ,ເພື່ອໃຫ້ປະສົບການຂອງ ສປ ຈີນ ແລະຄວາມຕ້ອງການດ້ານການພັດທະນາຂອງ ສປປ ລາວ ສາມາດບັນລຸຕາມຄາດໝາຍແບບຕ່າງຝ່າຍຕ່າງມີຜົນປະໂຫຍດ.

แชร์