ວາງສີລາລຶກ ກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ປະຊາຊົນລາວ

ໃນວັນທີ 25 ສິງຫາ 2022 ນີ້, ສອງກະຊວງປ້ອງກັນຄວາມສະຫງົບ ລາວ-ຫວຽດນາມ ໄດ້ຈັດຕັ້ງພິທີວາງສີລາລຶກເພື່ອດຳເນີນການກໍ່ສ້າງວິທະຍາຄານການເມືອງ ປ້ອງກັນຄວາມສະຫງົບ ປະຊາຊົນລາວ ຢູ່ບ້ານໂນນສະອາດ ເມືອງໄຊທານີ ນະຄອນຫລວງວຽງຈັນ. ໃຫ້ກຽດເຂົ້າຮ່ວມຂອງສະຫາຍ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ, ສະຫາຍ ພົອ ໂຕ ເລິມ ກໍາມະການກົມການເມືອງສູນກາງພັກກອມມູນິດຫວຽດນາມ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ມີຄະນະນໍາຂັ້ນສູງ, ພະນັກງານກ່ຽວຂ້ອງ ຂອງສອງກະຊວງປ້ອງກັນຄວາມສະຫງົບເຂົ້າຮ່ວມ.

ໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ປະຊາຊົນລາວ ມີເນື້ອທີ່ທັງໝົດ 6,5 ເຮັກຕາ, ລວມມູນຄ່າການກໍ່ສ້າງທັງໝົດ 250 ຕື້ດົງ ໂດຍໄດ້ຮັບການຊ່ວຍເຫລືອຈາກລັດ ຖະບານຫວຽດນາມ ກໍຄື ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ແລະທຶນສົມທົບຈາກລັດຖະບານລາວ.

ໂອກາດດັ່ງກ່າວ, ສະຫາຍ ພົນເອກ ວິໄລ ຫລ້າຄໍາຟອງ ລາຍງານໃຫ້ຮູ້ວ່າ:ເຫດຜົນໃນການສະເໜີກໍ່ສ້າງວິທະຍາຄານການເມືອງປ້ອງກັນຄວາມສະຫງົບແມ່ນອີງໃສ່ສະພາບຄວາມຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ມາດຖານເງື່ອນໄຂຂອງພະນັກງານຂັ້ນນຳພາ-ບັນຊາ ໃນປັດຈຸບັນ ແລະ ເພື່ອຍົກລະດັບຄວາມຮູ້ທາງດ້ານທິດສະດີການເມືອງ ໃນກໍາລັງປ້ອງກັນຄວາມສະຫງົບ ໃຫ້ສູງຂຶ້ນກວ່າເກົ່າ. ກະຊວງປ້ອງກັນຄວາມສະຫງົບ ເຫັນວ່າ: ຕ້ອງໄດ້ຍົກລະດັບໂຮງຮຽນແຫ່ງນີ້ເປັນວິທະຍາຄານທິດສະດີການເມືອງປ້ອງກັນຄວາມສະຫງົບ, ທຽບໃສ່ສະພາບຂອງພື້ນທີ່ໃນປັດຈຸບັນແມ່ນຄັບແຄບ,ພື້ນທີ່ຕໍ່າບໍ່ມີທິດຂະຫຍາຍ, ສະພາບຂອງອາຄານຮຽນ, ຫໍພັກນັກສຶກສາເກົ່າແກ່ຊຸດໂຊມ, ສະພາບຫ້ອງຮຽນ, ອາຄານຮຽນ ແລະ ຈຳນວນນັກສຶກສາໃນປັດຈຸບັນເຫັນວ່າບໍ່ພຽງພໍ. ສະນັ້ນເພື່ອເປັນການຍົກລະດັບຄວາມຮູ້ທາງດ້ານທິດສະດີການເມືອງຂອງກຳລັງປ້ອງກັນຄວາມສະຫງົບ ໃຫ້ສູງຂຶ້ນໃນສະເພາະໜ້າ ແລະຍາວນານ, ຈຶ່ງມີຄວາມຈຳເປັນຕ້ອງໄດ້ຍົກລະດັບເປັນວິທະຍາຄານການເມືອງປ້ອງກັນຄວາມສະຫງົບ.

ສະຫາຍ ພົນເອກ ວິໄລ ຫລ້າຄໍາຟອງ ຍັງໄດ້ສະແດງຄວາມເຊື່ອໝັ້ນວ່າໂຄງການກໍ່ສ້າງດັ່ງກ່າວຈະປະກອບສ່ວນອັນສໍາຄັນໃຫ້ກະຊວງປ້ອງກັນຄວາມສະຫງົບຂອງ ສປປ ລາວ ເຮັດສຳ ເລັດໜ້າທີ່ຂອງຕົນ ໃນວຽກງານບຳລຸງກໍ່ສ້າງ, ຍົກສູງຄຸນນະພາບການສຶກສາໃຫ້ພະນັກງານ, ນັກສຶກສາທົ່ວກຳລັງປ້ອງກັນຄວາມສະຫງົບຂອງລາວ ໄດ້ຮັບການສຶກສາທີ່ມີຄຸນນະພາບ ແລະ ພື້ນຖານໂຄງລ່າງ, ວັດຖຸອຸປະກອນການຮຽນ-ການສອນທີ່ດີຂຶ້ນ. ຕາງໜ້າໃຫ້ກຳລັງປະກອບອາວຸດກໍຄືກຳລັງປ້ອງກັນຄວາມສະຫງົບ ປະຊາຊົນລາວ ສະແດງຄວາມຂອບໃຈຕໍ່ພັກ, ລັດຖະບານ, ກຳລັງປະກອບອາວຸດ ແລະປະຊາຊົນຫວຽດນາມ ອ້າຍນ້ອງທີ່ຍາມໃດກໍຄຽງບ່າຄຽງໄຫລ່, ເປັນຫ່ວງເປັນໃຍໃຫ້ການຊ່ວຍເຫລືອອັນໃຫຍ່ຫລວງ ແລະລໍ້າຄ່າ.

ສະຫາຍ ພົນເອກ ວິໄລ ຫລ້າຄໍາຟອງກ່າວອີກວ່າ: ພາຍຫລັງໂຄງການນີ້ສ້າງສໍາເລັດ, ກະຊວງປ້ອງກັນຄວາມສະຫງົບຂອງ ສປປ ລາວ ຈະນໍາໃຊ້ເຂົ້າໃນວຽກງານ ບຳລຸງກໍ່ສ້າງ, ສິດສອນ ເເລະຮໍ່າຮຽນໃຫ້ເກີດຜົນປະໂຫຍດສູງສຸດເພື່ອຍົກລະດັບຄວາມຮູ້, ຄວາມສາມາດໃຫ້ກັບນັກສຶກສາທົ່ວກໍາລັງ ເເລະປະກອບສ່ວນສຳຄັນໃນການສ້າງບຸກຄະລາກອນໃຫ້ມີຄວາມຮູ້ທາງດ້ານທິດສະດີການເມືອງ, ກໍາໄດ້ແນວທາງຂອງພັກ ແລະລັດຖະບານກໍຄືຂົງເຂດວຽກງານປ້ອງກັນຄວາມສະຫງົບ, ມີຄຸນທາດການເມືອງໜັກແໜ້ນ, ມີວິຊາສະເພາະທີ່ແຫລມຄົມເພື່ອຮັບໃຊ້ປະເທດຊາດ.

ໂອກາດດຽວກັນ, ສະຫາຍ ພົອ ໂຕ ເລິມ ກ່າວວ່າ: ກະຊວງປ້ອງກັນຄວາມສະຫງົບຫວຽດນາມ ກໍານົດເອົາໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ປະຊາຊົນລາວ ເປັນສັນຍາລັກຂອງຄວາມສາມັກຄີພິເສດ ລະຫວ່າງສອງພັກ, ສອງລັດ ແລະ ປະຊາຊົນສອງຊາດໂດຍສະເພາະລະຫວ່າງກຳລັງປ້ອງກັນຄວາມສະຫງົບຂອງສອງປະເທດ. ພິທີວາງສີລາລຶກໂຄງການກໍ່ສ້າງດັ່ງກ່າວ ຍັງເປັນການປະກອບສ່ວນຢ່າງແທດເໝາະເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ, ວັນເຊັນສົນທິສັນຍາມິດຕະພາບ ແລະຮ່ວມມື ລາວ-ຫວຽດນາມ, ຫວຽດນາມລາວ ຄົບຮອບ 45 ປີ ໃຫ້ມີບັນຍາກາດອັນຄຶກຄື້ນ.

แชร์