ຜູ້ນໍາລາວ ຕ້ອນຮັບລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ

ໃນວັນທີ 24 ສິງຫາ 2022 ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ສະຫາຍ ພົອ ໂຕ ເລິມ ກຳມະການກົມການເມືອງສູນກາງພັກກອມມູນິດຫວຽດນາມ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ພ້ອມດ້ວຍຄະນະໃນໂອກາດເດີນທາງມາຢ້ຽມຍາມ ແລະເຮັດວຽກ ຢູ່ ສປປ ລາວ ໃນລະຫວ່າງວັນທີ 24-27 ສິງຫາ 2022.

ໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງ ຕໍ່ສະຫາຍ ພົອ ໂຕ ເລິມ ທີ່ໄດ້ນຳພາຄະນະເດີນທາງມາຢ້ຽມຍາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນຮັດແໜ້ນການພົວພັນຮ່ວມມືໃນທຸກຂົງເຂດວຽກງານ ໂດຍສະເພາະການຮ່ວມມືຮອບດ້ານລະຫວ່າງສອງກະຊວງປ້ອງກັນຄວາມສະຫງົບ ລາວ ແລະຫວຽດນາມ ໃຫ້ໄດ້ຮັບການພັດທະນາ ແລະສືບຕໍ່ໃຫ້ການສະໜັບສະໜູນ, ຊ່ວຍເຫລືອ, ຮ່ວມມື ເຊິ່ງກັນ ແລະ ກັນ ຕະຫລອດໄປ, ທັງເປັນການປະກອບສ່ວນເຂົ້າໃນການສະເຫລີມສະຫລອງສອງວັນປະຫວັດສາດ ລາວ-ຫວຽດນາມ ໃຫ້ມີບັນຍາກາດອັນຟົດຟື້ນ. ພ້ອມນັ້ນ, ສະຫາຍ ທອງລຸນ ສີສຸລິດ ຍັງໄດ້ຕີລາຄາສູງຕໍ່ການພົບປະສອງຝ່າຍລະຫວ່າງສອງກະຊວງປ້ອງກັນຄວາມສະຫງົບ ລາວ-ຫວຽດນາມ ເຊິ່ງເປັນນິມິດໝາຍອັນດີ ເຮັດໃຫ້ການຮ່ວມມືສອງຝ່າຍກໍຄືສອງກະຊວງປ້ອງກັນຄວາມສະຫງົບໃຫ້ແໜ້ນແຟ້ນຂຶ້ນກວ່າເກົ່າ, ເຮັດໃຫ້ກຳລັງປ້ອງກັນຄວາມສະຫງົບມີຄວາມເຂັ້ມແຂງ, ໜັກແໜ້ນ ແລະ ຈັດຕັ້ງປະຕິບັດວຽກງານຕ່າງໆ ລະຫວ່າງສອງກະຊວງໃຫ້ມີຄວາມໂລ່ງລ່ຽນ ແລະອື່ນໆ.

ໃນວັນດຽວກັນ, ສະຫາຍ ພົອ ໂຕ ເລິມ ພ້ອມດ້ວຍຄະນະຍັງໄດ້ເຂົ້າຢ້ຽມຂໍ່ານັບ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ,ນາຍົກລັດຖະມົນຕີ ແຫ່ງ ສປປ ລາວ, ພ້ອມທັງແຈ້ງຈຸດປະສົງຂອງການເດີນທາງມາຢ້ຽມຍາມ ແລະເຮັດວຽກ ຢູ່ ສປປ ລາວ ໃຫ້ສະຫາຍປະທານປະເທດ ແລະ ສະຫາຍ ນາຍົກລັດຖະມົນຕີ ຮັບຊາບ ແລະໄດ້ລາຍງານຜົນການພົບປະສອງຝ່າຍລະຫວ່າງສອງກະຊວງປ້ອງກັນຄວາມສະຫງົບ ລາວ-ຫວຽດນາມ ຕື່ມອີກ.

ໂອກາດັ່ງກ່າວ, ທ່ານ ພັນຄໍາ ວິພາວັນ ກໍໄດ້ສະແດງຄວາມຊົມເຊີຍ ແລະຕ້ອນຮັບຢ່າງອົບອຸ່ນຕໍ່ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບຫວຽດນາມ ທີ່ໄດ້ເຄື່ອນໄຫວພົບປະສອງຝ່າຍ ຂອງສອງກະຊວງປ້ອງກັນຄວາມສະຫງົບ ລາວ-ຫວຽດ ນາມ ໃນຄັ້ງນີ້ເຊິ່ງຢູ່ໃນບັນຍາກາດທີ່ທົ່ວພັກ, ລັດ ແລະປະຊາຊົນສອງຊາດ ລາວ-ຫວຽດນາມ ພວມສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ 2022 ຢ່າງເປັນຂະບວນການຟົດຟື້ນ ແລະມີຄວາມໝາຍ-ຄວາມສໍາຄັນ, ມັນໄດ້ເປັນການປະກອບສ່ວນຢ່າງຕັ້ງໜ້າຂອງຄະນະຜູ້ແທນຂັ້ນສູງທັງສອງກະຊວງໃນການຮັກສາສະຖຽນລະພາບທາງດ້ານການເມືອງ ແລະຄວາມເປັນລະບຽບຮຽບຮ້ອຍຂອງສັງຄົມໃຫ້ແກ່ສອງປະເທດ ແລະສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນສອງຊາດ ລາວ-ຫວຽດນາມ ມີໂອກາດໃນການສ້າງສາ ແລະພັດທະນາປະເທດຊາດກໍຄືກໍາລັງປ້ອງກັນຄວາມສະຫງົບ ລາວ-ຫວຽດນາມ ໃຫ້ນັບມື້ໄດ້ຮັບການປັບປຸງຢ່າງໜັກແໜ້ນ ແລະມີແບບແຜນທັນສະໄໝຂຶ້ນເທື່ອລະກ້າວ.
ຂ່າວ: ທະນູທອງ
ພາບ: ອ່າຍຄຳ-ຂັນໄຊ

แชร์