ທູດລາວ ປະຈຳ ສສ ຫວຽດນາມ ຢ້ຽມຢາມ ແລະເຮັດວຽກຢູ່ແຂວງບັກຢາງ

ໃນວັນທີ 23 ສິງຫາ 2022 ທີ່ຜ່ານມາ,ສະຫາຍ ແສງເພັດ ຮຸ່ງບຸນຍວງ ເອກອັກຄະລັດ ຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະໄດ້ເດີນທາງໄປຢ້ຽມຢາມ ແລະເຮັດວຽກ ຢູ່ແຂວງບັກຢາງໂດຍໄດ້ພົບປະກັບສະຫາຍ ເລ ແອັງ ເຢືອງ ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງບັກຢາງ (ເຈົ້າແຂວງ). ໃນການພົບປະຄັ້ງນີ້, ການນໍາແຂວງ ກໍໄດ້ສະແດງຄວາມຍິນດີຕ້ອນຮັບ ແລະຕີລາຄາສູງທີ່ສະຫາຍເອກອັກຄະລັດຖະທູດ ພ້ອມຄະນະໄດ້ເດີນທາງໄປຢ້ຽມຢາມ ແລະເຮັດວຽກຢູ່ແຂວງບັກຢາງເຊິ່ງມີຂຶ້ນທ່າມກາງບັນຍາກາດທີ່ສອງປະເທດພວມຈັດຕັ້ງກິດຈະກໍາຕ່າງໆເພື່ອພ້ອມກັນສະເຫລີມສະຫລອງ ປີສາມັກຄີມິດຕະພາບ ລາວ-ຫວຽດນາມ 2022 ເພື່ອຫວນຄືນສອງວັນປະຫວັດສາດທີ່ສຳຄັນ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5/9/1962-5/9/2022) ແລະວັນເຊັນສົນທິສັນຍາມິດຕະພາບ ແລະການຮ່ວມມື ລາວ-ຫວຽດນາມ ຄົບຮອບ 45 ປີ (18/7/1977-18/7/2022).
ສະຫາຍ ເລ ແອັງ ເຢືອງ ຍັງໄດ້ແຈ້ງໃຫ້ຮູ້ວ່າ: ແຂວງບັກຢາງມີເນື້ອທີ່ທັງໝົດ 3.900 km2 (ອັນດັບທີ 36/63 ແຂວງ, ນະຄອນ), ມີປະຊາກອນປະມານ 1,9 ລ້ານຄົນ (ອັນດັບທີ 12/63), ມີຂະ ໜາດເສດຖະກິດໃຫຍ່ເປັນອັນດັບທີ 15/63 ແຂວງ, ນະຄອນ,ມີ 9 ເມືອງ ແລະ 1 ນະຄອນທີ່ຂຶ້ນກັບແຂວງ; ໃນນີ້ 80% ແມ່ນຊົນເຜົ່າກີງ ສ່ວນທີ່ເຫລືອແມ່ນຊົນເຜົ່າສ່ວນໜ້ອຍ. ໂຄງລ່າງເສດຖະກິດຂອງແຂວງແມ່ນເນັ້ນໜັກທາງດ້ານອຸດສາຫະກໍາ ເຊິ່ງປັດຈຸບັນມີເຂດອຸດສາຫະກໍາ 8 ແຫ່ງໂດຍສຸມໃສ່ໃນການຜະລິດເຄື່ອງອາໄຫລ່ເອເລັກໂຕຣນິກ, ອຸປະກອນໄຟຟ້າພະລັງງານແສງຕາເວັນ, ສ່ວນຂະແໜງກະສິກໍາກວມ 16,5% ແຕ່ແຂວງເປັນໜຶ່ງໃນບັນດາແຂວງທີ່ມີການຂະຫຍາຍຕົວທາງດ້ານກະສິກໍາໂດຍສະເພາະການຜະລິດຕົ້ນໄມ້ກິນໝາກສົ່ງອອກຕ່າງປະເທດ ແລະໝາກໄມ້ທີ່ມີຊື່ສຽງທີ່ສຸດຢູ່ໃນຫວຽດນາມ ກໍຄື: ໝາກລິ້ນຈີ ເຊິ່ງຄອງເປັນອັນດັບໜຶ່ງໃນປີ 2021, ສາມາດເກັບຜົນຜະລິດໄດ້ 200.000 ໂຕນ ມູນຄ່າ 6.800 ຕື້ດົງ (ເກືອບ 300 ລ້ານໂດລາສະຫະລັດ) ສົ່ງອອກໄປ 30 ກວ່າປະເທດໃນທົ່ວໂລກ.

ການເກັບລາຍຮັບແຫ່ງຊາດບັນລຸໄດ້ 22.000 ຕື້ດົງໃນປີ 2021, ການເຕີບໂຕທາງດ້ານເສດຖະກິດ 13% ໃນປີ 2020 (ອັນດັບໜຶ່ງຂອງປະເທດ) ແຕ່ເນື່ອງຈາກວ່າໃນປີ 2021 ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ເຮັດໃຫ້ການຂະຫຍາຍຕົວເສດຖະກິດຫລຸດລົງເຫລືອ 7,82% ແຕ່ຍັງຕິດໜຶ່ງໃນສິບແຂວງ, ນະຄອນ ທີ່ມີການເຕີບໂຕສູງ, ມູນຄ່າການສົ່ງອອກ-ນຳເຂົ້າໃນປີ 2021 ບັນລຸໄດ້ຫລາຍກວ່າ 30 ຕື້ໂດລາສະຫະລັດ ໂດຍສະເພາະໃນ 6 ເດືອນຕົ້ນປີ 2022, ພາຍຫລັງທີ່ເຊື້ອພະຍາດໂຄວິດ-19 ໄດ້ຮັບການຄວບຄຸມຢູ່ໃນລະດັບທີ່ແນ່ນອນ ເຮັດໃຫ້ການເຕີບໂຕເສດຖະກິດບັນ ລຸໄດ້ 24% ແລະຄາດຄະເນວ່າໝົດປີຈະສາມາດບັນລຸ 17-18% (ອັນດັບໜຶ່ງຂອງປະເທດ). ນອກຈາກນີ້, ແຂວງຍັງມີທ່າແຮງໃນການດຶງດູດການລົງທຶນຂອງຕ່າງປະເທດເຊິ່ງແຕ່ລະປີສາມາດດຶງດູດໄດ້ຫລາຍກວ່າ 1,8 ຕື້ໂດລາສະຫະລັດ ເຂົ້າມາລົງທຶນຢູ່ແຂວງ. ສ່ວນການພົວພັນຮ່ວມມືກັບ ສປປ ລາວ, ແຂວງບັກຢາງກໍເປັນໜຶ່ງໃນບັນດາແຂວງທີ່ມີອະດີດຊ່ຽວຊານ ແລະທະຫານອາສາສະໝັກຊ່ວຍການປະຕິວັດຢູ່ລາວ, ແຂວງໄດ້ມີກິດຈະກໍາຕ່າງໆເພື່ອເປັນການປະກອບສ່ວນເຂົ້າໃນການຮັດແໜ້ນສາຍພົວພັນສອງປະເທດໂດຍສະເພາະແຂວງບັກຢາງໄດ້ເຊັນບົດບັນທຶກການແຮກສ່ຽວກັບແຂວງໄຊສົມບູນຂອງລາວ ໄລຍະ 2021-2025 ໃນໂອກາດຕິດຕາມຄະນະຜູ້ແທນຂັ້ນສູງ ນຳໂດຍ ສະຫາຍ ຫງວຽນ ຊວັນຟຸກ ປະທານປະເທດ ແຫ່ງ ສສ ຫວຽດນາມ ເດີນທາງໄປຢ້ຽມຢາມ ສປປ ລາວ ໃນເດືອນ 8/2021 ທີ່ຜ່ານມາ.

ໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະເປັນກັນເອງໃນຖານສະຫາຍອ້າຍນ້ອງພ້ອມທັງສະແດງຄວາມຊົມເຊີຍໝາກຜົນການພັດທະນາເສດຖະກິດ-ສັງຄົມ ໃນໄລຍະຜ່ານມາຂອງແຂວງ ເຊິ່ງບັນດາຜົນສຳເລັດດັ່ງກ່າວກໍໄດ້ສະແດງໃຫ້ເຫັນເຖິງການວາງແນວທາງທີ່ຖືກຕ້ອງ, ຄວາມສາມາດໃນການຊີ້ນຳ-ນຳພາຂອງອົງຄະນະພັກ, ອຳນາດການປົກຄອງ ແລະ ການເປັນຈິດໜຶ່ງໃຈດຽວຂອງປະຊາຊົນແຂວງບັກຢາງ. ພ້ອມນັ້ນ, ໄດ້ຕີລາຄາສູງການພົວພັນຮ່ວມມືລະຫວ່າງສອງປະເທດໃນດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບ ສືບ ຕໍ່ເປັນເສົາຫລັກໃຫ້ແກ່ການພົວພັນລວມຂອງສອງປະເທດ, ສ່ວນການຮ່ວມມືທາງດ້ານເສດຖະກິດ-ການຄ້າ, ໃນປີ 2021 ສອງຝ່າຍສາມາດສູ້ຊົນເຮັດໃຫ້ມູນຄ່າການຄ້າສອງສົ້ນບັນລຸໄດ້ 1,2 ຕື້ໂດລາສະຫະລັດ ແຕ່ເຖິງຢ່າງໃດກໍຕາມເຫັນວ່າ ການຮ່ວມມືທາງດ້ານເສດຖະກິດ-ການຄ້າ ຍັງບໍ່ທັນສົມຄູ່ກັບການຮ່ວມມືທີ່ດີເລີດທາງການເມືອງແຕ່ກໍເຊື່ອວ່າພາຍຫລັງທີ່ສອງປະເທດ ລາວ-ຫວຽດນາມ ສາມາດຄວບຄຸມການແຜ່ລະບາດຂອງເຊື້ອພະຍາດໂຄວິດ-19, ສອງປະເທດ ຈະສາມາດສືບຕໍ່ຂຸດຄົ້ນທ່າແຮງບົ່ມຊ້ອນຂອງແຕ່ລະປະເທດ; ການຮ່ວມມືດ້ານການສຶກສາ-ວັດທະນະທໍາ ສືບຕໍ່ມີບາດກ້າວໃໝ່ໂດຍສະເພາະການຍົກສູງຄຸນນະພາບການສຶກສາຂອງນັກສຶກສາລາວ ຢູ່ ສສ ຫວຽດນາມ ຖືເປັນບູລິມະສິດຕົ້ນຕໍຂອງສອງປະເທດ. ພິເສດ, ປີ 2022 “ປີສາມັກຄີມິດຕະພາບ ລາວ-ຫວຽດນາມ” ສອງປະເທດໄດ້ຮ່ວມກັນຈັດກິດຈະກໍາຕ່າງໆ ເພື່ອເປັນການສະເຫລີມສະຫລອງສອງວັນປະຫວັດສາດທີ່ສຳຄັນດັ່ງກ່າວທັງເປັນການໂຄສະນາ, ເຜີຍແຜ່ ແລະສຶກສາອົບຮົມໃຫ້ແກ່ປະຊາຊົນທຸກຊັ້ນຄົນໂດຍສະເພາະຄົນຮຸ່ນໃໝ່ສອງປະເທດໄດ້ເຂົ້າໃຈ ແລະຮັບຮູ້ຢ່າງເລິກເຊິ່ງກ່ຽວກັບສາຍພົວພັນພິເສດທີ່ມີໜຶ່ງບໍ່ມີສອງໃນໂລກນີ້. ສ່ວນແຜນການຮ່ວມມືລະຫວ່າງ ແຂວງບັກຢາງ ກັບ ແຂວງໄຊສົມບູນຂອງລາວ ກໍສະເໜີໃຫ້ສອງຝ່າຍມີການຂຶ້ນແຜນ ແລະໂຄງການລະອຽດໃນການຮ່ວມມືຊ່ວຍເຫລືອເຊິ່ງກັນ ແລະກັນ ເພື່ອແນໃສ່ການເສີມສ້າງຄວາມເຂັ້ມແຂງໃນການພັດທະນາເສຖະກິດ-ສັງຄົມ ແຂວງໄຊສົມບູນ ໂດຍສະເພາະແມ່ນການຊຸກຍູ້ໃຫ້ນັກລົງທຶນຂອງແຂວງບັກຢາງເຂົ້າໄປລົງທຶນຢູ່ແຂວງໄຊສົມບຸນ.

ນອກຈາກນີ້, ຄະນະຍັງໄດ້ເດີນທາງໄປຢ້ຽມຊົມວັດວິ໋ງງຽມເຊິ່ງເປັນວັດດຽວທີ່ບໍ່ຖືກທຳລາຍຈາກການຮຸກຮານຈັກກະພັດຕ່າງດ້າວໃນເມື່ອກ່ອນ ແລະເປັນວັດດຽວໃນຫວຽດນາມ ກໍຄືທົ່ວໂລກທີ່ມີເຈົ້າຊີວິດເຂົ້າບວດ ແລະປະຕິບັດທຳຢູ່ວັດໂດຍແມ່ນເຈົ້າຊີວິດ ເຈີ່ນ ແທງ ຕົງ.

ຂ່າວ-ພາບ: ສະຖານທູດລາວທີ່ຮ່າໂນ້ຍ

แชร์