ກອງປະຊຸມລັດຖະບານ ປະຈຳເດືອນສິງຫາ ແລະພິຈາລະນາ 5 ບັນຫາ ທິດທາງວຽກງານຈຸດສຸມໃນເດືອນກັນຍາ

ເມື່ອວັນທີ 24 ສິງຫາ 2022 ໄຂກອງປະຊຸມລັດຖະບານ ປະຈຳເດືອນສິງຫາ 2022 ໄດ້ໄຂຂຶ້ນພາຍໃຕ້ການເປັນປະທານຂອງທ່ານ ພັນຄຳ ວິພາວັນ ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກ ລັດຖະບານ ແລະຜູ້ຕາງໜ້າຈາກບັນດາກະຊວງເຂົ້າຮ່ວມ.

ກອງປະຊຸມຄັ້ງນີ້ສະມາຊິກລັດຖະບານຈະໄດ້ພ້ອມກັນສຸມໃສ່ປຶກສາຫາລື, ຄົ້ນຄວ້າ ແລະເປັນເອກະພາບ ຕໍ່ 5 ບັນຫາ ທີ່ສຳຄັນ ຄື: 1. ສະຫຼຸບການປະຕິບັດວຽກງານຈຸດສຸມ ປະຈຳເດືອນສິງຫາ ແລະ ທິດທາງແຜນວຽກຈຸດສຸມ ປະຈຳເດືອນ ກັນຍາ 2022 ຂອງລັດຖະບານ; 2. ພິຈາລະນາປັບປຸງ ແຜນການສ້າງ ແລະປັບປຸງກົດໝາຍ 5 ປີ ຂອງສະພາແຫ່ງຊາດ ຊຸດທີ IX (2021 2025); 3. ພິຈາລະນາອະນຸມັດຮັບຮອງເອົາ ໂຄງການບູລິມະສິດ ເຂົ້າແຜນການລົງທຶນຂອງລັດຖະບານທີ່ຈະໄດ້ຮັບທຶນ ຈາກທະນາຄານໂລກໃນບ້ວງເງິນງົບປະມານ IDA 20 ສໍາລັບໄລຍະ 2023-2024; 4. ລາຍງານຄວາມຄືບໜ້າ ໃນການຈັດຕັ້ງປະຕິບັດບັນດາໜ້າວຽກທີ່ໄດ້ກໍານົດໃນຕາຕະລາງທີ່ເປັນເອກະສານຊ້ອນທ້າຍຂອງມະຕິ ສະບັບເລກທີ 07/ລບ, ລົງວັນທີ 04 ຕຸລາ 2021 ວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງຜັນຂະຫຍາຍມະຕິຂອງສະພາແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. 5. ບົດລາຍງານກ່ຽວກັບການປັບປຸງບັນຊີກິດຈະການຄວບຄຸມ ແລະ ກິດຈະການສຳປະທານ.

ໂອກາດກ່າວເປີດກອງປະຊຸມ ທ່ານນາຍົກລັດຖະມົນຕີໄດ້ຮຽກຮ້ອງມາຍັງບັນດາຜູ້ເຂົ້າຮ່ວມຈົ່ງໄດ້ພ້ອມກັນເອົາໃຈໃສ່ຄົ້ນຄວ້າ ແລະປະກອບຄຳເຫັນຢ່າງເລິກຊຶ່ງດ້ວຍການສະເໜີທັດສະນະຢ່າງກົງໄປກົງມາ, ກະທັດຮັດ, ມີຈຸດສຸມ ແລະມີທາງອອກທີ່ຈະແຈ້ງເພື່ອໃຫ້ກອງປະຊຸມໃນຄັ້ງນີ້ມີປະສິດທິຜົນສູງ ແລະບັນລຸຕາມຄາດໝາຍທີ່ໄດ້ກຳນົດໄວ້.

แชร์