ຈຳໜ່າຍພັນທະບັດລັດ ທະລຸ 4.004 ຕື້ກວ່າກີບ

ກ່ອນໜ້ານີ້ທະນາຄານແຫ່ງ ສປປ ລາວໄດ້ອອກພັນທະບັດເພື່ອຈຳໜ່າຍໃຫ້ສັງຄົມໂດຍສະເພາະແມ່ນປະຊາຊົນລາວ ແລະເຫັນວ່າໄດ້ຮັບຄວາມສົນໃຈພໍສົມຄວນຈາກວົງເງິນ 5.000 ຕື້ສາມາດຂາຍໄດ້ທັງໝົດ 4.004 ຕື້ກີບ ເທົ່າກັບ 80% ຂອງຈຳນວນທັງໝົດໃນນັ້ນຜູ້ຊື້ເກືອບເຄິ່ງໜຶ່ງແມ່ນປະເພດບຸກຄົນ.

ຕາມລາຍງານຈາກຫ້ອງການທະນາຄານແຫ່ງ ສປປ ລາວໃຫ້ຮູ້ວ່າ: ພັນທະບັດຂອງທະນາຄານແຫ່ງ ສປປ ລາວ ທີ່ໄດ້ນຳອອກມາຈຳໜ່າຍໃນລະຫວ່າງວັນທີ 15 ມິຖຸນາຫາ 17 ສິງຫາ 2022 ລວມເວລາ 45 ວັນລັດຖະການ ເຫັນວ່າຍອດຈຳໜ່າຍທົ່ວປະເທດແມ່ນເປັນໄປຕາມແຜນການ ໂດຍສາມາດບັນລຸໄດ້ 4.004 ຕື້ກວ່າກີບ ຫຼື ເທົ່າກັບ 80% ວົງເງິນທີ່ອອກຈຳໜ່າຍງວດທີ 1 ເຊິ່ງປະເພດບຸກຄົນທີ່ຊື້ພັນທະບັດກວມເອົາສັດສ່ວນຫຼາຍເຖິງ 42% ແລະນິຕິບຸກຄົນກວມ 38%. ການຈຳໜ່າຍພັນທະບັດຂອງທະນາຄານແຫ່ງ ສປປ ລາວແມ່ນໄດ້ດຳເນີນການຜ່ານ 9 ທະນາຄານຄື ທະນາຄານການຄ້າຕ່າງປະເທດລາວ ມະຫາຊົນ, ທະນາຄານ ພັດທະນາລາວ, ທະນາຄານສົ່ງເສີມກະສິກຳ,ທະນາຄານຮ່ວມທຸລະກິດລາວ-ຫວຍດ, ທະນາຄານຮ່ວມພັດທະນາ, ທະນາຄານ ເອັສທີ, ທະນາຄານພົງສະຫວັນ, ທະນາຄານອຸດສາຫະກຳ ແລະການຄ້າຈີນ, ທະນາຄານເພື່ອການລົງທຶນ ແລະການຄ້າ. ໃນນີ້ສະເພາະພາກເໜືອໄດ້ຈຳໜ່າຍໃນ 8 ແຂວງຄື ຜົ້ງສາລີ, ຫຼວງພະບາງ, ໄຊຍະບູລີ, ຫຼວງນ້າທາ, ບໍ່ແກ້ວ, ອຸດົມໄຊ, ຫົວພັນ ແລະຊຽງຂວາງ ມີຍອດຈຳໜ່າຍລວມທັງໝົດ 1.096 ຕື້ກວ່າກີບ. ພາກກາງເປີດຈຳໜ່າຍຢູ່ 6 ແຂວງຄື ນະຄອນຫຼວງວຽງຈັນ, ແຂວງວຽງຈັນ, ບໍລິຄຳໄຊ, ໄຊສົມບູນ, ຄຳມ່ວນ, ສະຫວັນນະເຂດ ມີຍອດຈຳໜ່າຍໃນພາກນີ້ດ້ວຍມູນຄ່າ 2.425 ຕື້ກວ່າກີບ. ພາກໃຕ້ ລວມມີ 4 ແຂວງທີ່ໄດ້ເປີດຈຳໜ່າຍພັນທະບັດທະນາຄານແຫ່ງ ສປປ ລາວໄດ້ແກ່ ສາລະວັນ, ຈຳປາສັກ, ເຊກອງ, ອັດຕະປື ມີຍອດຈຳໜ່າຍລວມທັງໝົດ 483 ຕື້ກວ່າກີບ. ສຳລັບພັນທະບັດທະນາຄານແຫ່ງ ສປປ ລາວ ແມ່ນເປັນເຄື່ອງມືນະໂຍບາຍທີ່ມີຄວາມປອດໄພທີ່ສຸດໂດຍທີ່ທະນາຄານແຫ່ງ ສປປ ລາວ ເປັນຜູ້ຮັບປະກັນການຊຳລະຕົ້ນທຶນ ແລະດອກເບ້ຍຕາມທີ່ໄດ້ກຳນົດໄວ້ໃນໃບຢັ້ງຢືນການຖືຄອງພັນທະບັດ.

ການອອກພັນທະບັດທະນາຄານແຫ່ງ ສປປ ລາວ ແມ່ນການນຳໃຊ້ເຄື່ອງມືນະໂຍບາຍເງິນຕາຂອງທະນາຄານກາງເພື່ອດຸນດ່ຽງເງິນໃນລະບົບຈໍລະຈອນໃຫ້ສົມຄູ່ກັບລະບົບເສດຖະກິດຂອງ ສປປ ລາວ ແນໃສ່ຮັບປະກັນສະຖຽນລະພາບທາງດ້ານເງິນຕາແຫ່ງຊາດກໍ່ຄືການແກ້ໄຂຄວາມຫຍຸ້ງຍາກທາງເສດຖະກິດການເງິນຂອງປເທດ.

แชร์