ຈໍາປາສັກ-ບິ່ງເຢືອງ ສືບຕໍ່ເພີ່ມທະວີການຮ່ວມມືພັດທະນາ ໄລຍະ 2022-2026

ໃນວັນທີ 23 ສິງຫາ 2022 ທ່ານ ວິໄລວົງ ບຸດດາຄຳ ກໍາມະການສູນກາງພັກ, ເລຂາພັກແຂວງ, ເຈົ້າແຂວງຈໍາປາສັກ ໄດ້ນຳພາຄະນະຜູ້ແທນແຂວງຈໍາປາສັກ ເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງບິ່ງເຢືອງ ສສ ຫວຽດນາມ ເພື່ອສືບຕໍ່ ແລະເພີ່ມທະວີການຮ່ວມມືສອງຝ່າຍ ໂດຍໄດ້ຮັບການຕ້ອນຮັບຈາກທ່ານ ຫງວຽນ ວັນ ເລີ້ຍ ກຳມະການສູນກາງພັກຄອມມູນິດຫວຽດນາມ, ເລຂາພັກແຂວງ, ຫົວໜ້າຄະນະຜູ້ແທນສະພາປະຊາຊົນແຂວງບິ່ງເຢືອງ, ສະຫາຍ ວໍ້ວັນ ມິນ ປະທານຄະນະກຳມະການປະຊາຊົນແຂວງພ້ອມດ້ວຍຄະນະຜູ້ແທນແຂວງບິ່ງເຢື່ອງເຂົ້າຮ່ວມ.

ໂອກາດນີ້, ໄດ້ມີການພົບປະສອງຝ່າຍ ແລະລົງນາມບົດບັນທຶກຊ່ວຍຈຳການຮ່ວມມືພັດທະນາ ໄລຍະປີ 2022-202 ບົນພື້ນຖານການຕົກລົງເຫັນດີໃນການຮ່ວມມືມິດຕະ ພາບຂອງສອງຝ່າຍ ແນໃສ່ການເພີ່ມທະວີສາຍພົວພັນມິດຕະພາບ ແບບພິເສດ ແລະ ການຮ່ວມມືຮອບດ້ານ ລະຫວ່າງສອງທ້ອງຖິ່ນ; ສອງຝ່າຍໄດ້ພ້ອມກັນຕີລາຄາຄືນໝາກຜົນການຮ່ວມມືໄລຍະປີ 2016-2021 ແລະ ກໍານົດທິດທາງການຮ່ວມມື ໄລຍະສົກປີ 2022-2026 ໃນນັ້ນ, ສອງຝ່າຍເຫັນດີສືບຕໍ່ແລກປ່ຽນ ຄະນະຜູ້ແທນຂັ້ນສູງມາຢ້ຽມຢາມ, ເຮັດວຽກ, ແລກປ່ຽນ ແລະຖອດຖອນບົດຮຽນເຊິ່ງກັນ ແລະກັນ; ສອງຝ່າຍຈະສົ່ງເສີມການພົວພັນຮ່ວມມືມິດຕະພາບ ລະຫວ່າງ ສະພາປະຊາຊົນແຂວງບິ່ງເຢືອງ ແລະ ສະພາປະຊາຊົນແຂວງຈຳປາສັກ, ອົງການປົກຄອງນະຄອນທູເຍົ້າໂມດ ແລະ ປົກຄອງນະຄອນປາກເຊ; ສືບຕໍ່ຊຸກຍູ້ແລກປ່ຽນການເຄື່ອນໄຫວການຮ່ວມມືດ້ານການທູດປະຊາຊົນ ແລະແລກປ່ຽນແນວໂຮມປະເທດຊາດຫວຽດນາມ ແຂວງບິ່ງເຢືອງ ແລະແນວລາວສ້າງຊາດແຂວງຈຳປາສັກ; ຊຸກຍູ້ໃຫ້ມີການແລກປ່ຽນການຮ່ວມມືຂອງພາກສ່ວນທຸລະກິດ. ພ້ອມນັ້ນ, ສອງຝ່າຍຈະສືບຕໍ່ຮ່ວມມືຊ່ວຍເຫລືອດ້ານການສຶກສາ; ຊ່ວຍເຫລືອໃນຂົງເຂດວຽກງານການຮ່ວມມືລົງທຶນລະຫວ່າງສອງທ້ອງຖິ່ນ.

ໃນພິທີພົບປະຄັ້ງນີ້, ທ່ານເຈົ້າແຂວງຈໍາປາສັກຍັງໄດ້ມອບໃບຍ້ອງຍໍຂັ້ນແຂວງໃຫ້ແກ່ 3 ກົມກອງ ຂອງແຂວງບິ່ງເຢືອງທີ່ມີຜົນງານໃນການຮ່ວມມືເສີມຂະຫຍາຍສາຍພົວພັນມິດຕະພາບລະຫວ່າງ ແຂວງຈຳປາສັກ ກັບອົງການຈັດຕັ້ງຕ່າງໆ ສສ ຫວຽດນາມ.

ໂອກາດດຽວກັນ, ຄະນະຜູ້ແທນຂັ້ນສູງແຂວງຈຳປາສັກຍັງໄດ້ໄປຢ້ຽມຢາມ ແລະ ທ່ຽວຊົມແຫລ່ງທ່ອງທ່ຽວດາຍນາມທີ່ເປັນແຫລ່ງທ່ອງທ່ຽວຄົບວົງຈອນທີ່ໃຫຍ່ທີ່ສຸດຂອງແຂວງບິ່ງເຢືອງ ສສ ຫວຽດນາມ ຕື່ມອີກ.
ຂ່າວ: ທັດຊະນະ

แชร์