ລັດ​ຖະ​ມົນ​ຕີ​ຕ່າງ​ປະ​ເທດ​ ຕ້ອນຮັບ​ທູດນອກແວ ເຂົ້າອຳລາ

ໃນຕອນບ່າຍຂອງວັນທີ 23 ສິງຫາ 2022 ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ນາງ ເກຣດ ໂລເກນ (Grete Lochen) ເອກອັກຄະລັດຖະທູດ ແຫ່ງ ຣາຊະອານາຈັກນອກແວ ປະຈຳ ສປປ ລາວ ທີ່ມີສຳນັກງານຕັ້ງຢູ່ຮ່າໂນ້ຍ ສສ ຫວຽດນາມ.

ໃນໂອກາດດັ່ງກ່າວທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະຊົມເຊີຍຕໍ່ ທ່ານ ນາງ ເກຣດ ໂລເກນ ທີ່ໄດ້ສຳເລັດການປະຕິບັດໜ້າທີ່ຢ່າງຈົບງາມ, ພ້ອມທັງໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ-ຣາຊະອານາຈັກນອກແວ ຕະຫຼອດໄລຍະ 30 ປີ ຜ່ານມາ. ພ້ອມທັງໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ແລະ ປະຊາຊົນ ນອກເເວ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ ທັງໃນຂອບສອງຝ່າຍ ແລະຫຼາຍຝ່າຍເປັນຕົ້ນແມ່ນການພັດທະນາຊັບພະຍາກອນມະນຸດ, ສາທາລະນະສຸກ, ພື້ນຖານໂຄງລ່າງ, ກະສິກໍາ, ການພັດທະນາບົດບາດຍິງ-ຊາຍໃນເຂດຊົນນະບົດ ແລະອື່ນໆຊຶ່ງເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ກໍຄືການຍົກລະດັບຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນເປັນກ້າວໆ. ພ້ອມດຽວກັນນັ້ນ, ກໍໄດ້ສະເໜີໃຫ້ທ່ານທູດສືບຕໍ່ປະກອບ ສ່ວນຊຸກຍູ້ການພົວພັນຮ່ວມມືສອງຝ່າຍ ສປປ ລາວ - ຣາຊະອານາຈັກນອກເເວ ໃຫ້ຂະຫຍາຍຕົວ ແລະ ແໜ້ນແຟ້ນຍິ່ງໆຂຶ້ນ. ພ້ອມນັ້ນ ທ່ານ ສະເຫຼີມໄຊ ກົມມະສິດ ຍັງໄດ້ສະແດງຄວາມຊົມເຊີຍທ່ານທູດ ເກຣດ ໂລເກນ ທີ່ໄດ້ພົບປະທ່ານທູດລາວ ປະຈໍາ ສສ ຫວຽດນາມ ໃນວັນທີ 12 ພະຈິກ 2021 ທີ່ຜ່ານມາເນື່ອງໃນ​ໂອກາດ​ສະ​ເຫຼີມ​ສະ​ຫຼອງວັນ​ສ້າງຕັ້ງສາຍພົວພັນການທູດລາວ-ນອກເເວ ຄົບຮອບ 30 ປີ ຊຶ່ງທັງສອງ​ຝ່າຍໄດ້​ແລກ​ປ່ຽນ​ສານ​ຊົມ​ເຊີຍຊຶ່ງກັນ ເເລະກັນ.

ໃນໂອກາດດຽວກັນນີ້, ທ່ານ ນາງ ເກຣດ ໂລເກນ ກໍໄດ້ສະແດງຄວາມຂອບໃຈຕໍ່ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້ ພ້ອມທັງຂອບໃຈທີ່ຝ່າຍລາວມີການພົວພັນຮ່ວມືອັນດີ ແລະມີປະສິດທິຜົນ ກັບ ຝ່າຍນອກແວ ທັງໃນຂອບສອງຝ່າຍ ແລະຫຼາຍຝ່າຍໃນໄລຍະຜ່ານມາ ແລະ ໃຫ້ຄໍາໝັ້ນສັນຍາວ່າເຖິງທ່ານຈະຈົບໜ້າທີ່ປະຈຳການ ຢູ່ ສປປ ລາວ ໄປແລ້ວກໍຕາມແຕ່ເຊື່ອໝັ້ນວ່າທ່ານທູດນອກແວຄົນໃໝ່ຈະສືບຕໍ່ສຸມທຸກຄວາມພະຍາຍາມທັງທາງດ້ານເຫື່ອແຮງ ແລະສະຕິປັນຍາຂອງຕົນເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະການຮ່ວມມືລະຫວ່າງສອງປະເທດໃຫ້ນັບມື້ນັບໄດ້ຮັບການເພີ່ມພູນຄູນສ້າງຂະຫຍາຍຕົວຍິ່ງໆຂຶ້ນ.

ຂ່າວ: ກະຊວງການຕ່າງປະເທດ

แชร์