ຄອສພ ຈັດຝຶກອົບຮົມວຽກງານຫາງສຽງ-ສັງຄົມ ເພື່ອຍົກລະດັບຄວາມສາມາດທາງດ້ານວິຊາການ

        ວຽກງານເກັບກໍາສະພາບແນວຄິດ-ຫາງສຽງສັງຄົມ ແມ່ນວຽກງານໜຶ່ງທີ່ມີຄວາມສໍາຄັນ ແລະ ຈໍາເປັນສໍາລັບການເຄື່ອນໄຫວວຽກງານການເມືອງ-ແນວຄິດ ຂອງພັກ ໂດຍແມ່ນຄະນະໂຄສະນາອົບຮົມແຕ່ລະຂັ້ນເປັນໃຈກາງ ໃນການປະຕິບັດໜ້າທີ່ເປັນເສນາທິການໃຫ້ແກ່ຄະນະພັກຂັ້ນຂອງຕົ້ນ.

        ໂດຍປະຕິບັດຕາມແຜນປັບປຸງຄຸນນະພາບວຽກງານ ໂຄສະນາອົບຮົມສູນກາງພັກ ເພື່ອສ້າງການຫັນປ່ຽນໄປສູ່ຄຸນນະພາບໃໝ່ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການ ຂອງວຽກງານການເມືອງ-ແນວຄິດ ໃນເງື່ອນໄຂໃໝ່; ເພື່ອບັນລຸຕາມແຜນການດັ່ງກ່າວ ກົມສັງລວມ ແລະ ຫາງສຽງສັງຄົມ ຂອງ ຄອສພ ຈຶ່ງໄດ້ຈັດຝຶກອົບຮົມຄວາມຮູ້ພື້ນຖານວຽກງານ ຫາງສຽງ-ສັງຄົມ ໃຫ້ແກ່ພະນັກງານວິຊາການ ໃນຄະນະໂຄສະນາອົບຮົມສູນກາງພັກ ແລະ ເພື່ອຮ່ວມງານຢູ່ບັນດາກະຊວງ, ອົງການ ຂັ້ນສູນກາງ ເພື່ອຍົກລະດັບຄວາມສາມາດ ທາງດ້ານວິຊາການ ແລະ ສ້າງການຫັນປ່ຽນໃໝ່ ໃນວຽກງານເກັບກໍາສະພາບແນວຄິດ-ຫາງສຽງສັງຄົມ ໃຫ້ມີຄຸນນະພາບ, ວ່ອງໄວ, ທັນການ ແລະ ໄດ້ຮັບການແກ້ໄຂຢ່າງມີປະສິດທິຜົນ.

        ຊຸດຝຶກອົບຮົມໄດ້ຈັດຂຶ້ນໃນວັນທີ 22-24 ສິງຫາ 2022 ຢູ່ທີ່ສະໂມສອນໃຫຍ່ ຄອສພ ເປັນກຽດເຂົ້າຮ່ວມພິທີເປີດ ໂດຍທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງຫົວໜ້າ ຄອສພ, ມີທ່ານ ນາງ ແສງຕານ ແກ້ວອິນດາປິງ ຫົວໜ້າກົມສັງລວມ ແລະ ຫາງສຽງສັງຄົມ, ມີບັນດາສະຫາຍ ຫົວໜ້າກົມ, ນັກວິຍາກອນທີ່ມາຈາກກົມສັງລວມ ແລະ ຫາງສຽງສັງຄົມ ແລະ ນັກຝຶກອົບຮົມ ທີ່ມາຈາກບັນດາກົມໃນ ຄອສພ, ຈາກ 28 ກະຊວງ-ອົງການ ອ້ອມຂ້າງສູນກາງ ລວມທັງໝົດ 54 ທ່ານ. ເອກະສານທີ່ຈະນໍາມາຝຶກອົບຮົມໃນຄັ້ງນີ້ປະກອບມີ 4 ບົດຄື: 1. ຄວາມຮູ້ພື້ນຖາານກ່ຽວກັບວຽກງານຫາງສຽງສັງຄົມ; 2. ວິທີການເກັບກໍາ ແລະ ການນຳໃຊ້ຫາງສຽງສັງຄົມເຂົ້າໃນວຽກງານການເມືອງ-ແນວຄິດ; 3. ຕາໜ່າງເພື່ອນຮ່ວມງານ; 4. ວຽກງານຄົ້ນຄວ້າ-ສັງລວມ.

        ພິທີເປີດ ທ່ານ ລາວປາວຊົງ ນະວົງໄຊ ໄດ້ມີຄໍາເຫັນ ຊີ້ນໍາຕໍ່ຊຸດຝຶກອົບຮົມ ໂດຍທ່ານ ໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບ ກໍຄືກົມສັງລວມ ທີ່ໄດ້ສ້າງ ແຜນການເພື່ອບໍາລຸງກໍ່ສ້າງພະນັກງານ ແລະ ຍົກລະດັບຄວາມສາມາດ ທາງດ້ານວິຊາການ; ການຈັດຕັ້ງຝຶກອົບຮົມ ໃນຄັ້ງນີ້ມີຄວາມໝາຍສໍາຄັນຫຼາຍຕໍ່ການປັບປຸງຄຸນນະພາບ ຂອງວຽກງານ ໂຄສະນາອົບຮົມຂອງພັກ, ສະນັ້ນ ຮຽກຮ້ອງໃຫ້ນັກຝຶກອົບຮົມທັງໝົດ ຈົ່ງຕັ້ງໃຈຮຽນຮູ້ດ້ວຍການແລກປ່ຽນ ຄວາມຄິດເຫັນ, ສົນທະນາ ແຕ່ລະບັນຫາ ໃຫ້ເລິກເຊິ່ງສາມາດເຂົ້າໃຈ ແລະ ກໍາແໜ້ນ ເພື່ອນໍາເອົາບົດຮຽນທີ່ຜ່ານການຝຶກອົບຮົມ ໃນຄັ້ງນີ້ ໄປຈັດຕັ້ງປະຕິບັດ ໃນວຽກງານຕົວຈິງຢູ່ກະຊວງ, ອົງການ ຂອງຕົນ ແລະ ຫວັງຢ່າງຍິ່ງວ່າ ບັນດາສະຫາຍທີ່ເຂົ້າຮ່ວມຝຶກອົບຮົມໃນຄັ້ງນີ້ ຈະກາຍເປັນນັກການເມືອງ-ແນວຄິດ ແລະ ເປັນເພື່ອນຮ່ວມງານທີ່ດີ ຂອງຄະນະໂຄສະນາອົບຮົມສູນກາງພັກ.

 ຂ່າວ: ສອນທິ; ພາບ: ຫົງລຶດີ

แชร์