ສະພາປະຊາຊົນ ແຂວງຄໍາມ່ວນ ເປີດກອງປະຊຸມສະໄໝສາມັນ ເທື່ອທີ 3

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ແຂວງຄໍາມ່ວນ ຊຸດທີ II ຈັດຂື້ນຢ່າງເປັນທາງການໃນວັນທີ 23 ສິງຫາ 2022 ທີ່ສະໂມສອນໃຫຍ່ແຂວງຄໍາມ່ວນ, ພາຍໃຕ້ການເປັນປະທານຂອງ ທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງ, ໂດຍການເປັນກຽດເຂົ້າຮ່ວມຂອງທ່ານ ຄໍາໃບດໍາລັດກໍາມະການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12, ທ່ານ ວັນໄຊ ພອງສະຫວັນ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆຄໍາມ່ວນ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແລະ ສະມາຊິກສະພາປະຊາຊົນແຂວງພ້ອມດ້ວຍບັນດາການນໍາຂັ້ນແຂວງ ແລະ ແຂກຖືກເຊີນເຂົ້າຮ່ວມ.

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້ ຈະໄດ້ພິຈາລະນາຮັບຮອງບັນດາເນື້ອໃນທີ່ສໍາຄັນຄື : ບົດລາຍງານໂດຍສັງເຂບຂອງ ທ່ານ ເຈົ້າແຂວງ ກ່ຽວກັບບັນຫາພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2022 ຂອງແຂວງ ຄໍາມ່ວນ; ບົດລາຍງານ ຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ ປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022; ບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022; ບົດລາຍງານຂອງຄະນະປະຈໍາສະພາປະຊາຊົນແຂວງຄໍາມ່ວນກ່ຽວກັບການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ແລະ ແຜນການເຄື່ອນໄຫວວຽກງານຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄຳມ່ວນ ຊຸດທີ II; ບົດລາຍງານຂອງຄະນະປະຈໍາສະພາປະຊາຊົນແຂວງຄໍາມ່ວນກ່ຽວກັບການຕິດຕາມກວດກາການຈັດຕັ້ງຜັນຂະຫຍາຍວາລະແຫ່ງຊາດຢູ່ພາຍໃນແຂວງໃນໄລຍະຜ່ານມາ ແລະແຜນການຕິດຕາມກວດກາຂອງສະພາປະຊາຊົນຂັ້ນແຂວງກ່ຽວກັບການປະຕິບັດວາລະແຫ່ງຊາດ ໃນຕໍ່ໜ້າ; ບົດຊີ້ແຈງຕິດພັນກັບການລາຍງານຂອງອົງການປົກຄອງແຂວງມີ: ພະແນກແຜນການ ແລະການລົງທຶນແຂວງ, ພະແນກການເງິນແຂວງ. ນອກຈາກຊີ້ແຈງບັນຫາລວມແລ້ວ ຍັງລົງເລິກຕື່ມການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ບົດຊີ້ແຈງຕິດພັນກັບບົດລາຍງານ ຂອງອົງການປົກຄອງແຂວງມີ: ພະແນກກະສິກຳ ແລະປ່າໄມ້ແຂວງ, ພະແນກອຸດສະຫະກຳ ແລະການຄ້າແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກໂຍທາທິການ ແລະ ຂົນສົ່ງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ພະແນກສຶກສາທິການ ແລະ ກິລາແຂວງ, ພະແນກສາທາລະນະສຸກແຂວງ, ອົງການໄອຍະການປະຊາຊົນແຂວງ ແລະ ບົດຊີ້ແຈງ ຂອງກອງບັນຊາການ ປກສ ແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະບົດຊີ້ແຈງຂອງທະນາຄານແຫ່ງ ສປປລາວ ປະຈຳພາກກາງ (ແຂວງສະຫວັນນະເຂດ). ເຊິ່ງກອງປະຊຸມຄັ້ງນີ້ຈະໄດ້ດຳເນີນໄປເປັນເວລາ 2 ວັນ, ວັນທີ 23 – 24 ສິງຫາ 2022 ຈິ່ງຈະສໍາເລັດ.

แชร์