ຫສປທ ເຜີຍແຜ່ເອກະສານສໍາຄັນຂອງພັກ-ຂອງຊາດ

ຫ້ອງວ່າການສໍານັກງານປະທານປະເທດ (ຫສປທ) ເຜີຍແຜ່ເອກະສານສໍາຄັນຂອງພັກ-ຂອງຊາດຄື: ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI ແລະ ວັນເກີດປະທານສຸພານຸວົງ ຄົບຮອບ 113 ປີ (13 ກໍລະກົດ 1909-13 ກໍລະກົດ 2022) ໃນວັນທີ 23 ສິງຫາ 2022 ໂດຍການເຜີຍແຜ່ຂອງ ສະຫາຍ ນາງ ເຂັມມະນີ ພົນເສນາ ເລຂາຄະນະບໍລິຫານງານພັກ, ຫົວໜ້າ ຫສປທ, ມີຄະນະພັກ, ຄະນະໜ່ວຍພັກ, ສະມາຊິກພັກ ແລະ ພະນັກງານ-ລັດຖະກອນ ພາຍໃນ ຫສປທ ເຂົ້າຮ່ວມ.

ໃນໂອກາດນີ້, ສະຫາຍ ນາງ ເຂັມມະນີ ພົນເສນາ ໄດ້ເຜີຍແຜ່ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI ເຊິ່ງຈັດຂຶ້ນໃນວັນທີ 18-26 ພຶດສະພາ 2022 ທີ່ສໍານັກງານສູນກາງພັກປະຊາຊົນປະຕິວັດລາວ ພາຍໃຕ້ການເປັນປະ ທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາ ຊົນ ປະຕິວັດລາວ, ກອງປະຊຸມໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນໍາຕໍ່ຫລາຍບັນຫາສໍາຄັນ ເປັນຕົ້ນ ໄດ້ປະເມີນສະພາບແວດລ້ອມຢູ່ພາກພື້ນ ແລະ ສາກົນ ໃນປັດຈຸບັນ ແລະ ຄາດຄະເນທ່າຂະຫຍາຍໃນຕໍ່ໜ້າ; ຕີລາຄາກ່ຽວກັບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ຕົ້ນປີ 2022 ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ; ສືບຕໍ່ຍູ້ແຮງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ປະກົດຜົນເປັນຈິງ; ການຊຸກຍູ້, ສົ່ງເສີມຜູ້ປະກອບການທຸລະກິດຂະໜາດນ້ອຍ, ຂະໜາດກາງ ແລະ ຈຸນລະວິສາຫະກິດໃຫ້ມີຄວາມເຂັ້ມແຂງ; ການເພີມທະວີການພັດທະນາຊັບ ພະຍາກອນມະນຸດໃຫ້ມີຄຸນນະພາບສູງ; ການປັບປຸງລະບົບການຈັດຕັ້ງ, ກົງຈັກ ແລະ ກົນໄກການເຄື່ອນໄຫວຂອງອົງການບໍລິຫານລັດຕາມທິດເຂັ້ມແຂງ ແລະ ມີປະສິດທິພາບ; ຄົ້ນຄວ້າປຶກ ສາຫາລື ແລະ ໃຫ້ທິດຊີ້ນໍາເບື້ອງຕົ້ນກ່ຽວກັບການຄົ້ນຄວ້າທິດສະດີ ແລະ ສະຫລຸບພຶດຕິກໍາໃຫ້ແກ່ການສ້າງປະຖົມປັດໄຈເພື່ອກ້າວຂຶ້ນສູ່ຈຸດໝາຍສັງຄົມນິຍົມ; ໄດ້ປຶກສາຫາລື ແລະໃຫ້ທິດຊີ້ນໍາກ່ຽວກັບການກະກຽມດໍາເນີນກອງປະຊຸມວຽກງານການເມືອງແນວຄິດທົ່ວປະເທດຄັ້ງທີ V, ກອງປະຊຸມວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ, ແກ້ໄຂຄວາມ ທຸກຍາກ ແລະ ວຽກງານສາມສ້າງ, ກອງປະຊຸມສະຫລຸບຂະບວນການແຂ່ງຂັນຮັກຊາດ ແລະ ພັດທະນາ. ພ້ອມນັ້ນ, ຄະນະບໍລິຫານງານສູນກາງພັກ ໄດ້ວາງວຽກງານຈຸດສຸມໃນການນໍາພາຊີ້ນໍາຂອງຕົນແຕ່ນີ້ຫາກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI ໃນຫລາຍດ້ານເຊັ່ນ: ຊີ້ນໍາການກະກຽມ ແລະດໍາເນີນກອງປະຊຸມສາມັນເທື່ອທີ 3 ຂອງສະພາແຫ່ງຊາດ; ຊີ້ນໍາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ,ແຜນງົບປະມານ, ແຜນເງິນຕາໃນ 6 ເດືອນທ້າຍປີ 2022 ຕິດພັນກັບ 2 ວາລະແຫ່ງຊາດ; ສຸມໃສ່ຊີ້ນໍາແກ້ໄຂຄວາມເຄັ່ງຮ້ອນ, ອ່ອນໄຫວທີ່ກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນໃນປັດຈຸບັນ ແລະ ບັນຫາອື່ນໆ.

ຈາກນັ້ນ, ສະຫາຍ ເພັດສະໝອນ ພັນທະວົງ ຮອງເລຂາຄະນະບໍລິຫານງານພັກ, ຮອງຫົວໜ້າ ຫສປທ ກໍໄດ້ເລົ່າຄືນປະຫວັດຄວາມເປັນມາຂອງວັນຍຶດອຳນາດ ເດືອນສິງຫາ 1945 ເພື່ອຫລຸດພົ້ນອອກຈາກແອກປົກຄອງຂອງ ພວກລ່າເມືອງຂຶ້ນແບບເກົ່າ ຂອງປະຊາຊົນລາວທົ່ວປະເທດຢູ່ຕາມຕົວເມືອງໃຫຍ່ເຊັ່ນ: ວຽງຈັນ, ສະຫວັນນະເຂດ ເພື່ອສ້າງຕັ້ງອຳນາດການປົກ ຄອງຂອງຕົນຂຶ້ນຢູ່ຫລາຍທ້ອງຖິ່ນຈົນໄດ້ປະກາດຄວາມເປັນເອກະລາດຂອງຊາດ ຕໍ່ໜ້າມວນຊົນໃນວັນທີ 12 ຕຸລາ 1945. ພາຍຫລັງຈັກກະພັດລ່າເມືອງຂຶ້ນແບບເກົ່າຖືກປະລາໄຊຈັກກະລ່າເມືອງຂຶ້ນແບບໃໝ່ກໍໄດ້ກະໂດດເຂົ້າມາແທນທີ່ດຳເນີນການແຊກແຊງ ແລະຮຸກຮານປະເທດລາວໂດຍທັນທີ ດ້ວຍກົນອຸບາຍຫວັງເຮັດໃຫ້ປະເທດເຮົາ ກາຍເປັນຫົວເມືອງຂຶ້ນແບບ ໃໝ່. ຮອດວັນທີ 22 ມີນາ 1955 ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນ ແລະ ນໍາພາການຕໍ່ສູ້ຢ່າງອົງອາດກ້າຫານ, ມີໄຫວພິບປະຕິພານ, ສະຫລາດສ່ອງໃສປຸກລະດົມມວນຊົນເຂົ້າຮ່ວມຂະບວນການຕໍ່ສູ້ຢູ່ຕາມໂຮງຈັກໂຮງງານ, ຕົວເມືອງໃຫຍ່ ໂດຍປະສານສົມທົບກໍາລັງປະກອບອາວຸດຍຶດເອົາທີ່ຕັ້ງສໍາຄັນ ຈົນຮອດວັນທີ 23 ສິງຫາ 1975 ຊາວນະຄອນຫລວງວຽງຈັນ ສອງໝື່ນຄົນ ໄດ້ໂຮມຊຸມນຸມ ເພື່ອປະກາດສ້າງຕັ້ງອໍານາດການປົກຄອງປະຕິບັດຂຶ້ນຢູ່ຂັ້ນແຂວງ, ນະຄອນຫລວງ ລົງຮອດຮາກຖານໄດ້ຮັບການສ້າງຕັ້ງຂຶ້ນ ວັນທີ 2 ທັນວາ 1975 ກອງປະຊຸມໃຫຍ່ຜູ້ແທນທົ່ວປະເທດ ໄດ້ໄຂຂຶ້ນຢ່າງສະຫງ່າຜ່າເຜີຍຢູ່ນະຄອນຫລວງວຽງຈັນ ຕົກ ລົງລົບລ້າງລະບອບລາຊາທິປະໄຕທີ່ຫລ້າສະໄໝ ແລະ ສະຖາປະນາລະບອບ ສາທາລະນະລັດ ປະຊາທິປະໄຕ ປະຊາຊົນລາວ; ສ້າງຕັ້ງສະພາສູງສຸດ, ແຕ່ງຕັ້ງປະທານປະເທດ ແລະສ້າງຕັ້ງລັດຖະບານ ສປປ ລາວ, ກໍານົດທຸງຊາດ, ເພງຊາດ ແລະພາສາທາງການມາເຖິງປັດຈຸບັນນີ້.

ໃນກອງປະຊຸມຍັງໄດ້ເຜີຍແຜ່ເອກະສານວັນເກີດປະທານສຸພານຸວົງ ຄົບຮອບ 113 ປີ (13 ກໍລະກົດ 1909-13 ກໍລະກົດ 2022) ໂດຍສະຫາຍ ອິນທະປັນຍາ ຂຽວວົງພະຈັນ, ກໍາມະການພັກ, ຮອງຫົວໜ້າ ຫສປທ ໄດ້ຍົກໃຫ້ເຫັນເຖິງຊີວິດການເຄື່ອນໄຫວຂອງປະທານ ສຸພານຸວົງ ເຊິ່ງແມ່ນນັກຮົບຮັກຊາດຮຸ່ນທຳອິດທີ່ໄດ້ເອົາຊີວິດຕິດພັນກັບການປະຕິວັດຕະຫລອດມາທ່ານໄດ້ອຸທິດຊີວິດຄວາມຮູ້ຄວາມສາມາດສະຕິປັນຍາ ແລະຫົວຄິດປະດິດສ້າງເພື່ອພາລະກິດປະຕິວັດເພື່ອປະເທດຊາດເພື່ອປະຊາຊົນຢ່າງສຸດໃຈແບບຢ່າງ ແລະຄຸນສົມບັດຄຸນງາມຄວາມດີຂອງເພິ່ນໄດ້ກາຍເປັນແວ່ນແຍງທີ່ໃສສະອາດ ແລະບົດຮຽນອັນລໍ້າຄ່າໃຫ້ແກ່ພວກເຮົາຮຸ່ນສືບທອດ.
ພາບ: ອ່າຍຄຳ

แชร์