ສ້າງຄວາມເຂັ້ມແຂງໃຫ້ສື່ມວນຊົນ ລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະເດັກ

ໃນວັນທີ 23-24 ສິງຫາ 2022 ຢູ່ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ ເປີດຊຸດອົບຮົມໃນຫົວຂໍ້: ສ້າງຄວາມເຂັ້ມແຂງໃຫ້ສື່ມວນຊົນກ່ຽວກັບວຽກງານປ້ອງກັນ ແລະ ລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະເດັກໂດຍມີ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ, ຄະນະກຳມະການ ເພື່ອຄວາມກ້າວໜ້າຂອງແມ່ຍິງ ແລະເດັກ, ທ່ານ ນາງ ມາລ່ຽມ ເອຄານ ຜູ້ຕາງໜ້າອົງການ ອົງການສະຫະປະຊາຊາດກອງທຶນສຳລັບປະຊາກອນ(UNFPA), ມີສໍາມະນາກອນຈາກກົມຂ່າວສານແມ່ຍິງລາວ, ບັນດາສື່ມວນຊົນອ້ອມຂ້າງສູນກາງ, ອົງການຈັດຕັ້ງມະຫາຊົນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ອຸ່ນທວງ ຂາວພັນ ໄດ້ກ່າວວ່າ: ຊຸດອົບຮົມຄັ້ງນີ້, ມີຄວາມສອດຄ່ອງ ແລະແທດເໝາະທີ່ສຸດເພາະເປັນການຍົກລະດັບຄວາມອາດສາມາດຂອງບຸກຄະລາກອນ ຂະແໜງສື່ມວນຊົນໃນໄລຍະໃໝ່, ຊຶ່ງວຽກງານສື່ມວນຊົນກໍເປັນຂະແໜງການໜຶ່ງທີ່ສັງກັດໃນກະຊວງ ຖວທ, ທັງເປັນກະບອກສຽງຂອງພັກ-ລັດ ແລະສັງຄົມ ໃນການສົ່ງຂໍ້ມູນຂ່າວສານ, ເຜີຍແຜ່ນະໂຍບາຍ ແລະແຜນງານຕ່າງໆ ອອກສູ່ສັງຄົມເພື່ອໃຫ້ປະຊາຊົນບັນດາເຜົ່າໄດ້ຮັບຊາບກັນຢ່າງທົ່ວເຖິງ ແລະດີຕະຫລອດມາ.

ບັນຫາການນຳໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍແມ່ນປະກົດການຫຍໍ້ທໍ້ໜຶ່ງທີ່ເກີດຂື້ນໃນຫລາຍຂອບເຂດຫຼາຍປະເທດທົ່ວໂລກ ແລະຫລາຍປະເທດກ່ໄດ້ມີການຈັດຕັ້ງແກ້ໄຂກັນຢ່າງຈິງຈັງໂດຍໄດ້ມີຂໍ້ກຳນົດກົດໝາຍທີ່ກ່ຽວກັບການປົກປ້ອງ ແລະສິດທິຂອງແມ່ຍິງ ແລະເດັກຢ່າງເປັນຮູບປະທຳເຊິ່ງໄລຍະຜ່ານມາ, ສັງຄົມຂອງພວກເຮົາ ກ່ໄດ້ພົບພໍ້ຫລາຍບັນຫາກ່ຽວກັບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍເຊັ່ນດຽວກັນ ໂດຍສະເພາະໃນຍຸກນີ້ ໄດ້ມີການເຜີຍແຜ່ຮູບພາບ, ວິດີໂອຄວາມຮຸນແຮງຕ່າງໆຜ່ານສື່ສັງຄົມອອນລາຍຊຶ່ງເຫັນໄດ້ວ່າເປັນໄພອັນຮ້າຍແຮງໜຶ່ງທີ່ຈະສົ່ງຜົນເສຍຕໍ່ແມ່ຍິງ ແລະເດັກນ້ອຍໃນໄລຍະຍາວ, ຫາກປ່ອຍໃຫ້ບັນຫາເຫລົ່າານີ້ແກ່ຍາວ ແລະບໍ່ມີການຊ່ວຍເຫລືອຢ່າງຈິງຈັງ.

ຍ້ອນເຫັນໄດ້ເຖິງຜົນກະທົບທີ່ກ່າວມາຂ້າງເທິ່ງນັ້ນ, ພັກ-ລັດຖະບານ ແຫ່ງ ສປປ ລາວ ໂດຍສະເພາະ ຄະນະນຳກະຊວງ ຖວທ ພວກເຮົາແມ່ນໄດ້ມີຄວາມເປັນຫ່ວງເປັນໄຍ ຕໍ່ປະກົດການຫຍໍ້ທໍ້ດັ່ງກ່າວ, ໃນໄລຍະຜ່ານມາ ພວກເຮົາກໍໄດ້ມີການຮ່ວມມືທີ່ດີກັບບັນດາຂະແໜງການຂອງພາກລັດທີ່ກ່ຽວຂ້ອງ, ບັນດາອົງການສາກົນ ແລະ ມີການຈັດຕັ້ງ ການເຄື່ອນໄຫວໂຄສະນາ ປະຊາສຳພັນຢ່າງເປັນປົກກະຕິຕະຫລອດມາກ່ຽວກັບການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ.

ທ່ານ ອຸ່ນທວງ ຂາວພັນ ຍັງກ່າວອີກວ່າ: ຂ້າພະເຈົ້າເຊື່ອໝັ້ນວ່າບັນດາສື່ມວນຊົນທີ່ເຂົ້າຮ່ວມໃນຄັ້ງນີ້, ຈະພ້ອມກັນຕິດຕາມ, ຮັບຟັງ, ຮຽນຮູ້ ແລະ ແລກປ່ຽນຄວາມຮູ້ປະສົບການອັນເປັນປະໂຫຍດທັງທາງກົງ ແລະທາງອ້ອມຮ່ວມກັບວິທະຍາກອນ ເພື່ອຍາດໄດ້ບົດຮຽນ ແລະພຶດຕິກຳຕົວຈິງໃນການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະເດັກ, ພ້ອມທັງວິທີການເຜີຍແຜ່ຂໍ້ມູນຂ່າວສານອອກສູ່ປະຊາຊົນໃຫ້ຮັບຮູ້ ແລະ ເຂົ້າໃຈເຖິງປະກົດການຫຍໍ້ທໍ້ດັ່ງກ່າວໃຫ້ຫລຸດໜ້ອຍລົງ.

แชร์