ສຄອ ເຊກອງ ທາບທາມບຸກຄະລາກອນ ກະກຽມໃຫ້ແກ່ ກອງປະຊຸມໃຫຍ່ ຄັ້ງທີ I

ສະພາການຄ້າ ແລະອຸດສາຫະກໍາ (ສຄອ) ແຂວງເຊກອງ ໄດ້ຈັດກອງປະຊຸມທາບທາມບຸກຄະລາກອນເພື່ອກະກຽມດ້ານຕ່າງໆໃຫ້ແກ່ກອງປະຊູມໃຫຍ່ ຄັ້ງທີ I ໃນວັນທີ 22 ສິງຫາ 2022 ໂດຍການເປັນປະທານຂອງ ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ຜູ້ຊີ້ນໍາເສດຖະກິດຂັ້ນແຂວງ, ມີທ່ານ ສິມມາ ດວງເສລີ ຮັກສາການຫົວໜ້າພະແນກອຸດສາຫະກໍາ ແລະການຄ້າແຂວງ, ມີປະທານ-ຮອງປະທານ ສຄອ, ຂະແໜງການກ່ຽວຂ້ອງ ແລະຫົວໜ່ວຍທຸລະກິດເຂົ້າຮ່ວມ.

ທ່ານ ຂັນຕີ ສີລະວົງສາ ໄດ້ກ່າວວ່າ: ເພື່ອເປັນການກະກຽມຄວາມພ້ອມດ້ານຕ່າງໆໃຫ້ແກ່ການດໍາເນີນກອງປະຊຸມໃຫຍ່ຄັ້ງທີ I ຂອງຄະນະບໍລິຫານງານ ສຄອ ແຂວງເຊກອງ ໂດຍແມ່ນການກ້າວເຂົ້າສູ່ການທາບທາມຮອບທີ I ກ່ຽວກັບບຸກຄະລາກອນ ທີ່ຈະລົງສະໝັກເຂົ້າເປັນຄະນະບໍລິຫານງານ ສຄອ ຊຸດໃໝ່; ສະນັ້ນພວກເຮົາຈະມີການປະກອບຄໍາຄິດຄໍາເຫັນເຂົ້າໃສ່ຮ່າງບົດສະຫລຸບການເຄື່ອນໄຫວວຽກງານ ສຄອ ໃນໄລຍະຜ່ານມາ ແລະທິດທາງແຜນການໃນຕໍ່ໜ້າ, ພ້ອມທັງດໍາເນີນການປ່ອນບັດທາບທາມບຸກຄະລາກອນຮອບທີ I ໃນການກໍານົດເອົາຈໍານວນລາຍຊື່ບຸກຄະລາກອນເພື່ອສະໝັກເຂົ້າເປັນຄະນະບໍລິຫານງານ ສຄອ ແຂວງເຊກອງຊຸດໃໝ່.

ໂອກາດນີ້, ທ່ານຮອງເຈົ້າແຂວງເຊກອງ ຍັງຮຽກຮ້ອງໃຫ້ຜູ້ແທນທຸກພາກສ່ວນທີ່ເຂົ້າຮ່ວມກອງປະຊຸມໃນຄັ້ງນີ້ຈົ່ງໄດ້ພ້ອມກັນເອົາໃຈໃສ່ຍົກສູງຄວາມຮັບຜິດຊອບການ ເມືອງຂອງຕົນ, ຍົກສູງສະຕິປັນຍາປະກອບຄໍາຄິດຄໍາເຫັນຢ່າງກົງໄປກົງມາເຂົ້າໃນການຄົ້ນຄ້ວາ, ເຊື່ອມຊຶມໃຫ້ມີຄວາມໜັກແໜ້ນ ແລະ ມີຄວາມເປັນເອກະພາບເພື່ອກ້າວເຂົ້າສູ່ການເປີດກອງປະຊຸມໃຫຍ່ ຄັ້ງທີ I ຂອງຄະນະບໍລິຫານງານ ສຄອ ແຂວງໃຫ້ມີຜົນສໍາເລັດ.

ໃນກອງປະຊຸມ, ໄດ້ຜ່ານຮ່າງບົດສະຫລຸບການເຄື່ອນໄຫວວຽກງານຂອງ ຄະນະບໍລິຫານງານ ສຄອ ແຂວງ ຕະຫລອດໄລຍະ 8 ປີຜ່ານມາ ແລະທິດທາງແຜນການໃນຕໍ່ໜ້າ ແລະ ຜ່ານມາດຖານ ແລະເງື່ອນໄຂຜູ້ສະໝັກຄະນະບໍລິຫານງານ ສຄອ ແຂວງ ຊອກໃຫ້ໄດ້ຜູ້ທີ່ມີຄວາມຮູ້ຄວາມສາມາດ ແລະປະສົບການໃນການຄຸ້ມຄອງບໍລິຫານ ເພື່ອສືບຕໍ່ນໍາພາ-ຊີ້ນໍາວຽກງານ ສຄອ ແຂວງເຊກອງ ໃຫ້ມີປະສິດທິພາບ, ປະສິດທິຜົນ ແລະເຕີບໃຫຍ່ເຂັ້ມແຂງຂຶ້ນເລື້ອຍໆ.
ຂ່າວ-ພາບ: ສັນຍາ

• 23/08/2022