ແຂວງໄຊສົມບູນ ແລະແຂວງເຊີນລາ

ສືບຕໍ່ຮ່ວມມື ໄລຍະປີ 2022-2024 ກອງປະຊຸມພົບປະຄະນະຜູ້ແທນຂັ້ນສູງ ແລະພິທີລົງນາມບົດບັນທຶກຊ່ວຍຈຳການຮ່ວມມື ໄລຍະປີ 2022-2024 ລະຫວ່າງ ແຂວງໄຊສົມບູນ ສປປ ລາວ ແລະຄະນະຜູ້ແທນຂັ້ນສູງ ແຂວງເຊີນລາ ສສ ຫວຽດນາມ ຈັດຂຶ້ນໃນວັນທີ 20 ສິງຫາຜ່ານມາ, ນຳໂດຍທ່ານ ພອຍຄຳ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ທ່ານ ລໍ່ ມິງ ຮຸ່ງ ຮອງເລຂາພັກແຂວງ, ຜູ້ປະຈໍາການພ້ອມດ້ວຍຄະນະເຂົ້າຮ່ວມ.

ໂອກາດນີ້, ທ່ານ ພອຍຄໍາ ຮຸ່ງບຸນຍວງ ໄດ້ລາຍງານສະພາບການພັດທະນາຮອບດ້ານຂອງແຂວງໄຊສົມບູນ ໂດຍສະເພາະການພັດທະນາເສດຖະກິດຂອງແຂວງ ໄດ້ຂະ ຫຍາຍຕົວຢ່າງຕໍ່ເນື່ອງ, ໝັ້ນທ່ຽງຕາມທິດຫັນເປັນອຸດສາຫະກຳທັນສະໄໝສະເລ່ຍບໍ່ຫລຸດ 7% ຕໍ່ປີ, ສະເພາະປີ 2021 ຂະຫຍາຍຕົວໃນລະດັບ 7,6% ລວມຍອດຜະລິດຕະພັນພາຍໃນ(GDP) ບັນລຸໄດ້ 1.336,54 ຕື້ກີບ, ສະເລ່ຍຕໍ່ຫົວຄົນ 13 ລ້ານກວ່າກີບ/ຄົນ/ປີ, ມີໂຄງການລົງທຶນຂອງເອກະຊົນທີ່ໄດ້ຮັບອະນຸຍາດ ມີທັງໝົດ 49 ໂຄງການ, ມີໂຄງການຊ່ວຍເຫລືອຈາກລັດຖະບານ ສສ ຫວຽດນາມ 6 ໂຄງການ. ນອກຈາກນີ້, ກໍໄດ້ສຸມໃສ່ແກ້ໄຂຄວາມທຸກຍາກ, ປັດຈຸບັນຍັງເຫລືອຄອບຄົວທຸກຍາກທັງໝົດ 3.100 ກວ່າຄອບຄົວ.

ພ້ອມນີ້, ຍັງໄດ້ຜ່ານຮ່າງບົດບັນທຶກການຮ່ວມມືຂອງສອງແຂວງລະຫວ່າງ ແຂວງໄຊສົມບູນ ແລະແຂວງເຊິນລາ ໄລຍະແຕ່ປີ 2022-2024 ໂດຍຈະໄດ້ຮ່ວມມືກັນໃນວຽກ ງານດ້ານການເມືອງ, ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານເສດຖະ ກິດ, ຂົງເຂດກະສິກໍາ, ປ່າໄມ້ ແລະການປະມົງ, ດ້ານການຄ້າ, ການຊ່ວຍເຫລືອກໍ່ສ້າງພື້ນຖານໂຄງລ່າງ, ດ້ານວັດທະນະທຳ-ສັງຄົມ ຂົງເຂດການສຶກສາ, ຂົງເຂດຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະດ້ານສາທາລະນະສຸກ, ພ້ອມນີ້ທັງສອງຝ່າຍຍັງໄດ້ເປັນເອກະພາບແລກປ່ຽນຄະນະຜູ້ແທນຂັ້ນສູງລະຫວ່າງສອງແຂວງຢ້ຽມຢາມ ແລະເຮັດວຽກງ 2 ປີຕໍ່ຄັ້ງ.

ຈາກນັ້ນ, ທັງສອງແຂວງກໍໄດ້ລົງນາມໃນບົດບັນທຶກການຮ່ວມມືຢ່າງເປັນທາງການລະຫວ່າງທ່ານ ສຸກສະຫວາດ ວົງພູມເຫລັກ ຮອງເຈົ້າແຂວງໄຊສົມບູນ ແລະທ່ານ ດັ້ງ ຫງອກ ເຮົ້າ ຮອງປະທານຄະນະກຳມະການປະຊາຊົນແຂວງເຊິນລາໂດຍມີຄະນະຜູ້ແທນທັງສອງແຂວງເຂົ້າຮ່ວມເປັນສັກຂີພິຍານ.

แชร์