ອຄ ເສີມຍຸດທະສາດພັດທະນາສິນຄ້າໂອດັອບໃຫ້ 10 ແຂວງ

   ວັນທີ 26 ມີນາ 2019 ທີ່ພະແນກອຸດສາຫະກໍາ ແລະການຄ້າ ແຂວງຫຼວງພະບາງ ໄດ້ຈັດກອງປະຊຸມວິຊາການກະກຽມຍຸດທະສາດພັດທະນາສິນຄ້າ 1 ເມືອງ 1 ຜະລິດຕະພັນແຫ່ງຊາດ ແລະສິນຄ້າແຮງງານໂດຍການເປັນປະທານຂອງທ່ານ ພັນທອງ ທິດພຸມມາ ຮອງລັດຖະມົນຕີກະຊວງອຸດສາຫະກໍາ ແລະການຄ້າ, ມີຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ, ຕາງໜ້າພະແນກອຸດສາຫະກໍາ ແລະ ການຄ້າ 10 ແຂວງພາກກາງ-ພາກເໜືອຄື: ນະຄອນຫຼວງວຽງຈັນ, ແຂວງວຽງຈັນ, ຫຼວງພະບາງ, ໄຊຍະບູລີ, ອຸດົມໄຊ, ຫົວພັນ, ຊຽງຂວາງ, ຜົ້ງສາລີ, ຫຼວງນໍ້າທາ ແລະແຂວງບໍ່ແກ້ວ ແລະພະນັກງານວິຊາການພ້ອມດ້ວຍນັກທຸລະກິດທີ່ໄດ້ນໍາເອົາຜະລິດຕະພັນພື້ນເມືອງທີ່ເປັນເອກະລັກຂອງແຂວງ-ເມືອງເຂົ້າຮ່ວມ.

  ທ່ານ ໄຊສົມເພັດ ນໍຣະສິງ ຫົວໜ້າກົມສົ່ງເສີມການຄ້າກະຊວງອຸດສາຫະກໍາ ແລະການຄ້າໄດ້ກ່າວວ່າ: ການຈັດກອງປະຊຸມຂື້ນຄັ້ງນີ້ ເພື່ອເປັນການກະກຽມວຽກງານກ່ຽວກັບການພັດທະນາ ແລະ ຮອງຮັບສິນຄ້າໂອດັອບ (ODOP ), ເພື່ອໃຫ້ສາມາດ ຮອງຮັບມາດຕະຖານ ແລະກາໝາຍທາງການຄ້າໃນ 1 ເມືອງ 1 ຜະລິດຕະພັນແຫ່ງຊາດລາວ,ການປະເມີນຜົນການຈັດຕັ້ງປະຕິບັດການຄຸ້ມຄອງສິນຄ້າ ແລະການຜະລິດເປັນສິນຄ້າໄລຍະຜ່ານມາ ແລະສິນຄ້າແຮງງານ, ນອກນີ້ຍັງໄດ້ທົບທວນຄືນບັນດານິຕິກໍາຕິດຕາມທີ່ໃກ້ຄຽງ ແລະ ສາມາດຊຸກຍູ້ສົ່ງເສີມຜະລິດຕະພັນເປັນສິນຄ້າ, ພ້ອມນັ້ນກໍເປັນເອກະພາບກັນເພື່ອຍົກລະດັບສິນຄ້າຕາມຍຸດທະສາດການພັດທະນາສິນຄ້າໃຫ້ເປັນສິນຄ້າ 1 ເມືອງ 1 ຜະລິດຕະພັນ ແຫ່ງຊາດ ຫຼື ODOP.

  ທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກໍາ ແລະການຄ້າກ່າວຕື່ມວ່າ: ສິນຄ້າ ODOP ໃນໄລຍະຜ່ານມາແມ່ນໄດ້ປັບປຸງເຮັດໃຫ້ສິນ ຄ້າໄດ້ອອກສູ່ສັງຄົມ, ສູ່ຕະຫຼາດທັງພາຍໃນ ແລະຕ່າງປະເທດຢ່າງກວ້າງຂວາງນັບມື້ນັບຫຼາຍຂື້ນ,ເພາະວ່າສິນຄ້າດັ່ງກ່າວແມ່ນພູມປັນຍາຂອງຄົນລາວ, ຂອງຊາວຜູ້ທີ່ເຮັດທຸລະກິດແບບທ້ອງຖິ່ນ,ດັ່ງນັ້ນສິນຄ້າດັ່ງກ່າວຖ້າເຮັດໄດ້ ດີຈະເປັນການຊຸກຍູ້ສົ່ງເສີມລາຍຮັບໃຫ້ປະຊາຊົນ ແລະກ້າວໄປສູ່ຄອບຄົວພັດທະນາ. ໃນປະຈຸບັນ ການຕີລາຄາຜະລິດຕະພັນ 1 ເມືອງ 1 ຜະລິດຕະພັນ ແມ່ນປະສົບຜົນສໍາ ເລັດໄດ້ໃນລະດັບໜຶ່ງທີ່ເປັນໜ້າ ເພີ່ງພໍໃຈ, ສະແດງໃຫ້ເຫັນວ່າມີສິນຄ້າອອກສູ່ທ້ອງຕະຫຼາດ,ສູ່ສັງຄົມຫຼາຍຊະນິດ,ພ້ອມກັນນີ້ຈະຕ້ອງໄດ້ເອົາໃຈໃສ່ປັບປຸງຕື່ມໃນຫຼາຍບັນຫາເປັນຕົ້ນແມ່ນຄຸນນະພາບໃຫ້ດີຂື້ນກວ່າເກົ່າ,ກາ ນຫຸ້ມຫໍ່ຕ້ອງໃຫ້ຖືກໃຈຜູ້ທີ່ຈະໃຊ້ ຫຼື ຄວາມຕ້ອງການຂອງຕະຫຼາດທັງ ພາຍໃນ ແລະຕ່າງປະເທດ, ໃນຕໍ່ໜ້າຍັງຈະໄດ້ເບິ່ງທາງດ້ານນິຕິກໍາ, ການຄຸ້ມຄອງ, ຈໍາໜ່າຍ, ການຈໍ ລະຈອນເຄື່ອນຍ້າຍລະຫວ່າງບັນ ດາແຂວງ ແລະຕ່າງປະເທດ, ລວມເຖິງການຄຸ້ມຄອງຜູ້ປະກອບການ.

ສໍາລັບກອງປະຊຸມຄັ້ງນີ້ແມ່ນໄດ້ເນັ້ນໃສ່ຍຸດທະສາດການພັດທະນາສິນຄ້າ ODOP, ບໍ່ວ່າຈະເປັນດ້ານນິຕິກໍາກໍໃຫ້ຮັດກຸມກວ່າເກົ່າພ້ອມທັງແລກປ່ຽນບົດຮຽນກັບຜູ້ປະກອບການອັນໃດເຮັດໄດ້ ແລະອັນໃດທີ່ຍັງຄົງຄ້າງເພື່ອສືບຕໍ່ປັບປຸງໃຫ້ດີຂື້ນຈົນກ້າວໄປເຖິງຜະລິດຕະພັນຂອງ 1 ເມືອງ 1 ຜະລິດຕະພັນໃຫ້ໄດ້ຂາຍອອກຫຼາຍໆ.

ໂດຍ: ເພັດສາຄອນ ສິມມະວົງ 

แชร์