ຖວທ ຄໍາມ່ວນ ແລະ ສະຖານີວິທະຍຸ ໂທລະພາບ ແຂວງກວາງບິ່ງ ສືບຕໍ່ການຮ່ວມມື

ພິທີພົບປະ ແລະ ເຊັນບົດບັນທຶກສືບຕໍ່ການຮ່ວມມື ລະຫວ່າງ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຄໍາມ່ວນ ສປປ ລາວ ແລະ ສະຖານີວິທະຍຸກະຈາຍສຽງ-ໂທລະພາບ ແຂວງກວາງບິ່ງ ສສ ຫວຽດນາມ ໄດ້ຈັດຂຶ້ນໃນທ້າຍອາທິດຜ່ານມານີ້ ທີ່ນະຄອນດົງເຫີຍ ແຂວງກວາງບິ່ງ. ຝ່າຍແຂວງຄຳມ່ວນ ນໍາໂດຍ ສະຫາຍ ໄຊສົມບູນ ສຸວັນດາລາ ຫົວໜ້າພະແນກ ຖວທ ແຂວງຄໍາມ່ວນ, ຝ່າຍແຂວງກວາງບິ່ງ ນໍາໂດຍ ສະຫາຍ ຮວ່າງ ຫວຽດຮຸ່ງ ຫົວໜ້າສະຖານີວິທະຍຸກະຈາຍສຽງ ແລະ ໂທລະພາບ ແຂວງກວາງບິ່ງ ພ້ອມດ້ວຍຄະນະນໍາ, ບັນດາຂະແໜງການ,  ໜ່ວຍງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ໃນກອງປະຊຸມ, ສະຫາຍ ຮວ່າງ ຫວຽດຮຸ່ງ ໄດ້ສະແດງຄວາມຕ້ອນຮັບຄະນະຜູ້ແທນ ພະແນກ ຖວທ ແຂວງຄໍາມ່ວນ ໃນການເດີນທາງມາຢ້ຽມຢາມ ແລະ ແລກປ່ຽນບົດຮຽນ ຮ່ວມກັບ ສະຖານີວິທະຍຸກະຈາຍສຽງ ແລະ ໂທລະພາບແຂວງກວາງບິ່ງ ຊຶ່ງທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາຂອງຂະ                ແໜງການ ວິທະຍຸກະຈາຍສຽງ, ໂທລະພາບ, ຜົນການຮ່ວມມືໃນບາງຂົງເຂດວຽກງານໃນໄລຍະຜ່ານມາ ແລະ ຕົກລົງເນື້ອໃນການຮ່ວມມືທີ່ສຳຄັນໃນຕໍ່ໜ້າຄື: ສອງຝ່າຍໄດ້ເພີ່ມທະວີການຮ່ວມມມືໃນຂົງເຂດວິທະຍຸກະຈາຍສຽງ, ໂທລະພາບ, ແລກປ່ຽນລາຍການຮ່ວມກັນ,  ພ້ອມກັນສະເໜີລັກສະນະພິເສດ, ຈຸດເດັ່ນທາງດ້ານວັດທະນະທໍາ - ສັງຄົມ ຂອງແຕ່ລະແຂວງ ໃຫ້ກັນຊາບ ເພື່ອພັດທະນາຕາຂ່າຍສັນຍານຄື້ນວິທະຍຸກະຈາຍສຽງ, ໂທລະພາບຂອງແຕ່ລະແຂວງ, ປະກອບສ່ວນເພີ່ມທະວີສາຍພົວພັນມິດຕະພາບ ແລະ ການຮ່ວມມື ດ້ານການເມືອງ, ວັດທະນະທໍາ - ສັງຄົມ ລະຫວ່າງ ແຂວງຄໍາມ່ວນ - ແຂວງກວາງບິ່ງ.

 ສອງຝ່າຍສືບຕໍ່ຮ່ວມມືໃຫ້ການຊ່ວຍເຫືອຊຶ່ງກັນ ແລະ ກັນ ດ້ານວິຊາການ ທີ່ຂຶ້ນກັບຂົງເຂດ ວິທະຍຸກະຈາຍສຽງ ແລະ ໂທລະພາບ ທີ່ສອງຝ່າຍມີທ່າແຮງ ແລະ  ເຫັນດີເປັນເອກະພາບ ໃນການແລກປ່ຽນພົວພັນຂໍ້ມູນຂ່າວສານ ຂອງຄະນະຜູ້ແທນ ເພື່ອເດີນທາງໄປຢ້ຽມຢາມ ແລະ ເຮັດວຽກນໍາກັນ 2 ປີ/ຄັ້ງ ແນໃສ່ປຶກສາຫາລືທິດທາງໃນການຮ່ວມມື (ໃນກໍລະນີມີຄວາມຈໍາເປັນ, ສອງຝ່າຍອາດຈະແຕ່ງຕັ້ງຄະນະຜູ້ແທນເດີນທາງໄປມາເພື່ອເຮັດວຽກ ແລະ ແກ້ໄຂບັນຫາຕ່າງໆ ທີ່ສອງຝ່າຍໄດ້ໃຫ້ຄວາມສຳຄັນ).

ເພື່ອເປັນການສືບຕໍ່ຮ່ວມມືໃນຕໍ່ໜ້າ, ທັງສອງຝ່າຍໄດ້ເຫັນດີເປັນເອກະພາບກັນລົງນາມເຊັນບົດບັນທຶກການຮ່ວມມື ເປັນກຽດລົງນາມເຊັນບົດບັນທຶກໃນຄັ້ງນີ້ໂດຍ ສະຫາຍ ໄຊສົມບູນ ສຸວັນດາລາ ແລະ ສະຫາຍ ຮວ່າງ ຫວຽດຮຸ່ງ.   ໃນໂອກາດນີ້, ຄະນະຜູ້ແທນພະແນກ ຖວທ ແຂວງຄໍາມ່ວນ ຍັງໄດ້ຢ້ຽມຊົມຫ້ອງການສະຖານີວິທະຍຸກະຈາຍສຽງ ແລະ ໂທລະພາບ ແຂວງກວາງບິ່ງ, ຫໍປະທານ ໂຮຈິມິນ ແລະ ອະນຸສາວະລີແມ່ສວດ ຊຶ່ງແມ່ນວິລະບູລຸດສຳຄັນທາງປະຫວັດສາດຂອງນະຄອນດົງເຫີຍ ແຂວງກວາງບິ່ງ.

(ຂ່າວ-ພາບ: ມະນີວັນ)

• 22/08/2022