ກອງປະຊຸມຄວາມໝັ້ນຄົງສາກົນມົດສະກູ ຄັ້ງທີ x

ທ່ານ​ ພົນເອກ ຈັນສະມອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ສຳເລັດ​ການ​ເຂົ້າຮ່ວມກອງປະຊຸມຄວາມໝັ້ນຄົງສາກົນມົດສະກູ ຄັ້ງທີ x ທີ່ນະຄອນຫຼວງ ມົດສະກູ, ສະຫະພັນຣັດເຊຍ ໃນວັນທີ 16 ສິງຫາ 2022 ທີ່ຜ່ານມາ​ນີ້.

ໃນກອງປະຊຸມທ່ານ ວາຣາດີເມຍ ປູຕິນ ປະທານາທິບໍດີ ແຫ່ງ ສະຫະພັນຣັດເຊຍ ໄດ້ກ່າວປາໃສເປີດກອງປະຊຸມ (ຜ່ານວີດີໂອທາງໄກ)​ ບາງຕອນວ່າ: ກອງປະຊຸມຄວາມໝັ້ນຄົງມົດສະກູເປັນກອງປະຊຸມເພື່ອເປີດໂອກາດໃຫ້ຜູ້ເຂົ້າຮ່ວມ ໄດ້ແລກປ່ຽນຄວາມຄິດ-ຄວາມເຫັນ ກ່ຽວກັບບັນຫາຄວາມໝັ້ນຄົງໃນປະຈຸບັນ ແລະ ເປັນການປຶກສາຫາລື ກ່ຽວກັບການຮ່ວມມືວຽກງານທາງດ້ານການທະຫານ ເພື່ອຮັບປະກັນທາງດ້ານຄວາມໝັ້ນຄົງຂອງພາກພື້ນ ແລະ ສາກົນ ບົນພື້ນຖານການເຄົາລົບເຊິ່ງກັນ ແລະ ກັນ, ຕ່າງຝ່າຍ-ຕ່າງມີຜົນປະ ໂຫຍດ.

ໂອກາດດຽວກັນ, ທ່ານ ພົນເອກ ເຊີເກ ໂຊຍກູ ລັດຖະມົນຕີກະຊວງປ້ອງກັນປະເທດ ແຫ່ງ ສະຫະພັນຣັດເຊຍ ກໍ່ໄດ້ກ່າວສະແດງຄວາມຊົມເຊີຍ ແລະຕີລາຄາສູງຕໍ່ບັນດາທ່ານລັດຖະມົນຕີປ້ອງກັນປະເທດຕ່າງໆ ທີ່ໄດ້ເດີນທາງມາຮ່ວມກອງປະຊຸມຄັ້ງນີ້,​ ເພາະ​ວ່າ​ສະພາບຄວາມໝັ້ນຄົງທີ່ກໍາລັງເກີດຂຶ້ນຢູ່ໃນຫຼາຍຂົງເຂດໃນທົ່ວໂລກ ເຊິ່ງເປັນສິ່ງທ້າທ້າຍຕໍ່ຄວາມໝັ້ນຄົງຂອງພາກພື້ນ ແລະ ໃນໂລກ. ຕໍ່ສະພາບການດັ່ງກ່າວມັນໄດ້ຮຽກຮ້ອງໃຫ້ບັນດາປະເທດຈົ່ງຮ່ວມມືກັນແກ້ໄຂເພື່ອສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງ.

ໂອກາດ​ເຂົ້າຮ່ວມ​ກອງປະຊຸມ​ຄັ້ງ​ນີ້,​ ສະຫາຍ​ ພົນເອກ ຈັນສະໝອນ ຈັນຍາລາດ,ກໍໄດ້ປະກອບຄໍາເຫັນຕໍ່ກອງປະຊຸມໃນຫົວຂໍ້: ທິດທາງຂອງຄວາມໝັ້ນຄົງໃນພາກພື້ນອາຊີ-ປາຊີຟິກ ຊຶ່ງສະຫາຍໄດ້ເນັ້ນເຖິງຄວາມສໍາຄັນຂອງ ການຮ່ວມມືຫຼາຍຝ່າຍ ທີ່​ເປັນປັດໃຈພື້ນຖານສໍາຄັນເຮັດໃຫ້ບັນດາປະເທດ ສາມາດກ້າວໄປຂ້າງດ້ວຍກັນ ເພື່ອສາມາດຮັບມືກັບບັນດາສິ່ງທ້າທາຍທາງດ້ານຄວາມໝັ້ນຄົງທີ່ສະຫຼັບຊັບຊ້ອນ, ທັງ ເປັນການສ້າງສະພາບແວດລ້ອມທີ່ເອື້ອອໍານວຍ ໃຫ້ແກ່ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮູ່ງເຮືອງຂອງພາກພື້ນ ແລະ ໃນໂລກ.

ຂ່າວ, ພາບ ຊາຍສົມສັກ ວິໄລສັນ

• 22/08/2022