ຊາວນະຄອນຫຼວງພະບາງຮ່ວມແຮງ ຮ່ວມໃຈກັນຕ້ານໄຂ້ຍຸງລາຍ

ເມື່ອວັນທີ 20 ສິງຫາ 2022 ທີ່ລາດແລງ-ຊົນເຜົ່າ ບ້ານປ່າຂາມ ນະຄອນ ຫຼວງພະບາງ ໄດ້ມີພິທີເປີດການນຳພາລົງສ້າງຂະບວນການທຳລາຍແຫຼ່ງເພາະພັນໜອນນໍ້າຍຸງລາຍຢູ່ນະຄອນຫຼວງພະບາງ,ພາຍໃຕ້ການປະຕິບັດ 5 ປໍຄື: 1. ປິດພາສະນະ ທີ່ຂັງນໍ້າໃນເຮືອນ ບໍ່ໃຫ້ໜອນນໍ້າຍຸງລາຍມາໄຂ່ໃສ່,2. ປ່ຽນນໍ້າ ແລະຜັດຖູດ້າມພາສະນະ,3. ປ່ອຍປາຫາງນົກຍຸງໃຫ້ກິນໜອນນໍ້າຍຸງລາຍ,4. ປ່ຽນນໍ້າບໍ່ໃຫ້ມີນໍ້າຂັງຢູ່ກະໂປະກະປ່ອງຕາມເດີນບ້ານ ແລະອື່ນໆ,5. ປະຕິບັດໃຫ້ເປັນນິໄສ ( ເປັນໄຂ້ຕ້ອງໄປກວດຢູ່ໂຮງໝໍ ຫຼືສຸກສາລາຢູ່ໃກ້ບ້ານຂອງທ່ານ ).

ການສ້າງຂະບວນການຄັ້ງນີ້ໂດຍ ແມ່ນພະແນກສາທາລະນະສຸກແຂວງຫຼວງພະບາງ ເປັນຜູ້ຈັດຕັັ້ງປະຕິບັດ,ມີບັນດາຕາງໜ້າພະແນກການ,ອົງການຈັດຕັ້ງຕ່າງໆ,ຫ້ອງການ, ຂະແໜງການ, ອົງການຈັດຕັ້ງ 69 ບ້ານພາຍ ໃນນະຄອນຫຼວງພະບາງ ເຂົ້າຮ່ວມຢ່າງເປັນຂະບວນຟົດຟື້ນ.

ໂອກາດນີ້, ທ່ານ ນາງ ຄໍາພູ ຈັນທະວົງ ຮອງຫົວໜ້າພະແນກສາທາລະນະສຸກແຂວງ ກ່າວເປີດຂະບວນການຄັ້ງນີ້ວ່າ: ດັ່ງທີ່ພວກເຮົາໄດ້ຮັບຮູ້ນຳກັນແລ້ວວ່າ ໄຂ້ຍຸງລາຍເປັນພະຍາດໜຶ່ງ ທີ່ມີຈຳນວນ ເຈັບ ແລະເສຍຊີວິດ ເປັນຈໍານວນຫຼວງຫຼາຍ ໃນແຕ່ລະປີ, ຊຶ່ງທີ່ເປັນພາລະແບກຫາບ ຂອງ ລັດຖະບານກໍ່ຄືຂອງປະຊາຊົນ ທຸກຊັ້ນຄົນໃນສັງຄົມ. ຖ້າມີການລະບາດເກີດຂຶ້ນຫາກບໍ່ມີວິທີການສະກັດກັ້ນ ແລະຕອບໂຕ້ທັນເວລາຈະພາໃຫ້ເກີດການແຜ່ລາມໄປເປັນວົງກວ້າງ, ຊຶ່ງ ສົ່ງຜົນ ກະທົບຢ່າງໃຫຍ່ຫຼວງຕໍ່ການພັດທະນາເສດຖະກິດສັງຄົມ ກໍ່ຄຶຊີວິດການເປັນຢູ່ຂອງປະຊາຊົນ. ດັ່ງນັ້ນເພື່ອເປັນການສ້າງຄວາມເຂົ້າໃຈເປັນເອກະພາບ ແລະ ສືບຕໍ່ຈັດຕັ້ງປະຕິບັດການປ້ອງກັນພະຍາດໄຂ້ຍຸງລາຍ, ໂດຍການສຸມໃສ່ ການທຳລາຍແຫຼ່ງເພາະພັນໜອນນໍ້າຍຸງລາຍ ໂດຍການມີສ່ວນຮ່ວມເປັນເຈົ້າການ ຂອງຊຸມຊົນ,ພະແນກການ ຕະຫຼອດຮອດຜູ້ປະກອບການທຸລະກິດຕ່າງໆ ແລະພາກສ່ວນອື່ນໆ ໃນສັງຄົມ ໂດຍການປະຕິບັດວຽກງານ 5 ປໍ ໃຫ້ເປັນປົກກະຕິ, ສະນັ້ນ ຈິ່ງໄດ້ຈັດຂະບວນການນຳພາລົງສ້າງຂະບວນການທຳລາຍແຫຼ່ງເພາະພັນໜອນນໍ້າຍຸງລາຍ 1. ເພື່ອທຳລາຍແຫຼ່ງເພາະພັນຂອງໜອນນໍ້າຍຸງລາຍ ໂດຍການມີສ່ວນຮ່ວມເປັນເຈົ້າການຂອງຊຸມຊົນ. 2. ເພື່ອສະກັດກັ້ນ ແລະ ຕອບໂຕ້ການແຜ່ລະບາດຂອງພະຍາດໄຂ້ຍຸງລາຍ; 3. ເພື່ອຫຼຸດຜ່ອນການເຈັບເປັນ ແລະ ການຕາຍຍ້ອນພະຍາດໄຂ້ຍຸງລາຍ. 4. ເພື່ອເປັນຕົວແບບໃຫ້ແກ່ບັນດາບ້ານ ທີ່ມີກໍລະນີໄຂ້ຍຸງລາຍສູງ ນຳໄປຈັດຕັ້ງຜັນຂະຫຍາຍມາດຕະການປ້ອງກັນ ແລະ ຄວບຄຸມພະຍາດໄຂ້ຍຸງລາຍບໍ່ໃຫ້ມີການລະບາດໃຫຍ່.

ຈາກນັ້ນ ຜູ້ເຂົ້າຮ່ວມທັງໝົດ ກໍໄດ້ພ້ອມກັນຍ່າງ ແລະຈັບປ້າຍ ຊາວນະຄອນ ຫຼວງພະບາງ ຮ່ວມໃຈກັນຕ້ານພະຍາດໄຂ້ຍຸງລາຍ ເພື່ອເປັນການເປີດຂະບວນການ ຢ່າງເປັນທາງການ ໄປຕາມເສັ້ນທາງກາງເມືອງ ທັງເປັນການປຸກລະດົມ ໃຫ້ປະຊາຊົນ ຮູ້ຮັບ ແລະຮ່ວມກັນຕ້ານພະຍາດໄຂ້ຍຸງລາຍ ໂດຍການປະຕິບັດ 5 ປໍ ທີ່ໄດ້ກ່າວມາຂ້າງເທິງ.

ຂ່າວ: ເພັດສາຄອນ ສິມມະວົງ

 

แชร์