ໄຊຍະບູລີ ເຊັນສັນຍາໂຄງການບູລະນະຮັກສາຟື້ນຟູເສັ້ນທາງ 2 ສັນຍາ

ພິທີເຊັນສັນຍາໂຄງການບູລະນະຮັກສາຟື້ນຟູເສັ້ນທາງແບບເປັນກໍານົດພາຍໃຕ້ໂຄງການຂະແໜງຂົວທາງລາວ ໄລຍະ 2 ລະຫວ່າງພະແນກໂຍທາທິການ ແລະຂົນສົ່ງ (ຍທຂ) ແຂວງໄຊຍະບູລີ ເຈົ້າຂອງໂຄງການ ແລະບໍລິສັດ ວາດສະໜາພັດທະນາກໍ່ສ້າງ ຈໍາກັດ ເປັນຜູ້ຮັບເໝົາ ໄດ້ຈັດຂຶ້ນເມື່ອບໍ່ດົນມານີ້ທີ່ແຂວງດັ່ງກ່າວໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ຄໍາເພັດ ພົມມະລາດ ຫົວໜ້າພະແນກ ຍທຂ, ມີບັນດາຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍພະນັກງານວິຊາການຂອງພະແນກ ແລະບໍລິສັດຮັບເໝົາເຂົ້າຮ່ວມ.

ໃນພິທີ, ທ່ານ ສຸພາບ ແສງກັນນາລີ ຫົວໜ້າໂຄງການ LRSP2 ຮອງຂະແໜງຂົວທາງໄດ້ຂຶ້ນຜ່ານການຈັດຕັ້ງປະຕິບັດຂອງໂຄງການຂະແໜງຂົວທາງລາວໄລຍະ 2 ຫຼື LRSP2 ຊຶ່ງເປັນໂຄງການທີ່ໄດ້ຮັບທຶນກູ້ຢືມຈາກທະນາຄານໂລກ (IDA), ທະນາຄານແຫ່ງການລົງທຶນເອີຣົບ (EIB), ສະຫະພາບເອີຣົບ (EU) ຊຶ່ງແຂວງໄຊຍະບູລີ ໄດ້ຮັບການຊ່ວຍເຫຼືອໃນການຈັດຕັ້ງປະຕິບັດຜ່ານມາໄດ້ 2 ໄລຍະແລ້ວຄື: ໂຄງການໄລຍະ 1 ແລະໄລຍະ 2 ຊຶ່ງມີ 7 ໂຄງການ. ສັນຍາໃນນີ້, ມີວຽກສ້ອມແປງ ແລະ ຟື້ນຟູບາງຈຸດ (NCB) ມີ 5 ສັນຍາ ແລະ ວຽກສ້ອມແປງປົກກະຕິແບບມອບເໝົາ 3 ປີ (PBC) ມີ 2 ສັນຍາ. ສ່ວນໂຄງການສ້ອມແປງ ແລະ ຟື້ນຟູບາງຈຸດ (NCB) ປີທີ 3 ມີຈໍານວນ 2 ໂຄງການຄື: ສັນຍາ CW-XAY-NCB-05 ໂຄງການສ້ອມແປງຟື້ນຟູເສັ້ນທາງນໍາເບີ 3634 ແຕ່ບ້ານດອນມູນ - ບ້ານຫ້ວຍເງິນ ລວງຍາວທັງໝົດ 15,7 ກມ, ກວ້າງ 5 ແມັດ,ຢູ່ເມືອງຄອບ ຊຶ່ງເສັ້ນທາງດັ່ງກ່າວ ແມ່ນຜ່ານ 7 ບ້ານ (ມີ 1 ບ້ານທີ່ນອນຢູ່ໃນທາງຊອຍຄືບ້ານນໍ້າໂຕ່ມ), ລວງຍາວທີ່ມີຄວາມສ່ຽງຕໍ່ການປ່ຽນແປງຂອງສະພາບດິນຟ້າອາກາດ (ຈຸດຄ້ອຍຕ່ຳເກີດມີຄວາມສ່ຽງນໍ້າຖ້ວມ) 1,48 ກມ, ລວງຍາວທີ່ຕ້ອງການປູຢາງ 4,42 ກມ, ລວງຍາວທີ່ຕ້ອງການສ້ອມແປງຟື້ນຟູທົ່ວໄປ 8,8 ກມ, ມີມູນຄ່າ 7.916.401.190 ກີບ. ສັນຍາ CW-XAY-NCB-06 ໂຄງການສ້ອມແປງ/ຟື້ນຟູເສັ້ນທາງນໍ້າເບີ 3609 ແຕ່ ໄລຍະ ບ້ານນໍ້າປຸຍ - ບ້ານນໍ້າຊອງ ເມືອງພຽງ ມີລວງຍາວ 10,4 ກມ, ກວ້າງ 5 ແມັດ, ຜ່ານ 2 ບ້ານ, ມີລວງຍາວທີ່ມີຄວາມສ່ຽງຕໍ່ການປ່ຽນແປງຂອງສະພາບດິນຟ້າອາກາດ (ຈຸດຄ້ອຍຕໍ່າເກີດມີຄວາມສ່ຽງນ້ຳຖ້ວມ) 3,5 ກມ, ລວງຍາວທີ່ຕ້ອງການປູຢາງ 4 ກມ, ລວງຍາວທີ່ຕ້ອງການສ້ອມແປງຟື້ນຟູທົ່ວໄປ 2,9 ກມ, ມີມູນຄ່າ 5.507.427.349 ກີບ. ທັງໝົດແມ່ນບັນດາສັນຍາທີ່ນອນໃນໂຄງການຂະແໜງຂົວທາງລາວ ໄລຍະ 2 (LRSP 2) ຊຶ່ງໄດ້ຮັບການຈັດຕັ້ງປະຕິບັດຜ່ານມາຮອດປັດຈຸບັນ ແລະ ໂຄງການປີ 3 ໃນ 2 ໂຄງການຈະໄດ້ເລີ່ມປະຕິບັດໃນເດືອນກັນຍາ 2022 ແລະຈະໃຫ້ສໍາເລັດ ກໍານົດ 8 ເດືອນ ຕົ້ນປີ 2024.

ຈາກນັ້ນ, ທ່ານ ຄໍາເພັດ ພົມມະລາດ ໃນນາມເຈົ້າຂອງໂຄງການ ແລະທ່ານ ສີທອງ ລໍສະຫວັດ ຕາງໜ້າບໍລິສັດ ວາດສະໜາພັດທະນາກໍ່ສ້າງ ຈໍາກັດ ຜູ້ຮັບເໝົາກໍ່ສ້າງ ໄດ້ຮ່ວມກັນເຊັນບົດບັນທຶກໂດຍຊ່ອງໜ້າແຂກທີ່ເຂົ້າຮ່ວມ.
ຂ່າວ-ພາບ: ບຸນທີ

แชร์