ລົງນາມ ໂຄງການພັດທະນາລະບົບຖານຂໍ້ມູນ

ພິທີເຊັນບົດບັນທຶກຄວາມເຂົ້າໃຈກ່ຽວກັບການສຶກສາຄວາມເປັນໄປໄດ້ໂຄງການພັດທະນາລະບົບຖານຂໍ້ມູນ ສຳລັບການບໍລິການວຽກງານສື່ມວນຊົນລະຫວ່າງກະຊວງຖະແຫຼງຂ່າວ, ວັດທະນະທຳ, ແລະທ່ອງທ່ຽວ (ຖວທ) ແລະ ບໍລິສັດ ແອວ ຈີ ເອ ເອັສ ທີ່ປຶກສາດ້ານການຄ້າ ແລະການລົງທຶນ ໄດ້ຈັດຂຶ້ນໃນວັນທີ 18 ສິງຫາ ຜ່ານມານີ້ ທີ່ໂຮງແຮມລາວພລາຊາ, ຮ່ວມລົງນາມໃນຄັ້ງນີ້ລະຫວ່າງ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນກະຊວງ ຖວທ ແລະທ່ານ ຊິນນະກອນ ພົມມະສິດ ປະທານ ບໍລິສັດ ແອວ ຈີ ເອ ເອັສ ທີ່ປຶກສາດ້ານການຄ້າ ແລະການລົງທຶນ, ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງ ຖວທ, ມີພະນັກງານທັງສອງຝ່າຍເຂົ້າຮ່ວມ.

ການລົງນາມບົດບັນທຶກຄວາມເຂົ້າໃຈຄັ້ງນີ້ແມ່ນມີຄວາມໝາຍຄວາມສໍາຄັນຫຼາຍໂຄງການດັ່ງກ່າວແມ່ນຈະໃຊ້ເວລາໃນການສຶກສາພາຍໃນໄລຍະ 12 ເດືອນ ຊຶ່ງຈະໄດ້ລົງເລິກສຶກສາໂຄງການພັດທະນາລະບົບຖານຂໍ້ມູນ ສຳລັບການບໍລິການວຽກງານສື່ມວນຊົນ, ທາງ ບໍລິສັດ ແອວ ຈີ ເອ ເອັສ ທີ່ປຶກສາດ້ານການຄ້າ ແລະການລົງທຶນ ແມ່ນຈະນຳເອົາປະສົບການ, ວິຊາການ-ເຕັກນິກທັງພາຍໃນ ແລະຕ່າງປະເທດ ທີ່ຈະນຳເຂົ້າມາພັດທະນາລະບົບຖານຂໍ້ມູນໃຫ້ເປັນລະບົບ, ໄດ້ມາດຕະຖານ, ມີຄວາມປອດໄພ ແລະຍືນຍົງ ແລະໃນດ້ານເຕັກໂນໂລຊີຖານຂໍ້ມູນນັ້ນແມ່ນທາງ ບໍລິສັດ ແອວ ຈີ ເອ ເອັສ ທີ່ປຶກສາດ້ານການຄ້າ ແລະການລົງທຶນຈະນຳໃຊ້ອຸປະກອນ ແລະ ເຕັກໂນໂລຊີທີ່ທັນສະໄໝຈາກບໍລິສັດຊັ້ນນຳໃນການສຶກສາໂຄງການນີ້.

ກະຊວງ ຖວທ ແມ່ນມີຄວາມປາຖະໜາເພື່ອສົ່ງເສີມການພັດທະນາລະບົບຖານຂໍ້ມູນທັນສະໄໝຂອງກະຊວງ ຖວທ ໂດຍວຽກງານພັດທະນາລະບົບຖານຂໍ້ມູນສໍາລັບການບໍລິການວຽກງານສື່ມວນຊົນໃນຂອບເຂດທົ່ວປະເທດກໍແມ່ນໂຄງການໜຶ່ງທີ່ນອນຢູ່ໃນເປົ້າໝາຍຂອງກະຊວງເພື່ອເພີ່ມຄວາມສາມາດການຄຸ້ມຄອງວຽກງານສື່ມວນຊົນໃຫ້ມີຄວາມໂປ່ງໃສ, ທັນສະໄໝ, ວ່ອງໄວ ແລະມີຄວາມຍືນຍົງ, ເພີ່ມຄວາມສະດວກໃຫ້ຜູ້ປະກອບການໃນລະບົບປະຕູດຽວທີ່ສະດວກສະບາຍ ແລະເພີ່ມຊ່ອງທາງຂຸດຄົ້ນການເກັບລາຍຮັບໃໝ່ຂອງຂະແໜງສື່ມວນຊົນ.

• 19/08/2022