ຜູ້ນຳອິນໂດເນເຊຍ ຕ້ອງການໃຫ້ Tesla ສ້າງລົດຍົນໄຟຟ້າໃນປະເທດ ບໍ່ພຽງແຕ່ຜະລິດແບັດເຕີຣີ

ປະທານາທິບໍດີອິນໂດເນເຊຍຍິນດີໃຊ້ເວລາໃນການຊັກຊວນໃຫ້ ອີລອນ ມັສກ໌ ເຫັນວ່າປະເທດຂອງທ່ານບໍ່ໄດ້ມີພຽງແຕ່ຊັບພະຍາກອນທີ່ຈຳເປັນສຳລັບການຜະລິດແບັດເຕີຣີ.

ໃນການໃຫ້ສຳພາດຕໍ່ສຳນັກຂ່າວບລູມເບ໊ກ (Bloomberg) ໃນວັນທີ 18 ສິງຫາ 2022, ປະທານາທິບໍດີ ໂຈໂຄ ວິ ໂດໂດ ຂອງອິນໂດເນເຊຍ ຢືນຢັນວ່າ: ທ່ານຕ້ອງການໃຫ້ມີການສ້າງລົດຍົນໄຟຟ້າເທສລາ (Tesla) ໃນອິນໂດເນເຊຍ ບໍ່ພຽງແຕ່ແບັດເຕີຣີເທົ່ານັ້ນ.

ໂດຍການໃຫ້ສຳພາດຄັ້ງນີ້ເກີດຂຶ້ນຫຼັງຈາກໃນອາທິດກ່ອນມີການເປີດເຜີຍຈາກທາງການອິນໂດເນເຊຍວ່າ: ເທສລາໄດ້ເຊັນສັນຍາມູນຄ່າ 5 ພັນລ້ານໂດລາ ໃນການຈັດຊື້ນົກເກິລຈາກບໍລິສັດອິນໂດເນເຊຍໄປໃຊ້ໃນແບັດ ເຕຣີລຶທຽມຂອງເທສລາ.

ຖຶງຢ່າງໃດກໍຕາມ, ຫລ້າສຸດປະທານາທິບໍດີຂອງອິນໂດເນເຊຍເປີດເຜີຍວ່າ: ສັນຍາດັ່ງກ່າວຍັງຢູ່ໃນຂັ້ນຕອນການຫາລືທຸກຢ່າງລ້ວນຕ້ອງໃຊ້ເວລາທ່ານບໍ່ຢາກຈະຈັດການຢ່າງວ່ອງໄວແຕ່ບໍ່ໄດ້ຜົນຫຍັງມັນຕ້ອງໃຊ້ການສື່ສານຢ່າງເຂັ້ມຂຸ້ນ ແລະຜົນຈະສະແດງອອກມາເອງ.

ປັດຈຸບັນອິນໂດເນເຊຍເປັນປະເທດທີ່ມີແຮ່ນິກເກິລເກືອບ 1 ໃນ 4 ຂອງທົ່ວໂລກ ເຮັດໃຫ້ໄດ້ຮັບຄວາມສົນໃຈຈາກຜູ້ຜະລິດລົດຍົນ ແລະແບັດເຕີຣີ ໃນການຈັດຫາແຮ່ດັ່ງກ່າວເພື່ອຮອງຮັບການຜະລິດແບັດເຕີຣີລົດຍົນໄຟຟ້າທີ່ມີຄວາມຕ້ອງການເພີ່ມສູງຂຶ້ນ.

ກ່ອນໜ້ານີ້ທາງການອິນໂດເນເຊຍເຜີຍວ່າ: ກຳລັງຫາທາງຈັດກອງປະຊຸມລະຫວ່າງປະທານາທິບໍດີກັບ ອີລອນ ມັສຕ໌ ຜູ້ບໍລິຫານຂອງເທສລາ ຂຶ້ນອີກ. ຂະນະທີ່ ມັສກ໌ ເອງບອກວ່າ: ທ່ານກຳລັງພິຈາລະນາເຖິງການຢ້ຽມຢາມອິນໂດເນເຊຍໃນເດືອນພະຈິກຈະເຖິງນີ້.

แชร์