ກອງປະຊຸມຄົບຄະນະບໍລິຫານງານພັກເມືອງທຸລະຄົມ ຄັ້ງທີ 8 ສະໄໝທີ VII

ກອງປະຊຸມຄົບຄະນະບໍລິຫານງານພັກເມືອງທຸລະຄົມ ຄັ້ງທີ 8 ສະໄໝທີ VII (ກາງສະໄໝ) ໄລຍະແຕ່ປີ 2020 ຫາ 6 ເດືອນຕົ້ນປີ 2022 ຈັດຂຶ້ນໃນວັນທີ 18 ສິງຫາ 2022 ພາຍໃຕ້ການເປັນປະທານຂອງ ທ່ານ ນາງ ວົງເດືອນ ວັດຕະໂສ ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງທຸລະຄົມ ໂດຍມີ ທ່ານ ນາງ ຈັນທະບູນ ໂພສາລາດ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງວຽງຈັນ, ຜູ້ຊີ້ນໍາວຽກງານຮອບດ້ານຂອງເມືອງທຸລະຄົມ, ມີສະຫາຍຮອງເລຂາພັກເມືອງ, ຄະນະປະຈໍາພັກເມືອງ, ຄະນະພັກຮາກຖານ, ເລຂາໜ່ວຍພັກຫ້ອງການ, ກົມກອງ, ອົງການ ແລະເລຂາໜ່ວຍພັກໂຮງຮຽນທົ່ວເມືອງເຂົ້າຮ່ວມ.

ໂອກາດນີ້, ທ່ານ ນາງ ວົງເດືອນ ວັດຕະໂສ ໄດ້ກ່າວວ່າ: ກອງປະຊຸມຄັ້ງນີ້, ເປັນການປະເມີນ, ຕີລາຄາ ແລະຖອດຖອນບົດຮຽນດ້ານດີ, ດ້ານຄົງຄ້າງ ແລະວາງແຜນຊີ້ນໍາ-ນໍາພາວຽກງານໃນຕໍ່ໜ້າ. ສະນັ້ນ, ຈຶ່ງຮຽກຮ້ອງມາຍັງຜູ້ແທນກອງປະຊຸມ ຈົ່ງເຊີດຊູຄວາມຮັບຜິດຊອບຂອງຕົນ ຕິດຕາມຮັບຟັງບັນດາເອກະສານ ແລະປະກອບຄໍາຢ່າງສ້າງສັນທີ່ສັງລວມຈາກການປະຕິບັດວຽກງານທີ່ຕົນຮັບຜິດຊອບຊີ້ນໍາ, ຮັບປະກັນໃຫ້ກອງປະຊຸມມີເນື້ອໃນທີ່ຄົບຖ້ວນສົມບູນ. ພ້ອມນີ້, ກອງປະຊຸມຍັງໄດ້ເຊື່ອມຊຶມເອກະສານມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 4 ສະໄໝທີ XI, ມະຕິກອງປະຊຸມຄົບຄະນະບໍລິຫາານພັກແຂວງວຽງຈັນ ຄັ້ງທີ 7 ສະໄໝທີ VI, ລາຍງານການເມືອງກ່ຽວກັບການຈັດຕັ້ງປະຕິບັດວຽກງານຮອບດ້ານກາງສະໄໝຂອງຄະນະບໍລິຫານງານພັກເມືອງທຸລະຄົມ, ບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມກາງສະໄໝ.

ໂອກາດນີ້, ທ່ານ ນາງ ຈັນທະບູນ ໂພສາລາດ ໄດ້ໃຫ້ທິດຊີ້ນໍາຕໍ່ກອງປະຊຸມ ເປັນຕົ້ນຕ້ອງສັງລວມບັນຫາທີ່ຄົງຄ້າງ ແລະສືບຕໍ່ບຸກທະລຸແກ້ໄຂວຽກງານໃນຂອດທີ່ຍັງເຮັດບໍ່ໄດ້ດີໃຫ້ສໍາເລັດ ເພື່ອປັບປຸງພັດທະນາຫັນປ່ຽນໄປສູ່ອັນໃໝ່ທີ່ຕັ້ງໜ້າ; ຕ້ອງຖືເອົາການຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການແກ້ໄຂບັນຫາຫຍຸ້ງຍາກດ້ານເສດຖະ ກິດ ແລະ ແກ້ໄຂບັນຫາຢາເສບຕິດ ຄຽງຄູ່ກັບການປະຕິບັດວຽກງານອີກ 2 ປີເຄິ່ງຕໍ່ໜ້າຢ່າງມີຫົວຄິດປະດິດສ້າງໃຫ້ເປັນຮູບປະທໍາ; ໃຫ້ສືບຕໍ່ຂຸດຄົ້ນລາຍຮັບຂອງຂະແໜງການ, ຈັດເກັບລາຍຮັບເຂົ້າງົບປະມານໃຫ້ໄດ້ຕາມຄາດໝາຍ ຫຼື ລື່ນຄາດໝາຍ ເພື່ອຮັກສາຄວາມສົມດູນລະຫວ່າງແຜນລາຍຮັບ ແລະ ລາຍຈ່າຍຂອງເມືອງໄປພ້ອມກັບການຂຸດຄົ້ນທ່າແຮງບົ່ມຊ້ອນອື່ນໆຂອງເມືອງ, ສູ້ຊົນຍາດແຍ່ງການລົງທຶນໃນຂະແໜງການທີ່ມີທ່າແຮງ, ຊຸກຍູ້ສົ່ງເສີມຮີດຄອງປະເພນີ, ອະນຸລັກຮັກສາມູນເຊື້ອວັດທະນະທໍາຂອງຊາວເມືອງ, ຂອງບັນດາເຜົ່າໃຫ້ໝັ້ນຄົງ, ຍູ້ແຮງ ແລະດຶງດູດການທ່ອງທ່ຽວໃຫ້ມີຫລາຍສີສັນດ້ວຍຫລາຍກິດຈະກໍາປະສົມປະສານກັບປະເພນີຂອງທ້ອງຖິ່ນເພື່ອກະຈາຍລາຍໄດ້ສູ້ຄົວເຮືອນ, ຊົມຊົນຕາມນະໂຍບາຍຂອງລັດຖະບານ ແລະ ອົງການປົກຄອງທຸກຂັ້ນວາງອອກ; ຕ້ອງສູ້ຊົນຍາດແຍ່ງແຂ່ງຂັນກັນສ້າງຜົນງານເພື່ອຕີຈັງຫວະໃຫ້ຂະບວນວຽກງານຮອບດ້ານດໍາເນີນຢ່າງຖືກທິດ, ສອດຄ່ອງ ແລະ ຕ້ອງເພີ່ມທະວີວຽກງານສ້າງບ້ານນາມ ມະຍົດຕ່າງໆໃຫ້ໄດ້ທັງປະລິມານ ແລະຄຸນຸນະພາບ; ຕ້ອງຮັກສາໃຫ້ໄດ້ແບບຢ່າງການນໍາພາທີ່ດີ, ເຕົ້າໂຮມຄວາມສາມັກຄີຊັ້ນຄົນຕ່າງໆຄ, ຈໍາກັດ ແລະແກ້ໄຂໃຫ້ໄດ້ແນວຄິດອາດຍາສິດ, ແນວຄິດຄັບແຄບ, ຈຸ້ມເຈື້ອ ແລະສິ່ງຫຍໍ້ທໍ້ອື່ນໆ ທີ່ອາດກະທົບຕໍ່ການນໍາພາ, ຕ້ອງເດັດດ່ຽວໜຽວແໜ້ນສຸມໃສ່ຊີ້ນໍາທຸກຂົງເຂດວຽກງານໃຫ້ດໍາເນີນໄປຕາມຈຸດປະສົງ ແລະຄາດໝາຍທີ່ວາງໄວ້.

ຂ່າວ: ເມືອງທຸລະຄົມ.

แชร์