8 ແຂວງພາກເໜືອຮັບຟັງການເຜີຍແຜ່ກົດໝາຍວ່າດ້ວຍຮູບເງົາ

ກອງປະຊຸມເຜີຍແຜ່ກົດໝາຍວ່າດ້ວຍຮູບເງົາເຊິ່ງຈັດຂຶ້ນໂດຍກົມຮູບເງົາກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ໄດ້ຈັດຂຶ້ນວັນທີ 18 ສິງຫາ 2022 ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ ແຂວງຫຼວງພະບາງ ໂດຍມີທ່ານ ຄໍາເພົ້າ ວັນນະວົງ ຫົວໜ້າກົມຮູບເງົາກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ, ທ່ານ ຈັນສະໝອນ ທິບພາວັນ ຮອງຫົວໜ້າພະແນກ ຖວທ ແຂວງຫຼວງພະບາງ,ພ້ອມດ້ວຍຕາງໜ້າບັນດາພະແນກ ຖວທ 8 ແຂວງພາກເໜືອ,ເມືອງ-ນະຄອນ ແລະວິຊາການເຂົ້າຮ່ວມຮັບຟັງ.

ທ່ານ ຄໍາເພົ້າ ວັນນະວົງ ຫົວໜ້າກົມຮູບເງົາກະຊວງຖະແຫຼງຂ່າວ,ວັດທະນະທໍາ ແລະທ່ອງທ່ຽວກ່າວວ່າ: ການເຜີຍແຜ່ກົດໝາຍວ່າດ້ວຍຮູບເງົາຄັ້ງນີ້ເພື່ອໃຫ້ບັນດາພະແນກການກ່ຽວຂ້ອງ ຢູ່ 8 ແຂວງພາກເໜືອ ໄດ້ຮັບຮູ້,ກໍາແໜ້ນບັນດານິຕິກໍາຂອງກົດໝາຍດັ່ງກ່າວ,ເຊິ່ງຈະເປັນປະໂຫຍດໃຫ້ໃນການຄຸ້ມຄອງຕໍ່ວຽກງານຕ່າງໆ ເປັນຕົ້ນແມ່ນບັນດາສື່ໂຊຊ່ຽວມີເດຍ,ອຸປະກອນຂອງສື່ ລວມໄປເຖິງສື່ມວນຊົນ ແລະອື່ນໆ.ເຊິ່ງເຊິ່ງໃນເມື່ອກ່ອນການການສ້າງຮູບເງົາ ຫຼືຜະລິດຕະພັນທີ່ສັງລວມດ້ານສິລະປະ ແລະເປັນສື່ໂຄສະນາແມ່ນໃຫ້ເຫັນເປັນພາບເຄື່ອນໄຫວທີ່ມີສຽງ ຫຼືບໍ່ມີສຽງໂດຍບັນທຶກໃສ່ຟິມ, ກາແຊັດວິດີໂອ, ແຜ່ນວີຊີດີ ຫຼືວັດຖຸແບບອື່ນ, ປັດຈຸບັນເຕັກໂນໂລຊີດິຈິຕ໋ອນ ຫຼືໄອຊີທີ ໄດ້ມີການພັດທະນາຢ່າງຕໍ່ເນື່ອງ ແລະໄວທີ່ສຸດເກີດມີເຕັກໂນໂລຊີຕ່າງໆຂຶ້ນ. ທັງໝົດນັ້ນລ້ວນແລ້ວແຕ່ເປັນການປະກອບເຂົ້າໃນການສ້າງສາລະຄະດີ, ເລື້ອງສັ້ນ, ບົດເພງປະກອບພາບຕ່າງໆ ແລະສ້າງເປັນຮູບເງົາຕາມແຕ່ໄລຍະເວລາຍາວ ຫຼືສັ້ນ,ສະນັ້ນເພື່ອເປັນການຄຸ້ມຄອງຕໍ່ບັນດາສື່ເລົ່ານັ້ນຈິ່ງໄດ້ຈໍາເປັນຕ້ອງມີນິຕິກໍາດັ່ງກ່າວນີ້ຂຶ້ນ, ເພື່ອສະດວກໃນການຕິດຕາມຄຸ້ມຄອງຢູ່ໃນແຕ່ລະຂົງເຂດ.

ສໍາລັບກົດໝາຍວ່າດ້ວຍຮູບເງົາ ປະກອບມີ 10 ພາກ 12 ໝວດ ແລະ 71 ມາດຕາ,ກົດໝາຍດັ່ງກ່າວນີ້ແມ່ນໄດ້ຜ່ານການປັບປຸງແຕ່ປີ 2015 ໂດຍການຮັບຮອງຈາກສະພາແຫ່ງຊາດ ໃນປີ2019 ແລະມີລັດຖະດໍາລັດຂອງປະທານປະເທດ ກ່ຽວກັບການປະກາດໃຊ້ໃນວັນທີ 8 ມັງກອນ 2020.ກົດໝາຍສະບັບນີ້ໄດ້ກໍານົດ ຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ ແລະ ຕິດຕາມກວດກາວຽກງານຮູບເງົາເພື່ອໃຫ້ວຽກງານດັ່ງກ່າວເຄື່ອນໄຫວເປັນລະບົບ, ມີປະສິດທິພາບ, ປະສິດທິຜົນແນໃສ່ຮັບປະກັນການຜະລິດຮູບເງົາມີທັງປະລິມານ ແລະ ຄຸນນະພາບ, ມີລັກສະນະຊາດ, ລັກສະນະມະຫາຊົນ ແລະລັກສະນະກ້າວໜ້າ, ເສີມຂະຫຍາຍຫົວຄິດປະດິດສ້າງຂອງປະຊາຊົນລາວບັນດາເຜົ່າເຂົ້າໃນການຟື້ນຟູ, ພັດທະນາ ແລະການເຜີຍແຜ່ຮູບເງົາ, ສາມາດເຊື່ອມໂຍງກັບພາກພື້ນ ແລະສາກົນ, ປະກອບສ່ວນເຂົ້າໃນການພັດທະນາເສດຖກິດ-ສັງຄົມຂອງຊາດ.

ພ້ອມດຽວກັນນີ້ໃນກອງປະຊຸມກໍໄດ້ຮັບຟັງການເຜີຍແຜ່ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍຮູບເງົາເຊິ່ງເປັນການອະທິບາຍ ແລະຜັນຂະຫຍາຍເນື້ອໃນບາງມາດຕາຂອງກົດໝາຍວ່າດ້ວຍຮູບເງົາໃຫ້ມີຄວາມລະອຽດ, ຈະແຈ້ງ, ສອດຄ່ອງ ແລະເປັນເອກະພາບໃນການຈັດຕັ້ງປະຕິບັດຢູ່ແຕ່ລະຂັ້ນຕື່ມອີກ.
ຂ່າວ: ເພັດສາຄອນ ສິມມະວົງ

แชร์