ບໍລິສັດ ມິດຕະພູມ ໂອໂຕ ເຊີວິດສ໌ຊຸກຍູ້ນະຄອນຫຼວງພະບາງ ຈັດງານບຸນຊ່ວງເຮືອ ມູນຄ່າ 10 ລ້ານກີບ

ວັນທີ 15 ສິງຫາ 2022 ນີ້ ນະຄອນຫຼວງພະບາງ ໄດ້ຈັດພິທີມອບໃບກຽດຕິຄຸນໃຫ້ບໍລິສັດ ມິດຕະພູມ ໂອໂຕ ເຊີວິດສ໌ນະຄອນ-ຫຼວງພະບາງ ທີ່ໄດ້ປະກອບສ່ວນທາງດ້ານວັດຖຸປັດໃຈ ເປັນເງິນສົດ ມູນຄ່າ 10,000,000 ກີບ ເຂົ້າໃນການຈັດງານບຸນຫໍ່ເຂົ້າປະດັບດິນ ຊ່ວງເຮືອເດືອນເກົ້າ ( 9 ) ປະຈຳປີ ພສ 2565 ຄສ 2022 ທີ່ນະຄອນ-ຫຼວງພະບາງ ມໍລະດົກໂລກ.

ພິທີມອບ-ຮັບໄດ້ຈັດຂຶ້ນ ທີ່ຫ້ອງປະຊຸມຫ້ອງວ່າການນະຄອນຫຼວງພະບາງ, ມີທ່ານ ສອນເພັດ ອິດທິພອນ ຜູ້ຈັດການ ບໍລິສັດ ມິດຕະພູມ ໂອໂຕ ເຊີວິດສ໌, ແລະທິມງານເຂົ້າຮ່ວມເປັນສັກຂີ.

ໃນພິທີ ທ່ານ ສອນເພັດ ອິດທິພອນ ຜູ້ຈັດການບໍລິສັດ ມິດຕະພູມ ໂອໂຕເຊິວິດສ໌ ນະຄອນ-ຫຼວງພະບາງ ໄດ້ກ່າວມອບເງິນອຸປະຖຳງານບຸນຫໍ່ເຂົ້າປະດັບດິນ ຈຳນວນ 10,000,000 ກີບ ປະກອບສ່ວນໃຫ້ນະຄອນຫຼວງພະບາງຈັດງານບຸນມີບັນຍາກາດຄຶກຄື້ນເບີກບານມ່ວນຊື່ນເຊິ່ງໃຫ້ກຽດກ່າວຮັບໂດຍທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ພ້ອມດ້ວຍຄະນະທີ່ໄດ້ເຂົ້າຮ່ວມເປັນສັກຂີ.

ໂອກາດດັ່ງກ່າວ ທ່ານ ວຽງທາອງ ຫັດສະຈັນ ເຈົ້ານະຄອນ-ຫຼວງພະບາງ ໄດ້ມອບໃບກຽດຕິຄຸນຂອງທ່ານເຈົ້ານະຄອນເພື່ອສະແດງຄວາມຮູ້ບຸນຄຸນເປັນອານຸສອນເອກອ້າງຜົນງານຂອງບໍລິສັດ ມິດຕະພູມ ໂອໂຕ ເຊີວິດສ໌ ທີ່ໄດ້ໃຫ້ການອຸປະຖຳຊຸກຍູ້ຊ່ວຍເຫຼືອນະຄອນຫຼວງພະບາງຈັດງານບຸນຕະຫຼອດມານອກນັ້ນທ່ານຍັງໄດ້ອວຍພອນຕໍ່ທ່ານ ສອນເພັດ ອິດທິພອນ ຜູ້ຈັດການບໍລິສັດ ໂອໂຕ ເຊີວິດສ໌ ພ້ອມດ້ວຍທີມງານ ແລະພະນັກງານໃນສັງກັດຈົ່ງມີສຸຂະພາບແຂງແຮງປະສົບຜົນສຳເລັດທຸກໜ້າທີ່ວຽກງານ ແລະມີຄວາມຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.

ຂ່າວໂດຍ: ສົມພອນ ວິໄລຜົນ

• 19/08/2022