ລັດຖະບານລາວ ປະດັບຫລຽນກາມິດຕະພາບໃຫ້ອົງການພັດທະນາເດັກນ້ອຍ ລາວ-ຍີ່ປຸ່ນ

ໃນວັນທີ 18 ສິງຫາ 2022 ທີ່ນະຄອນຫລວງວຽງຈັນ, ຕາງໜ້າໃຫ້ລັດຖະບານລາວ ໂດຍທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ ໄດ້ປະດັບຫລຽນກາມິດຕະພາບໃຫ້ແກ່ທ່ານ ທາມາລິ ຄິໂຢຕະກະ ຜູ້ອໍານວຍການອົງການພັດທະນາເດັກນ້ອຍ ລາວ-ຍີ່ປຸ່ນ(SVA) ປະຈໍາ ສປປ ລາວ ທີ່ມີຜົນງານປະກອບສ່ວນໃນການພົວພັນຮ່ວມມືສົ່ງເສີມສິລະປະ ວັດທະນະທໍາ ໃຫ້ແກ່ເດັກນ້ອຍລາວນັບແຕ່ປີ 1995-2020.

ໃນໂອກາດນີ້, ທ່ານ ວັນສີ ກົວມົວ ໃຫ້ຮູ້ວ່າ: ອົງການພັດທະນາເດັກນ້ອຍ ລາວ-ຍີ່ປຸ່ນ ເຊິ່ງນັບແຕ່ປີ 1995 ຈົນຮອດປີ 2020 ເປັນເວລາ 25 ປີ ທີ່ອົງການດັ່ງກ່າວໄດ້ມີການພົວພັນຮ່ວມມື ເຮັດວຽກສົ່ງເສີມສິລະປະ-ວັດທະນະທໍາ ກັບກະຊວງ ຖວທ ກໍຄືສູນວັດທະນະທໍາເດັກ ໃນການໃຫ້ທຶນສະໜັບສະໜູນໂຄງການເຮືອນເດັກເພື່ອວັດທະນະທໍາ ແລະ ການສຶກສາ ເປັນຕົ້ນ: ການຝຶກອົບຮົມ, ການແລກປ່ຽນກິດຈະກໍາວັດທະນະທໍາ, ວຽກງານບໍລິຫານ, ການສະໜັບສະໜູນອຸປະກອນດົນຕີ, ອຸປະກອນຮັບໃຊ້ການຮຽນ-ການສອນ ແລະ ປື້ມອ່ານຕ່າງໆ ໃຫ້ແກ່ສູນວັດທະນໍາເດັກ.

ສະນັ້ນ, ການຮ່ວມມື ແລະຊ່ວຍເຫລືອລະຫວ່າງສູນວັດທະນະທໍາເດັກ ແລະອົງການ SVA ມີຜົນສໍາເລັດ, ສາມາດເຮັດໃຫ້ເດັກນ້ອຍລາວຮູ້ຖະໜອມຫອມຮັກວັດທະນະທໍາລາວ,ສາມາດເປັນຜູ້ປົກປັກຮັກສາ,ສືບທອດຄຸນຄ່າວັດທະນະທໍາລາວ ແລະເປັນຕົວແທນໃນການເຄື່ອນໄຫວກິດຈະກໍາແລກປ່ຽນວັດທະນະທໍາໃນລະດັບທ້ອງຖິ່ນ, ສູນກາງ ລະດັບຊາດ ແລະ ສາກົນ. ພ້ອມນີ້, ການຮ່ວມມືຊ່ວຍເຫລືອດັ່ງກ່າວຍັງເປັນແມ່ແຮງຂັບເຄື່ອນທັງເປັນເງື່ອນໄຂໃນການສ້າງຕັ້ງ ແລະຂະຫຍາຍສູນວັດທະນະທໍາເດັກໃຫ້ຂັ້ນແຂງ ແລະຂັ້ນເມືອງ ໃນທົ່ວປະເທດໄດ້ເຖິງ 48 ແຫ່ງ.
ຂ່າວ-ພາບ: ຂັນໄຊ

แชร์