ຮອງນາຍົກລັດຖະມົນຕີ ຕ້ອນຮັບຮອງປະທານສະພາທຸລະກິດ ອາເມຣິກາ-ອາຊຽນ

ວັນທີ 17 ສິງຫາ 2022, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງຕ່າງປະເທດໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ Michael W. Michalak, ເຈົ້າໜ້າທີ່ອາວຸໂສ, ຮອງປະທານສະພາທຸລະກິດອາເມຣິກາ-ອາຊຽນ (USABC) ພ້ອມດ້ວຍຄະນະໃນໂອກາດນໍາພາຄະນະນັກທຸລະກິດ ອາເມຣິກາ ເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ການເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ ໃນຄັ້ງນີ້ທີ່ເປັນການສະແດງເຖິງຄວາມຕັ້ງໃຈ, ຄວາມພະຍາຍາມຮ່ວມກັນໃນການສືບຕໍ່ຊຸກຍູ້, ສົ່ງເສີມການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ ລະຫວ່າງ ອາເມຣິກາ ແລະອາຊຽນ ໂດຍສະເພາະລະຫວ່າງ ສປປ ລາວ ແລະ ອາເມຣິກາ ທີ່ເປັນການປະກອບສ່ວນເຂົ້າ ນການຟື້ນຟູເສດຖະກິດພາຍຫລັງ ໂຄວິດ-19 ກໍຄືການຈັດຕັ້ງປະຕິບັດການເປັນຄູ່ຮ່ວມແບບກວມລວມ ລາວ-ອາເມຣິກາ. ທ່ານຮອງນາຍົກລັດຖະມົນຕີໄດ້ຊົມເຊີຍ ແລະຕີລາຄາສູງຕໍ່ຜົນສໍາເລັດ, ການປະກອບສ່ວນ ແລະ ຄວາມຄືບໜ້າຂອງການຮ່ວມມືດ້ານເສດຖະກິດ, ການຄ້າ, ການລົງທຶນ ໃນຂະແໜງການຕ່າງໆຂອງນັກທຸລະກິດ ອາເມຣິກາ ຢູ່ ສປປ ລາວ ຕະຫລອດໄລຍະທີ່ຜ່ານມາ ເຮັດໃຫ້ມູນຄ່າການຄ້າ, ການລົງທຶນ ລະຫວ່າງລາວ ແລະອາເມຣິກາ ມີການເພີ່ມຂຶ້ນຢ່າງຕໍ່ເນື່ອງໃນແຕ່ລະປີກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງລັດຖະບານ, ພ້ອມທັງໄດ້ສະເໜີໃຫ້ຄະນະ USABC ແລະ ນັກທຸລະກິດອາເມຣິກາ ສືບຕໍ່ໃຫ້ການຊ່ວຍເຫລືອໃນໂຄງການຮ່ວມມືໃນຂະແໜງຕ່າງໆ ໂດຍສະເພາະກ່ຽວກັບການສ້າງຄວາມອາດສາມາດຂອງທຸລະກິດຂະໜາດກາງ ແລະຂະໜາດນ້ອຍ (MSMEs, SMESs) ແລະ ອື່ນໆ.
ຄະນະສະພາທຸລະກິດ ອາເມຣິກາ-ອາຊຽນ ໄດ້ແຈ້ງຈຸດປະສົງຂອງການເດີນທາງໃນຄັ້ງນີ້ ເພື່ອຊອກຮູ້, ປຶກສາຫາລື ແລະ ແລກປ່ຽນຮ່ວມມືກັບພາກສ່ວນກ່ຽວຂ້ອງຂອງລາວ ໂດຍສະເພາະຄວາມສົນໃຈ, ແຜນການຊອກຫາຕະຫລາດ, ທ່າແຮງເຮັດທຸລະກິດຢູ່ລາວໃນດ້ານຕ່າງໆຂອງອາເມຣິກາ ເຊັ່ນ: ດ້ານພະລັງງານ, ການຜະລິດສິນຄ້າ, ເຕັກໂນໂລຊີຂໍ້ມູນຂ່າວສານ, ການບໍລິການດ້ານການເງິນ, ຂະແໜງສາທາລະນະສຸກ ແລະອື່ນໆ ທັງເພື່ອຊອກຮູ້, ສຶກສາກ່ຽວກັບນະໂຍບາຍ ແລະວຽກງານບູລິມະສິດຂອງລັດຖະບານລາວເພື່ອເປັນທິດທາງໃນການດໍາເນີນທຸລະກິດໃນອະນາຄົດ.

ທ່ານຮອງນາຍົກລັດຖະມົນຕີພ້ອມດ້ວຍຄະນະສະພາທຸລະກິດ ອາເມຣິກາ-ອາຊຽນ ແລະ ບັນດານັກທຸລະກິດ ອາເມຣິກາ ຍັງໄດ້ຮ່ວມກັນແລກປ່ຽນຂໍ້ມູນ, ປຶກສາຫາລືໃນບັນຫາຕ່າງໆກ່ຽວກັບຂໍ້ສະດວກ,ຂໍ້ຫຍຸ້ງຍາກໃນການດໍາເນີນທຸລະກິດ, ຄວາມຄືບໜ້າໃນການເຈລະຈາຈັດຕັ້ງຜັນຂະຫຍາຍສັນຍາວ່າດ້ວຍການຄ້າ ແລະການລົງທຶນ ລະຫວ່າງ ລັດຖະບານລາວ ແລະ ອາເມຣິກາ (TIFA) ແລະ ອື່ນໆ.

ທ່ານ Michael W. Michalak ໄດ້ຕາງໜ້າໃຫ້ສະພາທຸລະກິດ ອາເມຣິກາ-ອາຊຽນ ກໍຄືນັກ ທຸລະກິດ ອາເມຣິກາ ສະແດງຄວາມຂອບໃຈມາຍັງທ່ານ ສະເຫລີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບ ແລະພົບປະໃນຄັ້ງນີ້ທີ່ເປັນຜົນປະໂຫຍດ ແລະໄດ້ຮັບຮູ້ຂໍ້ມູນອັນສໍາຄັນເພື່ອເປັນທິດທາງໃນການຊຸກຍູ້ສົ່ງເສີມການຮ່ວມມືດ້ານການຄ້າ, ການລົງທຶນລະຫວ່າງ ສອງປະເທດໂດຍສະເພາະການດໍາເນີນທຸລະກິດຢູ່ລາວທີ່ຈະເປັນການປະກອບສ່ວນອັນສໍາຄັນໃຫ້ແກ່ການເສີມຂະຫຍາຍການພົວພັນຮ່ວມມືສອງຝ່າຍ ລະຫວ່າງລາວ ແລະອາເມຣິກາ ດ້ານເສດຖະກິດ, ການຄ້າ ແລະລົງທຶນໃຫ້ກວ້າງຂວາງໃນຕໍ່ໜ້າ.
ພາບ:ຂັນໄຊ

แชร์