ອັດຕະປື ວາງສີລາລືກການກໍ່ສ້າງໂຄງການໄຟຟ້າແສງຕາເວັນ

ແຂວງອັດຕະປື ໄດ້ຈັດພິທີວາງສີລາລືກການກໍ່ສ້າງໂຄງການໄຟຟ້າ ແສງຕາເວັນ SAPP ຢູ່ເຂດຫຼັກ 37 ບ້ານຫາດຊັນ ເມືອງໄຊເສດຖາ ຂຶ້ນເມື່ອບໍ່ດົນມານີ້ໃຫ້ກຽດເຂົ້າມີ ທ່ານ ເລັດ ໄຊຍະພອນ ເຈົ້າແຂວງອັດຕະປື, ມີການນໍາຂອງແຂວງ, ເມືອງ, ບ້ານ, ຕາງໜ້າບໍລິສັດຜູ້ພັດທະນາໂຄງການ, ອົງກອນ DFC ຜູ້ສະໜັບສະໜູນເງິນທຶນພັດທະນາໂຄງການພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ຄີນ ຄາໂຕສະກີ (Kyle KATOSKI) ຕາງໜ້າຈາກ ບໍລິສັດ SAPC ຫ້ອງການໃຫຍ່ຢູ່ເທດສິງກະໂປພ້ອມກັບທ່ານ ສີສະຫວາດ ສຸວັນນະວົງ ອໍານວຍການຝ່າຍລາວ ບໍລິສັດ ໂຊລາອັດຕະປື ພາເວີ ຈໍາກັດຜູ້ດຽວ ໄດ້ກ່າວລາຍງານປະຫວັດຫຍໍ້ໂຄງການໄຟຟ້າແສງຕາເວັນວ່າ: ທາງບໍລິສັດ ໂຊລາອັດຕະປື ພາເວີ ຈໍາກັດຜູ້ດຽວໃນນາມຜູ້ພັດທະນາໂຄງການໄດ້ເລີ່ມທໍາຄວາມຮູ້ຈັກພາກສະໜາມສໍາລັບການສຶກສາຂໍ້ມູນເບື້ອງຕົ້ນໃນການລົງທຶນໂຄງການໄຟຟ້າແສງຕາເວັນ ຢູ່ຫຼັກ 37 ບ້ານຫາດຊັນ ເມືອງໄຊເສດຖາ ແຂວງອັດຕະປື ໃນພື້ນທີ່ກໍານົດຂອງແຂວງໄວ້ເປັນເຂດພັດທະນາອຸດສາຫະກຳໄຟຟ້າແສງຕາເວັນ, ໂຄງການດັ່ງກ່າວມີມູນຄ່າການລົງທຶນທັງໝົດ 69,2 ລ້ານໂດລາ, ໄລຍະການກໍ່ສ້າງແມ່ນ 18 ເດືອນໃຫ້ສໍາເລັດ, ວຽກວິສະວະກໍາ-ຈັດຊື້-ກໍ່ສາງ (EPC) ໂດຍ ບໍລິສັດ ເຢຍລະມັນ-IBVOGT, ມີກໍາລັງການຕິດຕັ້ງໂຄງການ 64MWdc/50MWac, ກໍາລັງການຂາຍພະລັງງານຢູ່ທີ່ 128 GWh ຕໍ່ປີ ຊຶ່ງຈະຂາຍໄຟຟ້າ ໃຫ້ລັດວິສາຫະກິດໄຟຟ້າລາວ, ໂຄງການໄຟຟ້າແສງຕາເວັນ SAPP ນີ້, ໄດ້ເລີ່ມແຕ່ປີ 2014 ເປັນຕົ້ນມາ, ທາງໂຄງການໄດ້ສຶກສາຄຽງຄູ່ກັນໄປທັງ 3 ໂຄງການ: SAPP1-50MW/115kV, SAPP2-5MW/22kV ແລະ SAPP3-5MW/22kV ຊຶ່ງການດໍາເນີນງານຂອງໂຄງການ ແມ່ນເປັນໄປຕາມຂັ້ນຕອນຂອງກົດໝາຍວ່າດ້ວຍໄຟຟ້າສະບັບປັບປຸງ ແລະບົນພື້ນຖານການເຫັນດີເຫັນພ້ອມຂອງສູນກາງ ແລະທ້ອງຖິ່ນ.

ສໍາລັບວຽກງານການກໍ່ສ້າງຂອງໂຄງການແມ່ນຈະເລີ່ມຕົ້ນຈາກການເກັບກູ້ລະເບີດຊຶ່ງຈະຕ້ອງໄດ້ໃຊ້ເວລາດົນສົມຄວນ, ສ່ວນສັນຍາສຳປະທານແມ່ນຈະເຈລະຈາຄຽງຄູ່ກັນໄປ ກັບການພັດທະນາ; ທ່ານ ເລັດ ໄຊຍະພອນ ໄດ້ມີຄໍາເຫັນໃນພິທີວ່າ: ໂຄງການພັດທະນາ ໄຟຟ້າແສງຕາເວັນ ຢູ່ບ້ານຫາດຊັນ ເມືອງໄຊເສດຖາ ນີ້ຈະເປັນອີກໜຶ່ງໂຄງການທີ່ຈະຊ່ວຍໃນການຊຸກຍູ້ໃຫ້ເສດຖະກິດ-ສັງຄົມ ຂອງແຂວງອັດຕະປື ມີການຂະຫຍາຍຕົວກ້າວໄປເຖິງການສົ່ງເສີມດ້ານຊີວິດການເປັນຢູ່ທີ່ດີໃຫ້ພໍ່ແມ່ປະຊາຊົນ ໃຫ້ດີຂຶ້ນເທື່ອລະກ້າວ.
(ຂ່າວ: ວັດທະນາ)

แชร์