ຝຶກອົບຮົມວຽກງານໂຄສະນາເຜີຍແຜ່ ລັດຖະທຳມະນູນ

(ສພຊ) ກອງປະຊຸມຝຶກອົບຮົມວຽກງານໂຄສະນາເຜີຍແຜ່ລັດຖະທຳມະນູນ, ກົດໝາຍ ແລະນິຕິກຳໃຕ້ກົດໝາຍໃຫ້ແກ່ລັດຖະກອນຂອງກຳມາທິການກົດໝາຍ ແລະ ສະພາປະຊາຊົນຂັ້ນແຂວງໄດ້ຈັດຂຶ້ນໃນລະຫວ່າງວັນທີ 15-17 ສິງຫາຜ່ານມາ ທີ່ແຂວງຫຼວງພະບາງໂດຍການເປັນປະທານຂອງທ່ານ ຈະເລີນ ເຢຍປ່າວເຮີ ຮອງປະທານສະພາແຫ່ງຊາດປະທານກໍາມາທິການກົດໝາຍ ມີບັນດາຮອງປະທານກຳມາທິການກົດໝາຍ ແລະພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງທັກສະການໂຄສະນາເຜີຍແຜ່ກົດໝາຍທີ່ມີປະສິດທິພາບຈາກທ່ານຫົວໜ້າໂຄງການສ້າງລັດທີ່ປົກຄອງລັດດ້ວຍກົດໝາຍ ແລະສິດທິມະນຸດ (SO3) ແຜນງານເຊກາ; ຮັບຟັງບົດຮຽນຜົນສຳເລັດ ແລະຄວາມຄືບໜ້າວຽກງານໂຄສະນາເຜີຍແຜ່ກົດໝາຍຂອງກົມໂຄສະນາເຜີຍແຜ່ກົດໝາຍກະຊວງຍຸຕິທຳ ຈາກຫົວໜ້າກົມໂຄສະນາເຜີຍແຜ່ກົດໝາຍກະຊວງຍຸຕິທຳ; ຮັບຟັງການບັນລະຍາຍບົດຮຽນກ່ຽວກັບການສື່ສານທີ່ມີປະສິດທິພາບ ແລະການໂຄສະນາເຜີຍແຜ່ກົດໝາຍ ໂດຍນຳໃຊ້ເຄື່ອງມືສື່ສານ. ຈາກນັ້ນກໍໄດ້ຈັດແບ່ງກຸ່ມຄົ້ນຄວ້າ ແລະສ້າງບົດໂຄສະນາເຜີຍແຜ່ກົດໝາຍໃຫ້ແທດເໝາະກັບການປະຕິບັດຕົວຈິງ.

ຈຸດປະສົງຂອງກອງປະຊຸມເພື່ອຍົກລະດັບຄວາມຮູ້ໃຫ້ແກ່ພະນັກງານ-ລັດຖະກອນ ຂອງກຳມາທິການກົດໝາຍ ແລະສະພາປະຊາຊົນຂັ້ນແຂວງກ່ຽວກັບວຽກງານໂຄສະນາເຜີຍແຜ່ລັດຖະທຳມະນູນ, ກົດໝາຍ ແລະນິຕິກຳໃຕ້ກົດໝາຍ, ຕອບສະໜອງໄດ້ຄວາມຮຽກຮ້ອງຕ້ອງການໃນການປະຕິບັດໜ້າທີ່ວຽກງານຜ່ານການແລກປ່ຽນບົດຮຽນ ແລະຄຳຄິດຄຳເຫັນກັບກົມວິຊາການຂອງກະຊວງຍຸຕິທຳ ແລະຊ່ຽວຊານຂອງແຜນງານເຊກາໃນວຽກງານໂຄສະນາເຜີຍແຜ່ກົດໝາຍ.

ກອງປະຊຸມຄັ້ງນີ້, ໄດ້ຮັບການສະໜັບສະໜູນຈາກແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະການສ້າງລັດທີ່ປົກຄອງດ້ວຍກົດໝາຍແຜນງານເຊກາ.

แชร์