ການນໍາ 7 ແຂວງຂອງລາວ ຮ່ວມໂຮມຊຸມນຸມ“ປີສາມັກຄີມິດຕະພາບລາວ-ຫວຽດນາມ” ແຂວງເຫງະອານ

ພິທີໂຮມຊຸມນຸມສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຈັດຂຶ້ນເມື່ອບໍ່ດົນມານີ້, ຢູ່ນະຄອນວິງ ແຂວງເຫງະອານ ສສ ຫວຽດນາມ ໂດຍມີການນຳຂັ້ນສູງຈາກແຂວງຊຽງຂວາງ, ບໍລິຄຳໄຊ, ຫົວພັນ, ວຽງຈັນ, ຄຳມ່ວນ, ສະຫວັນນະເຂດ ແລະແຂວງໄຊສົມບູນ ເຂົ້າຮ່ວມ. ສຳລັບແຂວງ ບໍລິຄຳໄຊ ນຳໂດຍ ສະຫາຍ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງບໍລິຄຳໄຊ.

ໃນພິທີທ່ານ ຖາຍແທັງກຸຍ, ສະຫາຍ ບຸນຈັນ ສີວົງພັນ ເລຂາພັກແຂວງຊຽງຂວາງ ຕາງໜ້າໃຫ້ການນຳຂັ້ນສູງບັນດາແຂວງຂອງລາວ ແລະທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຫວນຄືນມູນເຊື້ອ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18/7/1977-18/7/2022) ເຊິ່ງສາຍພົວພັນດັ່ງກ່າວ ປຽບ ເໝືອນສາຍພົວພັນຖານສະຫາຍອ້າຍນ້ອງໃນຄອບຄົວດຽວກັນ, ການພົວພັນຮ່ວມມື, ຊ່ວຍເຫລືອເຊິ່ງກັນ ແລະ ກັນຂອງສອງປະເທດພວກເຮົາ ໄດ້ມີມາແຕ່ດຶກດຳບັນ, ປະຊາຊົນສອງຊາດຮ່ວມດື່ມນໍ້າຈາກຫລາຍແມ່ນໍ້າທີ່ໄຫລຜ່ານສອງປະເທດ, ພ້ອມກັນອີງຫລັງໃສ່ສາຍພູຫລວງທີ່ຍິ່ງໃຫຍ່, ຮ່ວມແບ່ງທຸກແບ່ງສຸກນຳກັນໄລຍະຕໍ່ສູ້ກູ້ຊາດກໍຄືໄລຍະປົກປັກຮັກສາປະເທດຊາດຂອງສອງປະເທດໂດຍແມ່ນປະທານ ໂຮ່ຈີມິນ, ປະທານໄກສອນ ພົມວິຫານ, ປະທານ ສຸພານຸວົງ ທີ່ແສນເຄົາລົບຮັກ ເປັນຜູ້ກໍ່ສ້າງ ແລະໄດ້ຮັບການສືບຕໍ່ເສີມຂະຫຍາຍຈາກບັນດາການນຳ, ນັກປະຕິວັດຮຸ້ນຕ່າງໆ ແລະປະຊາຊົນສອງຊາດທີ່ໄດ້ພ້ອມກັນອຸທິດສະຕິປັນຍາເຫື່ອແຮງ, ຊີວິດເລືອດເນື້ອຂອງຕົນໃຫ້ແກ່ພາລະກິດປະຕິວັດອັນລະອິດລະອ້ຽວ, ທຸລະກັນດານເຕັມໄປດ້ວຍການທົດສອບນາໆປະການຈົນໄດ້ກາຍມາເປັນສາຍພົວພັນແບບພິເສດ,ບໍລິສຸດຜຸດຜ່ອງ ແລະຫາໄດ້ຍາກໃນການພົວພັນສາກົນ,ເປັນມໍລະດົກອັນລໍ້າຄ່າຂອງສອງຊາດ,ເປັນກົດເກນແຫ່ງການຄົງຕົວ ແລະຂະຫຍາຍຕົວຂອງສອງປະເທດ, ເປັນປັດໄຈຕັດສິນໄຊຊະນະຂອງການປະຕິວັດຂອງແຕ່ລະປະເທດ.

ໂອກາດນີ້, ທ່ານ ແສງເພັດ ຮຸ່ງບຸນຍວງ ໄດ້ກ່າວວ່າ: ເຖິງວ່າສະພາບການພາກພື້ນ ແລະສາກົນຈະຜັນແປຢ່າງສັບສົນແນວໃດກໍຕາມ, ແຕ່ສາຍພົວພັນອັນບໍລິສຸດຜຸດຜ່ອງ, ໃກ້ຊິດສະໜິດສະໜົມ ລະຫວ່າງສອງຊາດພວກເຮົາ ບໍ່ພຽງແຕ່ບໍ່ຈືດຈາງໄປຕາມການເວລາ ແຕ່ຍິ່ງໄດ້ຮັບການເສີມຂະຫຍາຍທັງທາງກວ້າງ ແລະທາງເລິກ, ນັບມື້ມີປະສິດທິຜົນ ແລະນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດລາວ ແລະຫວຽດນາມ ໃນທຸກຂົງເຂດວຽກງານ. ພ້ອມນັ້ນສະຫາຍຍັງໄດ້ ຕີລາຄາສູງຕໍ່ໝາກຜົນການພົວພັນຮ່ວມມືລະຫວ່າງແຂວງເຫງະອານ, ສສ ຫວຽດນາມ ກັບ ບັນດາແຂວງທ້ອງຖິ່ນ ສປປ ລາວ ຊຶ່ງໄລຍະຜ່ານມາສອງຝ່າຍໄດ້ມີການປະສານສົມທົບ, ໃນການຊ່ວຍເຫລືອເຊິ່ງກັນ ແລະກັນຢ່າງທັນການ.

ໃນພິທີ, ການນຳຂັ້ນສູງແຂວງເຫງະອານຍັງໄດ້ມອບໃບຍ້ອງຍໍໃຫ້ກົມກອງ,ບຸກຄົນທີ່ມີຜົນງານດີເດັ່ນປະກອບສ່ວນເຂົ້າໃນວຽກງານການສ້າງສາພັດທະນາປະເທດຊາດ ໂດຍສະເພາະບັນດາແຂວງຂອງລາວກັບແຂວງເຫງະອານໃນໄລະຍະ 5 ປີ ຜ່ານມາ, ສະເພາະແຂວງບໍລິຄຳໄຊໄດ້ຮັບຈຳນວນ 8 ໃບ ໃນນັ້ນມີ 3 ກົມກອງ, ບຸກຄົນ 5 ທ່ານ.

ຂ່າວ-ພາບ: ສາຍສະໝອນ

แชร์