ແຂວງໄຊຍະບູລີ ແລະເຊີນລາ ສືບຕໍ່ຮ່ວມມືຮອບດ້ານ

ການພົບປະລະຫວ່າງ ຄະນະຜູ້ແທນແຂວງ ໄຊຍະບູລີ ສປປ ລາວ ແລະແຂວງເຊີນລາ ສສ ຫວຽດນາມ ໄດ້ຈັດຂຶ້ນໃນວັນທີ 18 ສິງຫາ 2022 ຢູ່ແຂວງໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ ເລຂາພັກແຂວງ, ເຈົ້າແຂວງໄຊຍະບູລີ ແລະສະຫາຍ ລໍມິງຮຸງ ຮອງເລຂາພັກແຂວງເຊີນລາ, ຜູ້ປະຈໍາການພ້ອມຄະນະຜູ້ແທາສອງຝ່າຍ ເຂົ້າຮ່ວມ.

ການພົບປະຄັ້ງນີ້, ທ່ານ ພົງສະຫວັນ ສິດທະວົງ ໄດ້ກ່າວວ່າ: ເພື່ອເປັນການຜັນຂະຫຍາຍບັນດາເນື້ອໃນຈິດໃຈຂອງຂໍ້ຕົກລົງ, ບົດບັນທຶກ, ສັນຍາ, ສົນທິສັນຍາ ແລະ ຖະແຫຼງການຂອງສອງພັກ-ສອງລັດ ທີ່ໄດ້ຕົກລົງຮ່ວມມືກັນໃນໄລຍະທີ່ຜ່ານມາ, ການພົບປະໃນຄັ້ງນີ້ ຈະກາຍເປັນຂີດໝາຍແຫ່ງການເພີ້ມທະວີສາຍພົວພັນມິດຕະພາບອັນເປັນມູນເຊື້ອ, ຄວາມສາມັກແບບຄີພິເສດ ແລະການຮ່ວມມືຮອບດ້ານລະຫວ່າງສອງຊາດກໍ່ຄືສອງແຂວງພວກເຮົາໃຫ້ນັບມື້ມີການຂະຫຍາຍຕົວເຂົ້າສູ່ລວງເລິກ ແລະ ເພີ່ມພູນຄູນສ້າງໃຫ້ຈະເລີນງອກງາມຍິ່ງໆຂຶ້ນ,

ການພົບປະກັນຄັ້ງນີ້, ທັງສອງແຂວງແມ່ນໄດ້ຮ່ວມກັນລົງນາມໃສ່ບົດບັນທຶກການຮ່ວມມືຮອບດ້ານໄລຍະປີ 2022-2024 ເຊິ່ງຈະໄດ້ຮ່ວມມືກັນໃນຂົງເຂດການເມືອງ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ, ຂົງເຂດວັດທະນະທໍາ-ສັງຄົມ ແລະ ສາທາລະນະສຸກ. ຈາກນັ້ນທັງສອງແຂວງກໍໄດ້ລົງນາມໃສ່ບົດບັນທືກຢ່າງເປັນທາງການໂດຍການຮ່ວມລົງນາມລະຫວ່າງ ສະຫາຍ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ແລະ ສະຫາຍ ດັງງັອກເຮົາ ຮອງປະທານຄະນະກໍາມະການ ປະຊາຊົນແຂວງໂດຍມີຄະນະຜູ້ແທນທັງສອງແຂວງຮ່ວມເປັນສັກຂີພິຍານ.
ຂ່າວ-ພາບ: ອຸ່ນເຮືອນ

แชร์