6 ເດືອນຕົ້ນປີ ແຂວງເຊກອງ ເກັບລາຍຮັບໄດ້ 42% ຂອງແຜນປີ

ຕາມການລາຍງານຂອງ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງເຊກອງ (ສພຂ) ຊຸດທີ II ວັນທີ 16 ສິງຫານີ້ວ່າ: ໃນ 6 ເດືອນຜ່ານມາ ສາມາດຈັດເກັບລາຍຮັບເຂົ້າງົບປະມານໄດ້ 48,23 ຕື້ກີບເທົ່າກັບ 42% ຂອງແຜນການປີ ໃນນີ້ລາຍຮັບພູດສູນກາງປະຕິບັດຢູ່ທ້ອງຖິ່ນ 4,74 ຕື້ກີບເທົ່າກັບ 114% ແລະ ລາຍຮັບພູດຂອງແຂວງເກັບໄດ້ 43,49 ຕື້ກີບເທົ່າກັບ 40%. ສ່ວນລາຍຈ່າຍປະຕິບັດໄດ້ 152,37 ຕື້ກີບເທົ່າກັບ 43% ຂອງແຜນການປີ.

ດ້ານກະສິກໍາ ໄດ້ສຸມໃສ່ຜະລິດກະສິກໍາເປັນສິນຄ້າ ລະຜະລິດເພື່ອຄໍ້າປະກັນສະບຽງອາຫານ ເປັນຕົ້ນ ການປູກພືດທາດແປ້ງ, ປູກກາເຟ, ພືດຜັກ, ໂສມ, ການລ້ຽງສັດເປັນຟາມ ເຮັດໃຫ້ສາມາດຜະລິດຊີ້ນ, ປາ, ໄຂ່ ແລະ ໝູ ໃຫ້ສັງຄົມບໍລິໂພກ ເພື່ອຫລຸດຜ່ອນການນໍາເຂົ້າໄດ້ຫລາຍສົມຄວນ, ໃນນີ້ສາມາດເກັບກູ້ (ຜະລິດເຂົ້ານາແຊງ) ໄດ້ 3.334 ໂຕນ, ມັນຕົ້ນ 208.000 ໂຕນ, ຢາງພາລາ 3.051 ໂຕນ, ກາເຟ 31.318 ໂຕນ, ພືດສະບຽງອາຫານ 5.818 ໂຕນ, ພືດເປັນສິນຄ້າ 11.200 ໂຕນ.

ທ່ານເຈົ້າແຂວງເຊກອງ ຍັງໃຫ້ຮູ້ອີກວ່າ: ສໍາລັບວຽກງານຈຸດສຸມ 6 ເດືອນທ້າຍປີ 2022 ຈະສືບຕໍ່ຊຸກຍູ້ການຜະລິດ, ການລົງທຶນພາຍໃນ ແລະ ຕ່າງປະເທດຂອງຂະແໜງ ກະສິກໍາ, ອຸດສາຫະກໍາ ແລະ ການບໍລິການໃຫ້ແຂງແຮງກວ່າເກົ່າ; ສູ້ຊົນເກັບລາຍຮັບເຂົ້າງົບປະມານໃຫ້ໄດ້ຕາມແຜນ ຫລື ລື່ນແຜນທີ່ກໍານົດໄວ້ ແລະ ສືບຕໍ່ປະຕິບັດມາດຕະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ເປັນຮູບປະທໍາ; ຄຸ້ມຄອງ, ຊຸກຍູ້ບັນດາໂຄງການລົງທຶນຂອງລັດ, ໂຄງການຊ່ວຍເຫລືອລ້າ-ກູ້ຢືມ ທີ່ກໍາລັງຈັດຕັ້ງປະຕິບັດໃຫ້ປະຕິບັດຕາມລະບຽບການປະມູນ, ຕາມສັນຍາທີ່ກໍານົດໄວ້; ຊຸກຍູ້ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ຕາມທິດ 3 ສ້າງໃຫ້ສໍາເລັດຕາມແຜນ ເພື່ອເປັນຕົວຊ່ວຍໜູນການຄົ້ນຄວ້າແກ້ໄຂບັນຫາຮີບດ່ວນ, ບັນດາວຽກຈຸດສຸມຂອງເມືອງ ແລະ ການແກ້ໄຂຄວາມທຸກຍາກຂອງປະຊາຊົນ; ປະຕິບັດຄາດໝາຍຕົວຊີ້ວັດໃນຂົງເຂດວັດທະນະທໍາ-ສັງຄົມ ໃຫ້ສໍາເລັດຕາມຄາດໝາຍ; ຍົກສູງປະສິດທິພາບການຄຸ້ມຄອງ, ບໍລິຫານລັດໃຫ້ມີຄວາມກະທັດຮັດ, ໂປ່ງໃສ ແລະ ຍຸຕິທໍາ; ສືບຕໍ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ ໂດຍເລັ່ງຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ສໍາເລັດຕາມເປົ້າໝາຍແຜນການທີ່ວາງໄວ້.

ຂ່າວ-ພາບ: ສັນຍາ

แชร์