ໂຄງການກໍ່ສ້າງຕາຝັ່ງລຽບແຄມນໍ້າກໍ ແຂວງອຸດົມໄຊ ສຳເລັດແລ້ວ 74,46%

ໂຄງການກໍ່ສ້າງຕາຝັ່ງລຽບຕາມແຄມ ນໍ້າກໍ ເມືອງໄຊ ແຂວງອຸດົມໄຊ ຫຼືໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມເທດສະບານເມືອງໄຊ ແຂວງອຸດົມໄຊ ແມ່ນອົງປະກອບທີ 1 ທີ່ນອນໃນໂຄງການຄຸ້ມຄອງຄວາມສ່ຽງໄພທຳມະຊາດເຂດອາຊີຕາເວັນອອກສ່ຽງໃຕ້ຊຶ່ງແມ່ນທະນາຄານໂລກທີ່ໃຫ້ການຊ່ວຍເຫຼືອດ້ານເງິນກູ້ ແລະ ຊ່ວຍເຫຼືອລ້າໂດຍມອບໃຫ້ຂະແໜງໂຍທາທິການ ແລະຂົງສົ່ງສູນກາງ ແລະແຂວງສົມທົບກັນຈັດຕັ້ງປະຕິບັດ.

ໂຄງການຄຸ້ມຄອງໄພພິບັດນໍ້າຖ້ວມເທດສະບານເມືອງໄຊ ແຂວງອຸດົມໄຊ ປະກອບມີ 2 ຊ່ວງສັນຍາ ໃນນີ້ ສັນຍາທີ່ 1 ແມ່ນເລີ່ມແຕ່ຈຸດ ຂົວນໍ້າກໍ 2 ບ້ານເຈງ ຫາ ຂົວນໍ້າກໍ 4 ຂ້າງສະຫນາມກິລາແຂວງມີຄວາມຍາວທັງຫມົດ 1.320 ແມັດ ລວມມູນຄ່າການກໍ່ສ້າງທັງຫມົດ 3.729.907,62 ໂດລາສະຫະລັດ ( 3 ລ້ານ 7 ແສນກວ່າໂດລາສະຫະລັດ ), ໄລຍະການກໍ່ສ້າງທັງຫມົດ 15 ເດືອນ ( ເດືອນ 6 ປີ 2021 ຫາ ເດືອນ 8 ປີ 2022 ) ໂດຍແມ່ນ ບໍລິສັດ ກວ້າງຕຸ້ງ ເລກ 3 ສປຈີນ ເປັນຜູ້ຮັບເຫມົາກໍ່ສ້າງ. ອີງຕາມບົດສະຫລຸບລາຍງານຂອງພະແນກ ຍທຂ ແຂວງອຸດົມໄຊ ເຫັນວ່າ: ການກໍ່ສ້າງມາຮອດທ້າຍເດືອນ ມິຖຸນາ ( 6 ) ປີ 2022 ນີ້ ຫນ້າວຽກໂດຍລວມແລ້ວແມ່ນສຳເລັດ 74,46% ໃນນີ້ວຽກງານຮາກຖານດິນຕ້ານເຈື່ອນ ສຳເລັດ 94%,ວຽກລຽນຫີນສະຫລົບ ສຳເລັດ 80,5%,ວຽກຕິດຕັ້ງ ແຜ່ນເບຕົງສະຫລົບສຳເລັດ 70%,ວຽກ ວາງທໍ່ລະບາຍນໍ້າ ແລະ ຮ່ອງລະບາຍນໍ້າ ສຳເລັດ 35%, ວຽກສວນສາທາລະນະສຳເລັດ 50%, ວຽກກໍ່ສ້າງຝາຍນໍ້າລົ້ນ ສຳເລັດ95% ແລະວຽກກໍ່ສ້າງເສັ້ນທາງ ສຳເລັດ 30%. ຖ້າຫາກອີງຕາມສັນຍາການກໍ່ສ້າງແລ້ວໂຄງການດັ່ງກ່າວຈະໃຫ້ສຳເລັດໃນເດືອນ ສິງຫາ 2022 ນີ້.

ສ່ວນຊ່ວງສັນຍາທີ 2 ແມ່ນເລີ່ມແຕ່ຈຸດ ຂົວນໍ້າກໍ 4 ຂ້າງພະແນກ ສາທາລະນະສຸກແຂວງຂຶ້ນໄປທາງດ້ານຂວາແມ່ນຮອດຈຸດຂົວນໍ້າກໍ 5 ບ້ານຖິ່ນ ແລະທາງດ້ານຊ້າຍ ແມ່ນຮອດຈຸດຂົວນໍ້າມາວ ບ້ານນາສ້າວ ມີຄວາມຍາວທັງຫມົດ 8.500 ແມັດ. ຄາດຄະເນການກໍ່ສ້າງ ປະມານ 30 ເດືອນ ເຊິ່ງຫນ້າວຽກຫລັກ ປະກອບມີ: ການປ້ອງກັນຕາຝັ່ງເຈື່ອນ, ສ່ວນສາທາລະນະ 1 ຈຸດ, ປະຕູລະບາຍນໍ້າ 21 ຈຸດ ແລະອື່ນໆ ເຊິ່ງປັດຈຸບັນ ແມ່ນສຳເລັດໃນຂັ້ນຕອນການຕີລາຄາ ແລະສຳເລັດທາງດ້ານເອກະສານເພື່ອລາຍງານກະຊວງ ຍທຂ ແລະທະນາຄານໂລກພ້ອມທັງຮັບຮອງ.

ສໍາລັບໂຄງການກໍ່ສ້າງຕາຝັ່ງ ຫລືໂຄງການຄຸ້ມຄອງຄວາມສ່ຽງໄພພິບັດນໍ້ຖ້ວມເທດສະບານເມືອງໄຊ ແຂວງອຸດົມໄຊ ແມ່ນຫນຶ່ງໃນໂຄງການເພື່ອພັດທະນາພື້ນຖານໂຄງລ່າງ ແລະສົ່ງເສີມຂີດຄວາມສາມາດໃຫ້ທ້ອງຖິ່ນກໍຄືເທດສະບານ ເມືອງໄຊ ແຂວງອຸດົມໄຊ ໃນການຄຸ້ມຄອງ ແລະຫລຸດຜ່ອນຄວາມສ່ຽງຈາກໄພພິບັດນໍ້າຖ້ວມ.
ຂ່າວ- ພາບ: ຄານມະນີ ຮຽນດໍຈັນ

แชร์