ລັດຖະມົນຕີກະຊວງພາຍໃນ ຊຸກຍູ້ວຽກງານຂະແໜງພາຍໃນແຂວງວຽງຈັນ

ວັນທີ 15 ສິງຫາ 2022 ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນພ້ອມດ້ວຍຄະນະໄດ້ເດີນທາງໄປເຄື່ອນໄຫວ ແລະຊຸກຍູ້ວຽກງານຢູ່ແຂວງວຽງຈັນ, ຊຶ່ງມີຄະນະພະແນກ,ຫົວໜ້າຫ້ອງການພາຍໃນເມືອງ, ບັນດາຄະນະກົມຂອງກະຊວງພາຍໃນ ແລະພະນັກງານ-ລັດຖະກອນ ພະແນກພາຍໃນແຂວງວຽງຈັນເຂົ້າຮ່ວມ.

ການເຮັດວຽກຮ່ວມກັບພະແນກພາຍໃນຄັ້ງນີ້, ທ່ານລັດຖະມົນຕີກະຊວງພາຍໃນໄດ້ຮັບຟັງການລາຍງານການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະທິດທາງແຜນການ 06 ເດືອນທ້າຍປີ 2022 ຂອງພະແນກພາຍໃນແຂວງວຽງຈັນ ຈາກທ່ານ ພູຄໍາ ສຸດທິຈັກ ຫົວໜ້າພະແນກພາຍໃນແຂວງວຽງຈັນ ຊຶ່ງໄດ້ຍົກໃຫ້ເຫັນວຽກງານທີ່ພົ້ນເດັ່ນຫຼາຍດ້ານໄລຍະຜ່ານມາຄະນະພັກ- ຄະນະພະແນກພາຍໃນແຂວງວຽງຈັນ ໄດ້ເອົາໃຈໃສ່ນໍາພາ-ຊີ້ນໍາ ສະມາຊິກພັກ, ພະນັກງານ-ລັດຖະກອນ ຄົ້ນຄວ້າເຊື່ອມຊຶມບັນດານິຕິກໍາຕ່າງໆຂອງພັກຂອງລັດ ແລະແຜນພັດທະນາເສດຖະກິດ-ສັງຄົມໃນແຕ່ລະໄລຍະ, ເຮັດໃຫ້ພະນັກງານ- ລັດຖະກອນ ມີຄວາມເຂົ້າໃຈແນວທາງນະໂຍບາຍຂອງພັກ-ລັດ ຢ່າງເລິກເຊິງເຮັດໃຫ້ການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງພະນັກງານ-ລັດຖະກອນມີຄວາມຫ້າວຫັນ ແລະມີຄວາມຮັບຜິດ ຊອບສູງ. ໄດ້ຄົ້ນຄວ້ານໍາສະເໜີຂັ້ນເທິງປັບປຸງກົງຈັກຂອງຫ້ອງການອານຸສາວະລີ ທ່ານ ໄກສອນ ພົມວິຫານ ແລະ ຍຸບເລິກອົງການພັດທະນາ ແລະ ບໍລິຫານຕົວເມືອງວັງວຽງ (ອພບຕ), ລົງຊຸກຍູ້ການກໍານົດພາລະບົດບາດ ກົງຈັກການຈັດຕັ້ງ ແລະ ຂຽນຕຳແໜ່ງງານ ຈໍານວນ 6 ພາກສ່ວນ ແລະຄົ້ນຄວ້າການສະເໜີສ້າງຕັ້ງສະມາຄົມ 1 ສະມາຄົມ, ຄົ້ນຄວ້າສະເໜີຂໍໃບຍ້ອງຍໍຜົນງານປະຈຳປີ 2021 ໃຫ້ 28 ພາກສ່ວນ ແລະ ໄດ້ມອບໃບຍ້ອງຍໍ 2,802 ໃບຂັ້ນເມືອງ 1.428 ໃບ ແລະ ມອບໃບຍ້ອງຍໍລັດຖະບານ 05 ໃບ, ຊຸກຍູ້ການປະເມີນການປະຕິບັດງານປະຈຳປີ 2021 ໄດ້ທັງໝົດ 25 ພາກສວ່ນ ແລະປະເມີນເຈົ້າເມືອງ-ຮອງເຈົ້າເມືອງ 11 ເມືອງທົ່ວແຂວງສຳເລັດ, ແຂວງວຽງຈັນ ມີພະນັກງານ-ລັດຖະກອນ ທັງໝົດ 9,884 ຄົນ ຍິງ 4,939 ຄົນ ພະນັກງານ-ລັດຖະກອນເຮັກວຽກບໍລິຫານທັງຂັ້ນແຂວງ-ຂັ້ນເມືອງ 5,223 ຄົນ ຍິງ 2,379 ຄົນ ແລະ ມີພະນັກງານຄູສອນຂັ້ນແຂວງ-ຂັ້ນເມືອງ 4,661 ຄົນ ຍິງ 2,560 ຄົນ.

ໂອກາດນີ້, ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນໄດ້ມີຄໍາເຫັນວ່າອີງຕາມການມອບໝາຍຂອງລັດຖະບານຂະແໜງພາຍໃນພວມສຸມໃສ່ການຈັດຕັ້ງປະຕິບັດວຽກງານບຸລິມະສິດຈຸດສຸມສໍາຄັນຈໍານວນໜຶ່ງ ໃນໄລຍະ ແຕ່ປີ 2021-2025 ເປັນຕົ້ນ: ຂະແໜງພາຍໃນ ຈະໄດ້ສຸມໃສ່ການຄົ້ນຄວ້າ, ປັບປຸງ ແລະ ສ້າງນິຕິກໍາ ທີ່ຕິດພັນກັບພາລະບົດບາດຂະແໜງພາຍໃນ; ຄົ້ນຄວ້າປັບປຸງການຈັດຕັ້ງໃຫ້ໄປຕາມທິດກະທັກຮັດສົມເຫດສົມຜົນຂອງລັດຖະບານ, ເຮັດວຽກບໍ່ຊໍ້າຊ້ອນກ້າວກ່າຍວຽກງານກັນ, ມີຄວາມເຂັ້ມແຂງ ແລະ ມີປະສິດທິພາບ; ຫັນວຽກງານຄຸ້ມຄອງພະນັກງານ-ລັດຖະກອນ ເປັນທັນສະໄໝເທື່ອລະກ້າວ, ເອົາ ໃຈໃສ່ການປະເມີນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ໃຫ້ເຂັ້ມງວດຕາມນິຕິກໍາທີ່ໄດ້ກໍານົດໄວ້,ຄົ້ນຄວ້າແນວທາງ-ກົນໄກໃນການຫຼຸດຜ່ອນຈໍານວນພະນັກງານ-ລັດຖະກອນລົງ ເພື່ອຫຼຸດລາຍຈ່າຍງົບປະມານຂອງລັດຖະບານ ພ້ອມທັງຄົ້ນຄວ້າຫັນຫົວ ໜ່ວຍວິຊາການທີ່ມີລາຍຮັບໄປກຸ້ມຕົນເອງທາງດ້ານງົບປະມານເທື່ອລະກ້າວ ແລະຫັນພະນັກງານ-ວິຊາການ ທີ່ຢູ່ຫົວໜ່ວຍວິຊາການດັ່ງກ່າວເປັນພາລະກອນເພື່ອຫຼຸດຜ່ອນຈໍານວນພະນັກງານ-ລັດຖະກອນ; ຫັນວຽກງານຄຸ້ມຄອງພົນລະເມືອງໃຫ້ເປັນລະບົບທັນສະໄໝໃນຂອບເຂດທົ່ວປະເທດໂດຍເລັ່ງໃສ່ການຈົດທະບຽນຕ່າງໆ ທີ່ພົວພັນເຖິງຄວາມຮັບຜິດຊອບຂອງຂະແໜງພາຍໃນ; ແກ້ໄຂເຂດແດນເຊື່ອມຕໍ່ລະຫວ່າງແຂວງໃຫ້ສໍາເລັດພາຍໃນປີ 2022 ນີ້ ແລະປະຕິບັດວຽກງານສາມສ້າງໃຫ້ເຂົ້າສູ່ລວງເລິກ; ເອົາໃຈໃສ່ທ້ອນໂຮມເກັບກໍາເອກະສານສໍາຄັນທາງປະຫວັດສາດ ແລະວັດທະນະທໍາ-ສັງຄົມ; ຮ່ວມກັບພາກສ່ວນກ່ຽວຂ້ອງປະຕິບັດໂຄງການສໍາຫຼວດ, ວັດແທກປັກຫຼັກໝາຍ ແລະ ສ້າງແຜນທີ່ເສັ້ນຊາຍແດນລະຫວ່າງຊາດກັບບັນດາປະເທດທີ່ຍັງບໍ່ສໍາເລັດ; ຄົ້ນຄວ້າຮູບການ ແລະວິທີການມາດຕະຖານ, ຕົວຊີ້ວັດເພື່ອເປັນບ່ອນອີງໃຫ້ແກ່ການຄັດເລືອກຜົນງານໃນການຍ້ອງຍໍບຸກຄົນ ແລະກົມກອງລວມໝູ່.

ໃນໂອກາດດຽວກັນນີ້ ທ່ານລັດຖະມົນຕີກະຊວງພາຍໃນຍັງໄດ້ມອບອຸປະກອນໄອທີທີ່ໄດ້ຮັບການສະໜັບສະໜູນຈາກລັດຖະບານເຢຍລະມັນຜ່ານແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ(ແຜນງານເຊກາ-CEGGA) ໃຫ້ພະແນກພາຍໃນແຂວງວຽງຈັນ ປະກອບມີ: ໂນດບຸກ 02 ຊຸດ ແລະອຸປະກອນດໍາເນີນກອງປະຊຸມທາງໄກ 01 ຊຸດ ແລະໄດ້ມອບໂນດບຸກໃຫ້ບັນດາຫ້ອງການພາຍໃນເມືອງ ເມືອງລະ 01 ຊຸດ.

แชร์