ຄຳມ່ວນ ຈັດປາຖະກະຖາ 2 ວັນສຳຄັນ

ພິທີປາຖະກະຖາວັນລັດຖະທຳມະນູນແຫ່ງ ສປປ ລາວ ຄົບຮອບ 31 ປີ (15 ສິງຫາ 1991-15 ສິງຫາ 2022) ແລະມູນເຊື້ອວັນສ້າງຕັ້ງສານປະຊາຊົນຄົບຮອບ 40 ປີ (15 ສິງຫາ 1982-15 ສິງຫາ 2022) ຈັດຂຶ້ນໃນວັນທີ 15 ສິງຫາ 2022 ໂດຍການປາຖະກະຖາຂອງທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງ, ມີພະນັກງານອາວຸໂສບຳນານ, ບັນດາເມືອງ, ພະແນກການ ແລະພະນັກງານວິຊາການຈາກພາກສ່ວນຕ່າງໆ ອ້ອມຂ້າງແຂວງເຂົ້າຮ່ວມ.

ໂອກາດນີ້, ທ່ານ ບຸນມີ ພິມມະສອນ ໄດ້ຍົກໃຫ້ເຫັນປະຫວັດຄວາມເປັນມາຂອງວັນສ້າງຕັ້ງລັດຖະທຳມະນູນໂດຍສະເພາະແມ່ນສະພາບແວດລ້ອມແຫ່ງການກຳເນີດ ລັດຖະທຳມະນູນຂອງ ສປປ ລາວພາຍຫລັງປະເທດຊາດ ໄດ້ຮັບການສະຖາປະນາເປັນ ສປປ ລາວ ພັກໄດ້ວາງແນວທາງ ແລະ ນຳພາປະຊາຊົນປະຕິບັດສອງໜ້າາທີ່ຍຸດທະສາດຄື: ປົກປັກຮັກສາແລະ ສ້າງສາພັດທະນາປະເທດຊາດ. ປີ 1986 ພັກໄດ້ວາງແນວທາງປ່ຽນແປງໃໝ່ຮອບດ້ານໂດຍເລີ່ມຈາກການປ່ຽນແປງທາງດ້ານເສດຖະກິດ, ຫັນຈາກການຄຸ້ມຄອງລວມສູນບໍລິຫານເກື້ອກູນໄປສູ່ການຄຸ້ມຄອງຕາມກົນໄກຕະຫລາດ ທີ່ມີການໄລ່ລຽງເສດຖະກິດ ແລະ ມີການດັດສົມຂອງລັດໂດຍອີງໃສ່ຄວາມຮຽກຮ້ອງຕ້ອງການແຫ່ງການປ່ຽນແປງໃໝ່ດັ່ງກ່າວ ຈຶ່ງມີຄວາມຈຳເປັນຕ້ອງຫັນໄປສູ່ການຄຸ້ມຄອງລັດ ດ້ວຍລັດຖະທຳມະນູນ ແລະກົດໝາຍຢ່າງເປັນເອກະພາບ, ດ້ວຍເຫດນັ້ນກອງປະຊຸມເທື່ອທີ 6 ຂອງສະພາປະຊາຊົນສູງສຸດ ຊຸດທີ II (ປີ 1991) ຈຶ່ງໄດ້ພິຈາລະນາຮັບຮອງເອົາ ລັດຖະທຳມະນູນສະບັບທຳອິດຂອງ ສປປ ລາວ ເຊິ່ງໄດ້ປະກາດໃຊ້ໃນວັນທີ 15 ສິງຫາ 1991.

ພ້ອມນີ້, ທ່ານກໍໄດ້ຍົກໃຫ້ເຫັນເຖິງມູນເຊື້ອ 40 ປີ ແຫ່ງການເຕີບໃຫຍ່ຂະຫຍາຍຕົວຂອງສານປະຊາຊົນແຫ່ງ ສປປ ລາວເ ປັນຕົ້ນແມ່ນການປັບປຸງການຈັດຕັ້ງ ແລະ ການດໍາເນີນຄະດີຂອງສານປະຊາຊົນແຕ່ລະໄລຍະໄດ້ເຮັດໃຫ້ການຈັດຕັ້ງຂອງສານປະຊາຊົນມີການປ່ຽນແປງ, ເຕີບໃຫຍ່ຂະຫຍາຍຕົວ ແລະພັດທະນາຂຶ້ນຢ່າງບໍ່ຢຸດຢັ້ງ, ປັດຈຸບັນການຈັດຕັ້ງຂອງສານປະຊາຊົນໃນທົ່ວປະເທດປະກອບດ້ວຍສານປະຊາຊົນສູງສຸດ 1 ແຫ່ງ, ໄລຍະ 40 ປີຜ່ານມາ, ສານປະຊາຊົນໄດ້ຮັບການປັບປຸງກໍ່ສ້າງນັບມື້ນັບເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ຕັ້ງໜ້າປະຕິບັດໜ້າທີ່ການເມືອງດ້ວຍຄວາມຮັບຜິດຊອບສູງ ແລະມີຜົນສໍາເລັດເປັນກ້າວໆມາເຮັດໃຫ້ໄດ້ຮັບຄວາມເຄົາລົບເຊື່ອຖືຈາກປະຊາຊົນ ແລະໄດ້ຮັບຄວາມໄວ້ວາງໃຈຈາກພັກ-ລັດ ເປັນຢ່າງດີ ແລະມີຜົນງານຫລາຍດ້ານ.
ຂ່າວ-ພາບ: ແດງສະຫວັດ

แชร์