ຍົກສູງວຽກງານເຜີຍແຜ່ລັດຖະທຳມະນູນ, ກົດໝາຍ ແລະນິຕິກຳໃຕ້ກົດໝາຍ

ຊຸດອົບຮົມວຽກງານໂຄສະນາເຜີຍແຜ່ລັດຖະທຳມະນູນ, ກົດໝາຍ ແລະນິຕິກຳໃຕ້ກົດໝາຍໃຫ້ແກ່ພະນັກງານ-ລັດຖະກອນ ຂອງກຳມາທິການກົດໝາຍ ແລະສະພາປະຊາຊົນຂັ້ນແຂວງ ຈັດຂຶ້ນໃນວັນທີ 15-17 ສິງຫາ 2022 ທີ່ແຂວງຫຼວງພະບາງ ໂດຍການເປັນປະທານຂອງ ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ທັງເປັນປະທານກໍາມາທິການກົດໝາຍ, ມີຮອງປະທານກໍາມາທິການກົດໝາຍ, ຮອງຫົວໜ້າກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ ແລະພະນັກງານ-ລັດຖະກອນ ສະພາປະຊາຊົນຂັ້ນແຂວງ 18 ແຂວງ ເຂົ້າຮ່ວມ ໂດຍໄດ້ຮັບການສະໜັບສະໜູນຈາກແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະການສ້າງລັດທີ່ປົກຄອງດ້ວຍກົດໝາຍ ຫລືແຜນງານເຊກາ.

ການຈັດອົບຮົມຄັ້ງນີ້, ກໍເພື່ອໃຫ້ພະນັກງານ-ລັດຖະກອນຂອງກຳມາທິການກົດໝາຍ ແລະສະພາປະຊາຊົນຂັ້ນແຂວງໄດ້ຮັບການເພີ່ມຄວາມຮັບຮູ້ກ່ຽວກັບວຽກງານໂຄສະນາເຜີຍແຜ່ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ, ຕອບສະໜອງໄດ້ຄວາມຮຽກຮ້ອງຕ້ອງການໃນການປະຕິບັດໜ້າທີ່ວຽກງານຜ່ານການແລກປ່ຽນບົດຮຽນ ແລະຄຳຄິດຄຳເຫັນກັບກົມວິຊາການຂອງກະຊວງຍຸຕິທຳ ແລະຊ່ຽວຊານຂອງແຜນງານເຊກາໃນວຽກງານໂຄສະນາເຜີຍແຜ່ກົດໝາຍ.

ໂອກາດນີ້, ຜູ້ເຂົ້າຮ່ວມໄດ້ຮັບຟັງທັກສະການໂຄສະນາເຜີຍແຜ່ກົດໝາຍທີ່ມີປະສິດທິພາບຈາກທ່ານຫົວໜ້າໂຄງການສ້າງລັດທີ່ປົກຄອງລັດດ້ວຍກົດໝາຍ ແລະສິດທິມະນຸດ (SO3) ແຜນງານເຊກາ, ຮັບຟັງບົດຮຽນຜົນສຳເລັດ ແລະຄວາມຄືບໜ້າວຽກງານໂຄສະນາເຜີຍແຜ່ກົດໝາຍຂອງກົມໂຄສະນາເຜີຍແຜ່ກົດໝາຍກະຊວງຍຸຕິທຳ, ຮັບຟັງການບັນລະຍາຍບົດຮຽນກ່ຽວກັບການສື່ສານທີ່ມີປະສິດທິພາບ ແລະ ການໂຄສະນາເຜີຍ ແຜ່ກົດໝາຍໂດຍນຳໃຊ້ເຄື່ອງມືສື່ສານ. ຈາກນັ້ນ, ບັນດາຜູ້ເຂົ້າຮ່ວມກໍໄດ້ຈັດແບ່ງກຸ່ມຄົ້ນຄວ້າ ແລະສ້າງບົດໂຄສະນາເຜີຍແຜ່ກົດໝາຍໃຫ້ແທດເໝາະກັບການປະຕິບັດຕົວຈິງ.
ຂ່າວ: ກຸກກິກ ບຸດດາໄຊ
ພາບ: ກົງໃຈ ແສງອໍາພັນ

แชร์