ບໍລິສັດ ກິດຕິວົງການໄຟຟ້າ ຊຸກຍູ້ນະຄອນຫຼວງພະບາງ ຈັດງານບຸນຊ່ວງເຮືອ ປະຈຳປີ 2022 ມູນຄ່າ 2 ລ້ານກີບ

ວັນທີ 12 ສິງຫາ 2022 ນີ້ ນະຄອນຫຼວງພະບາງ ໄດ້ຈັດພິທີມອບໃບກຽດຕິຄຸນໃຫ້ບໍລິສັດກິດຕິວົງການໄຟຟ້າທີ່ໄດ້ປະກອບສ່ວນທາງດ້ານວັດຖຸປັດໃຈເປັນເງິນສົດ ມູນຄ່າ 2,000,000 ກີບເຂົ້າໃນການຈັດງານບຸນຫໍ່ເຂົ້າປະດັບດິນຊ່ວງເຮືອເດືອນເກົ້າ ( 9 ) ປະຈຳປີ ພສ 2565 ຄສ 2022 ທີ່ນະຄອນ-ຫຼວງພະບາງ ມໍລະດົກໂລກ.

ພິທີມອບ-ຮັບໄດ້ຈັດຂຶ້ນ ທີ່ຫ້ອງປະຊຸມຫ້ອງວ່າການນະຄອນຫຼວງພະບາງ, ມີທ່ານ ຈັນທີ ກິດຕິວົງ ປະທານບໍລິສັດກິດຕິວົງການໄຟຟ້າມີບັນດາການນຳນະຄອນຫຼວງພະບາງ, ແລະທິມງານເຂົ້າຮ່ວມເປັນສັກຂີ.

ໃນພິທີ ທ່ານ ຈັນທີ ກິດຕິວົງ ປະທານບໍລິສັດການໄຟຟ້າກິດຕິວົງ ໄດ້ກ່າວມອບເງິນອຸປະຖຳງານບຸນຫໍ່ເຂົ້າປະດັບດິນ ຈຳນວນ 2,000,000 ກີບ ປະກອບສ່ວນໃຫ້ນະຄອນຫຼວງພະບາງຈັດງານບຸນ ມີບັນຍາກາດຄຶກຄື້ນເບີກບານມ່ວນຊື່ນ ເຊິ່ງໃຫ້ກຽດກ່າວຮັບໂດຍທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ພ້ອມດ້ວຍຄະນະທີ່ໄດ້ເຂົ້າຮ່ວມເປັນສັກຂີ.

ໂອກາດດັ່ງກ່າວ ທ່ານ ວຽງທາອງ ຫັດສະຈັນ ເຈົ້ານະຄອນ-ຫຼວງພະບາງ ໄດ້ມອບໃບກຽດຕິຄຸນຂອງ ທ່ານ ເຈົ້ານະຄອນ ເພື່ອສະແດງຄວາມຮູ້ບຸນຄຸນ ເປັນອານຸສອນເອກອ້າງຜົນງານຂອງ ບໍລິສັດກິດຕິວົງການໄຟຟ້າ ທີ່ໄດ້ໃຫ້ການອຸປະຖຳຊຸກຍູ້ຊ່ວຍເຫຼືອນະຄອນຫຼວງພະບາງຈັດງານບຸນຕະຫຼອດມານອກນັ້ນທ່ານຍັງໄດ້ອວຍພອນຕໍ່ທ່ານ ຈັນທີ ກິດຕິວົງ ແລະຄອບຄົວ ຈົ່ງມີສຸຂະພາບແຂງແຮງປະສົບຜົນສຳເລັດທຸກໜ້າທີ່ວຽກງານ ແລະມີຄວາມຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.

ຂ່າວໂດຍ: ສົມພອນ ວິໄລຜົນ

แชร์