ທະນາຄານ STB ຊຸກຍູ້ນະຄອນຫຼວງພະບາງ ຈັດງານບຸນຊ່ວງເຮືອ ປະຈຳປີ 2022 ລວມມູນຄ່າ 5 ລ້ານກີບ

ວັນທີ 12 ສິງຫາ 2022 ນີ້ ນະຄອນຫຼວງພະບາງ ໄດ້ຈັດພິທີມອບໃບກຽດຕິຄຸນໃຫ້ທະນາຄານ STB ທີ່ໄດ້ປະກອບສ່ວນທາງດ້ານວັດຖຸປັດໃຈເປັນເງິນສົດ ມູນຄ່າ 5,000,000 ກີບ ເຂົ້າໃນການຈັດງານບຸນຫໍ່ເຂົ້າປະດັບດິນຊ່ວງເຮືອເດືອນເກົ້າ ( 9 ) ປະຈຳປີ ພສ 2565 ຄສ 2022 ທີ່ນະຄອນ-ຫຼວງພະບາງ ມໍລະດົກໂລກ
ພິທີມອບ-ຮັບໄດ້ຈັດຂຶ້ນ ທີ່ຫ້ອງປະຊຸມຫ້ອງວ່າການນະຄອນຫຼວງພະບາງ, ມີ ທ່ານ ດວງຄຳ ສິລິວົງສາ ຮັກສາການ ຜູ້ຈັດການ ທະນາຄານ STB ຈຳກັດ , ມີບັນດາການນຳນະຄອນຫຼວງພະບາງ, ແລະທິມງານເຂົ້າຮ່ວມເປັນສັກຂີ.

ໃນພິທີ ທ່ານ ດວງຄຳ ສິລິວົງສາ ຮັກສາການ ຜູ້ຈັດການ ທະນາຄານ STB ຈຳກັດ ໄດ້ກ່າວມອບເງິນອຸປະຖຳງານບຸນຫໍ່ເຂົ້າປະດັບດິນຈຳນວນ 5,000,000 ກີບ ປະກອບສ່ວນໃຫ້ນະຄອນຫຼວງພະບາງຈັດງານບຸນມີບັນຍາກາດຄຶກຄື້ນເບີກບານມ່ວນຊື່ນເຊິ່ງໃຫ້ກຽດກ່າວຮັບໂດຍທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ພ້ອມດ້ວຍຄະນະທີ່ໄດ້ເຂົ້າຮ່ວມເປັນສັກຂີ.

ໂອກາດດັ່ງກ່າວ ທ່ານ ວຽງທາອງ ຫັດສະຈັນ ເຈົ້ານະຄອນ-ຫຼວງພະບາງ ໄດ້ມອບໃບກຽດຕິຄຸນຂອງທ່ານເຈົ້ານະຄອນເພື່ອສະແດງຄວາມຮູ້ບຸນຄຸນເປັນອານຸສອນເອກອ້າງຜົນງານຂອງທະນາຄານ STB ພ້ອມດ້ວຍທິມງານທີ່ໄດ້ໃຫ້ການອຸປະຖຳຊຸກຍູ້ຊ່ວຍເຫຼືອນະຄອນຫຼວງພະບາງຈັດງານບຸນຕະຫຼອດມານອກນັ້ນທ່ານຍັງໄດ້ອວຍພອນຕໍ່ທ່ານ ດວງຄຳ ສິລິວົງສາ ຮັກສາການຜູ້ຈັດການ ທະນາຄານ STB ຈຳກັດພ້ອມດ້ວຍທິມງານຈົ່ງມີສຸຂະພາບແຂງແຮງປະສົບຜົນສຳເລັດທຸກໜ້າທີ່ວຽກງານ ແລະມີຄວາມຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.
ຂ່າວໂດຍ: ສົມພອນ ວິໄລຜົນ

แชร์