ໂຮມຊຸມນຸມ ສະຫຼອງວັນສື່ມວນຊົນ ແລະການພິມຈຳໜ່າຍ ຄົບຮອບ 72 ປີ

ພິທີໂຮມຊຸມນຸມ ເນື່ອງໃນໂອກາດ ວັນສື່ມວນຊົນ ແລະ ການພິມຈຳໜ່າຍ ຄົບຮອບ 72 ປີ ໄດ້ຈັດຂຶ້ນ ໃນວັນທີ 12 ສິງຫາ 2022 ທີ່ຫໍວັດທະນະທໍາແຫ່ງຊາດໂດຍການໃຫ້ກຽດເຂົ້າຮ່ວມຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະທ່ອງທ່ຽວ (ຖວທ), ມີທ່ານຮອງລັດຖະມົນຕີ, ອະດີດພະນັກງານອາວຸໂສບໍານານພ້ອມດ້ວຍສື່ມວນຊົນທຸກຂະແໜງການອ້ອມຂ້າງສູນກາງເຂົ້າຮ່ວມ.

ໃນໂອກາດນີ້, ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ໄດ້ຫວນຄືນເຖິງປະຫວັດ, ມູນເຊື້ອ ແລະຜົນງານທີ່ພົ້ນເດັ່ນຂອງວຽກງານສື່ມວນຊົນ ແລະ ການພິມຈຳໜ່າຍ ຄົບຮອບ 72 ປີ (13/8/1950-13/8/2022) ໃນການປະກອບສ່ວນ, ໄດ້ປະກອບສ່ວນເຂົ້າໃນພາລະກິດແຫ່ງການຕໍ່ສູ້ກູ້ຊາດໃນເມື່ອກ່ອນ ກໍຄືພາລະກິດແຫ່ງການປົກປັກຮັກສາ ແລະພັດທະນາ ປະເທດຊາດ ໃນໄລຍະໃໝ່. ທ່ານ ໂພສີ ແກ້ວມະນີວົງ ຍັງໄດ້ລາຍງານໃຫ້ຮູ້ກ່ຽວກັບການຈັດຕັ້ງປະຕິບັດວຽກງານ ໃນ 6 ເດືອນຕົ້ນປີ 2022 ເຫັນວ່າມີຜົນສໍາເລັດຫຼາຍດ້ານ ໂດຍສະແດງອອກ ການປະຕິບັດໜ້າທີ່ຕາມພາລະບົບບາດ ຂອງຕົນຮັບຜິດຊອບໄດ້ເປັນຢ່າງດີ ເວົ້າລວມ, ເວົ້າສະເພາະການອອກໂຄສະນາວຽກງານສໍາຄັນຕ່າງໆ ຂອງພັກ, ຂອງຊາດ ໄດ້ຢ່າງກວ້າງຂວາງ, ເປັນລະບົບ ແລະຕໍ່ເນື່ອງເຮັດໃຫ້ສັງຄົມ ກໍຄື ປະຊາຊົນ ໄດ້ຮັບຂໍ້ມູນຂ່າວສານ ທີ່ຖືກຕ້ອງ ພ້ອມກັນນີ້ກໍສາມາດຕອບໂຕ້ຖ້ອຍທໍານອງຂອງກຸ່ມຄົນບໍ່ດີໄດ້ຢ່າງທັນການ ແລະສ້າງຄວາມຮັບຮູ້, ເຂົ້າໃຈໃຫ້ແກ່ປະຊາຊົນ. ນອກນັ້ນ, ສື່ມວນຊົນ ກໍໄດ້ປະກອບສ່ວນວຽກງານຢ່າງຕັ້ງໜ້າເຖິງວ່າຈະພົບກັບຄວາມຫຍຸ້ງຍາກປານໃດກໍຕາມ ເປັນຕົ້ນໃນສະພາບການລະບາດຂອງພະຍາດໂຄວິດ-19 ແລະ ສະພາບເສດຖະກິດ-ການເງິນ ໄດ້ກະທົບຕໍ່ການເຄື່ອນໄຫວວຽກງານສື່ມວນຊົນບໍ່ໜ້ອຍແຕ່ສື່ມວນຊົນກໍໄດ້ພະຍາຍາມບຸກບືນ, ຍົກສູງນໍ້າໃຈເສຍສະຫຼະເພື່ອຜົນປະໂຫຍດສ່ວນລວມກໍຄືຂອງຊາດ ແລະໄດ້ປຸກລະດົມສັງຄົມເຂົ້າຮ່ວມວຽກງານປົກປັກຮັກສາ ແລະພັດທະນາປະເທດຊາດຢ່າງຕໍ່ເນື່ອງ.

ໃນໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: 72 ປີ ແຫ່ງການສ້າງຕັ້ງສື່ມວນຊົນ ແລະການພິມຈຳໜ່າຍ ກໍຄື 47 ປີແຫ່ງການປົກປັກຮັກສາ ແລະ ພັດທະນາປະເທດຊາດ, ຜ່ານມາສື່ມວນຊົນ ແລະການພິມຈຳໜ່າຍ ທຸກອົງການທັງຢູ່ສູນກາງ ແລະທ້ອງຖິ່ນໄດ້ເຕີບໃຫຍ່ເຂັ້ມແຂງໄດ້ປະກອບສ່ວນຢ່າງສຳຄັນ ໃຫຍ່ຫຼວງເຂົ້າໃນພາລະກິດແຫ່ງການຕໍ່ສູ້ກູ້ຊາດໃນເມື່ອກ່ອນກໍຄືພາລະກິດແຫ່ງການປົກປັກຮັກສາ ແລະພັດທະນາປະເທດຊາດໃນໄລຍະໃໝ່ໂດຍສະເພາະການເຄື່ອນໄຫວວຽກງານຂອງສື່ມວນຊົນ ແລະການພິມຈຳໜ່າຍໃນໜຶ່ງປີຜ່ານມາໄດ້ປະສົບກັບອຸປະສັກ ແລະສິ່ງທ້າທາຍທັງພາຍໃນ ແລະພາຍນອກເປັນຕົ້ນ, ການລະບາດຂອງພະຍາດໂຄວິດ-19, ຄວາມຫຍຸ້ງຍາກທາງດ້ານເສດຖະກິດບັນດາສະຫາຍນັກຂ່າວຍັງມີຄວາມຮັບຜິດຊອບສູງຕໍ່ວຽກງານທີ່ໄດ້ຮັບມອບໝາຍ, ໄດ້ເຄື່ອນໄຫວວຽກງານພາກສະໜາມເພື່ອເກັບກຳຂ່າວກໍໄດ້ຕິດເຊື້ອແຕ່ບັນດາສະຫາຍເຫຼົ່ານັ້ນຍັງໄດ້ເຮັດວຽກຮູບແບບອອນລາຍຢູ່ເຮືອນໂດຍບໍ່ໄດ້ປະລະໜ້າທີ່. ສິ່ງນີ້ສະແດງໃຫ້ເຫັນເຖິງຄວາມຕັດສິນໃຈ, ຄວາມເສຍສະຫຼະ, ຄວາມຮັບຜິດຊອບການເມືອງຂອງພະນັກງານ, ສະມາຊິກພັກນັກຮົບສື່ມວນຊົນສົມກັບຄຳເວົ້າທີ່ວ່າ: ສື່ມວນຊົນ ແລະ ການພິມຈຳໜ່າຍແມ່ນອາວຸດທີ່ແຫຼມຄົມທີ່ມີຜົນງານຢ່າງຫຼວງຫຼາຍ ແລະນຳເອົາຜົນປະໂຫຍດໃຫຍ່ຫຼວງທີ່ສຸດໃຫ້ແກ່ປະເທດຊາດ.

ທ່ານ ນາງ ສວນສະຫວັນ ວິຍະເກດ ຍັງເນັ້ນໃຫ້ ສື່ມວນຊົນ ແລະການພິມຈຳໜ່າຍເອົາໃຈໃສ່ຍົກລະດັບຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຮູ້ຄວາມສາມາດ ທາງດ້ານວິຊາການໃຫ້ເລິກເຊິ່ງ ແລະ ເປັນມືອາຊີບ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ; ຫັນເອົາແນວທາງ ນະໂຍບາຍຂອງພັກ, ລະບຽບກົດໝາຍຂອງລັດ ເປັນອັນລະອຽດ ເຂົ້າສູ່ວຽກງານຕົວຈິງ ເພື່ອໃຫ້ວຽກງານສື່ມວນຊົນພັດທະນາໄປຢ່າງຖືກທິດ, ໜັກແໜ້ນ ສືບຕໍ່ຫັນເປັນທັນສະໄໝດ້ານຂໍ້ມູນຂ່າວສານ ເພື່ອຮັບໃຊ້ສັງຄົມ ໃນທາງສ້າງສັນ ແລະ ເກີດຜົນປະໂຫຍດສູງສຸດ; ສ້າງ ແລະ ຍົກລະດັບຄຸນທາດການເມືອງໃຫ້ບຸກຄະລະກອນສື່ມວນຊົນເວົ້າລວມ, ເວົ້າສະເພາະ ແມ່ນຫົວໜ້າອົງການສື່ມວນຊົນ, ຄະນະບັນນາທິການ ໃຫ້ໄດ້ຮຽນທິດສະດີການເມືອງ-ການປົກຄອງ; ເອົາໃຈໃສ່ກໍ່ສ້າງ ແລະ ປັບປຸງຮາກຖານພັກ ໃນຂົງເຂດສື່ມວນຊົນໃຫ້ ເຂັ້ມແຂງ, ປອດໃສ, ໜັກແໜ້ນ; ເປັນເຈົ້າການ ປັບປຸງຕົນເອງທັງທາງດ້ານເນື້ອໃນ ແລະ ຮູບການໃຫ້ກະທັດລັດ, ແທດຕົວຈີງ ແລະ ມີປະສິດທິຜົນສູງຂຶ້ນ, ຮັບປະກັນຄວາມໝັ້ນຄົງດ້ານຂໍ້ມູນຂ່າວສານ, ໂຄສະນາເຜີຍແຜ່ຄ່ານິຍົມທີ່ຮັກ ຊາດ, ຮັກລະບອບໃໝ່ (ຊົມໃຊ້ຜະລິດຕະພັນລາວ, ສົ່ງເສີມບຸກຄົນດີເດັ່ນ, ບຸກຄົນຕົວແບບ, ຄອບຄົວຕົວແບບ ກໍຄືປະຊາຊົນ ເປັນຕົ້ນການປູກຝັງລ້ຽງສັດໃຫ້ຜະລິດເປັນສິນຄ້າສົ່ງອອກ, ຄ່ານິຍົມທີ່ກ້າວໜ້າ, ເຜີຍແຜ່ວັດທະນະທໍາທີ່ດີງາມ ແລະໂຄສະນາການດຶງດູດການທ່ອງທ່ຽວພາຍໃນປະເທດຂອງພວກເຮົາ); ເອົາໃຈໃສ່ຕິດຕາມກວດກາເນື້ອໃນ,ຫາງສຽງສັງຄົມຖ້ອຍທຳນອງທີ່ບໍ່ຫວັງດີຕໍ່ລະບອບໃໝ່;ກໍ່ສ້າງປັບປຸງສ້ອມແປງພື້ນຖານໂຄງລ່າງ, ວັດຖຸເຕັກນິກທີ່ມີຢູ່ແລ້ວໃຫ້ສາມາດໃຊ້ການໄດ້ປົກກະຕິພ້ອມທັງໃຫ້ເພີ່ມຂຶ້ນທັງທາງດ້ານປະລິມານ ແລະ ຄຸນນະພາບ, ຄວບຄຸມພື້ນທີ່ທັງພາຍໃນ ແລະຕ່າງປະເທດຮັບປະກັນຫັນເຕັກນິກ, ເຕັກໂນໂລຢີ ແລະຂະຫຍາຍເຄື່ອຂ່າຍໄປສູ່ລະບົບດິຈິຕອນໃຫ້ກວມທຸກພື້ນທີ່ພາຍໃນປະເທດ ແລະ ກວ້າງໄກເຊື່ອມຈອດສາກົນໃຫ້ເປັນຮູບປະທໍາຫຼາຍຂຶ້ນ; ເອົາໃຈໃສ່ການສ້າງຄວາມເຂັ້ມແຂງຫັນໄປສູ່ກຸ້ມຕົນເອງດ້ານລາຍຮັບວິຊາການຕາມເງື່ອນໄຂຕົວຈິງໂດຍຊຸກຍູ້ໃຫ້ມີການປັບປຸງ, ກົນໄກ, ຂັ້ນຕອນ, ວິທີການ ແລະລະບຽບການຕ່າງໆ ທີ່ກ່ຽວຂ້ອງເພື່ອອໍານວຍຄວາມສະດວກໃຫ້ອົງການສື່ມວນຊົນ ແລະອົງການລັດວິຊາການປະຕິບັດໜ້າທີ່ຮັບໃຊ້ໜ້າທີ່ການເມືອງໃຫ້ທ່ວງທັນກັບວຽກງານ ແລະສອດຄ່ອງກັບສະພາບຕົວຈິງ.

แชร์