ກອງປະຊຸມ ສະພາປະຊາຊົນແຂວງຈໍາປາສັກ ຈະຈັດຂຶ້ນ 17-18 ສິງຫາ ນີ້

ຫວ່າງບໍ່​ດົນ​ມານີ້ ທີ່ສະພາປະຊາຊົນແຂວງຈໍາປາສັກ, ທ່ານ ສົມສີ ມະນີນິນ ກໍາມະການພັກແຂວງຮອງປະທານຄະນະປະຈໍາສະພາປະຊາຊົນແຂວງຈໍາປາສັກ ໄດ້ຖະແຫຼງການກ່ຽວກັບການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຈໍາປາສັກ ຊຸດທີ II ຕໍ່ບັນດາສື່ມວນຊົນແຂວງວ່າ: ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຈໍາປາສັກ ຊຸດທີ II ຈະໄດ້ດໍາເນີນໃນລະຫວ່າງວັນທີ 17-18 ສິງຫາ 2022 ນີ້ ຊຶ່ງກອງປະຊຸມຈະໄດ້ພິຈາລະນາ ແລະຮັບຮອງເອົາບັນຫາສຳຄັນດັ່ງນີ້:

  1. ຄົ້ນຄວ້າພິຈາລະນາ ແລະຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022 ຂອງແຂວງ.
    2. ຄົ້ນຄວ້າພິຈາລະນາ ແລະຮັບຮອງເອົາບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນ ຕົ້ນປີ ແລະທິດທາງແຜນການ 6 ເດືອນທ້າຍປີ 2022 ຂອງແຂວງ.
    3. ຄົ້ນຄວ້າພິຈາລະນາ ແລະຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບຜົນການຊຸກຍູ້, ຕິດຕາມກວດກາ ສັນຍາເຊົ່າສຳປະທານ ແລະການຈັດເກັບລາຍຮັບ ຈາກເນື້ອທີ່ດິນລັດຕາມຂໍ້ຕົກລົງຂອງທ່ານເຈົ້າແຂວງ ສະບັບເລກທີ 431/ຈຂ.ຈສ, ລົງວັນທີ 13 ພຶດສະພາ 2021.
    4. ຄົ້ນຄວ້າພິຈາລະນາ ແລະຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບຄວາມຄືບໜ້າການຈັດຕັ້ງປະຕິບັດວາລະຂອງແຂວງ ຕາມເນື້ອໃນວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດໃນໄລຍະຜ່ານມາ ແລະທິດທາງແຜນການ 6 ເດືອນທ້າຍປີ 2022- ປະຈຳປີ 2023.
    5. ຄົ້ນຄວ້າພິຈາລະນາ ແລະຮັບຮອງເອົາແຜນການສ້າງ ແລະປັບປຸງນິຕິກຳສຳຄັນໃຕ້ກົດໝາຍຂອງແຂວງແຕ່ປີ 2022 ຫາ 2025.
    6. ຄົ້ນຄວ້າພິຈາລະນາ ແລະ ຮັບຮອງເອົາບົດລາຍງານຂອງພະແນກສຶກສາ ແລະກິລາ ກ່ຽວກັບການຈັດຕັ້ງປະຕິບັດບັນດາຄາດໝາຍໃນຂະແໜງສຶກສາທິການ ແລະ ກິລາ, ການປັບປຸງຄຸນນະພາບການຮຽນ-ການສອນ ທຸກຊັ້ນທຸກສາຍໃນໄລຍະໃໝ່, ການແກ້ໄຂບັນຫາຄູເຫຼືອບໍ່ພໍ ແລະຄູອາສາສະໝັກ.
    7. ຄົ້ນຄວ້າພິຈາລະນາ ແລະຮັບຮອງເອົາບົດລາຍງານຂອງພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ກ່ຽວກັບການປະຕິບັດແຜນການທ່ອງທ່ຽວສີຂຽວ.
    8. ຄົ້ນຄວ້າພິຈາລະນາ ແລະຮັບຮອງເອົາບົດລາຍງານການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາ ກອງປະຊຸມສະໄໝສາມັນເທື່ອທີ 3 ແລະ ແຜນການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 3 ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ.
    ນອກນີ້, ກອງປະຊຸມຈະໄດ້ຮັບຟັງການລາຍງານການຈັດຕັ້ງປະຕິບັດວຽກງານຈາກພາກສ່ວນທີ່ກ່ຽວຂ້ອງ ຄື:
    1. ບົດລາຍງານຂອງອົງການໄອຍະການແຂວງ ກ່ຽວກັບການຕິດຕາມການນໍາໃຊ້ 7 ມາດຕະການສະກັດກັ້ນຂອງອົງການສືບສວນ-ສອບສວນ ຕາມທີ່ກໍານົດໄວ້ໃນກົດໝາຍວ່າດ້ວຍການດໍາເນີນຄະດີອາຍາໂດຍສະເພາະການລະເມີດກົດໝາຍໃນການພາຕົວ, ກັກຕົວ,ຈັບຕົວ ແລະການກັກຂັງພາງທີ່ບໍ່ຖືກຕ້ອງຕາມກົດໝາຍ;
    2. ບົດລາຍງານກ່ຽວກັບແຜນການຄຸ້ມຄອງເງິນຕາ ແລະຮ້ານແລກປ່ຽນເງິນຕາໃນໄລຍະ 6 ເດືອນຕົ້ນປີ 2022 ແລະທິດທາງແຜນການ 6 ເດືອນທ້າຍປີ 2022 ຢູ່ແຂວງຈຳປາສັກ;
    3. ບົດລາຍງານກ່ຽວກັບແຜນການຄຸ້ມຄອງລາຄາສິນຄ້າ ແລະຄຸ້ມຄອງທຸລະກິດນໍ້າມັນເຊື້ອໄຟໃນໄລຍະ 6 ເດືອນຕົ້ນປີ 2022 ແລະທິດທາງແຜນການ 6 ເດືອນທ້າຍປີ 2022 ຂອງແຂວງ.
    4. ບົດລາຍງານການເລືອກຕັ້ງແທນສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງປາກຊ່ອງ.
    ພ້ອມດຽວກັນ ທ່ານຮອງປະທານຄະນະປະຈໍາສະພາປະຊາຊົນແຂວງຈໍາປາສັກຍັງໄດ້ຮຽກຮ້ອງມາຍັງພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງ ແລະພີ່ນ້ອງຊາວແຂວງຈໍາປາສັກ ຈົ່ງຕິດຕາມການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາ ປະຊາຊົນແຂວງ ຊຸດທີ II ໃນຄັ້ງນີ້.

แชร์