ເຈົ້າແຂວງສາລະວັນ ຕ້ອນຮັບລັດຖະມົນຕີກະຊວງສຶກສາ ເນື່ອງໃນໂອກາດເຄື່ອນໄຫວວຽກ

ທ່ານ ໂພໄຊ ໄຊຍະສອນ ກຳມະການສູນກາງພັກເລຂາພັກເຈົ້າແຂວງໆສາລະວັນ ໄດ້ຕ້ອນຮັບການລົງມາເຄື່ອນໄຫວເຮັດວຽກຂອງທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກີລາ ພ້ອມດ້ວຍຄະນະ, ມີຮອງເຈົ້າແຂວງ ຜູ້ຊີ້ນໍາວຽກງານວັດທະນະທໍາ-ສັງຄົມ, ຫົວໜ້າພະແນກສຶກສາທິການແລະກິລາແຂວງ ແລະພາກສວນທີ່ກ່ຽວຂ້ອງເຂົ້າຮ່ວມ.

ເນື່ອງໃນໂອກາດລົງເຄື່ອນໄຫວວຽກ, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກີລາ ໄດ້ລາຍງານຈຸດປະສົງຂອງການມາເຄື່ອນໄຫວໃນຄັ້ງນີ້ກໍເພື່ອແລກປ່ຽນສະພາບບັນຫາການສຶກສາ, ວິທະຍາສາດ ແລະກິລາ, ທັງເຮັດວຽກກັບບັນດາຜູ້ບໍລິຫານການສຶກສາ, ພະນັກງານ, ຄູ-ອາຈານ ພາຍໃນແຂວງເພື່ອຕິດຕາມການກະກຽມໃຫ້ແກ່ການໄຂສົກຮຽນໃໝ່ ແລະຢ້ຽມຢາມສະຖາບັນການສຶກສາເພື່ອຊຸກຍູ້ວຽກງານການສຶກສາ,ວິທະຍາສາດ ແລະ ກິລາ. ນອກຈາກນັ້ນ, ກໍ່ໄດ້ມີການແລກປ່ຽນ ແລະລາຍງານສະພາບລວມຂອງວຽກງານການສຶກສາໃນທົ່ວປະເທດກໍ່ຄືຢູ່ແຂວງສາລະວັນວຽກງານທີ່ມີຄວາມພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກ, ແຜນດໍາເນີນງານໃນປະຈຸບັນ ແລະທິດທາງແຜນການໃນຕໍ່ໜ້າໂດຍສະເພາະການຈັດຕັ້ງປະຕິບັດ 12 ຄາດໝາຍທີ່ສະພາຮັບຮອງເຊິ່ງມາຮອດປະຈຸບັນສາມາດຈັດຕັ້ງປະຕິບັດບັນລຸແລ້ວ 7 ຄາດໝາຍຄື: ອັດຕາເຂົ້າຮຽນຂອງເດັກ 5 ປີ ໃນຊັ້ນການສຶກສາກ່ອນໄວຮຽນ, ອັດຕາເຂົ້າຮຽນໃໝ່ສຸດທິດ ປ1, ອັດຕາເຂົ້າຮຽນລວມໃໝ່ ປ5, ມ4, ດັດສະນີຄວາມສະເໝີພາບຍິງ-ຊາຍຂອງອັດຕາການເລື່ອນຊັ້ນ ປ5 ຂຶ້ນ ມ1,ປະຊາກອນໜຸ່ມ ແລະຜູ້ປະລະການຮຽນໃຫ້ໄດ້ບໍລຸງຜ່ານການສຶກສານອກໂຮງຮຽນ ແລະ ຝຶກອົບຮົມວິຊາຊີບ, ການສົ່ງເສີມມວນຊົນທຸກເພດທຸກໄວເຂົ້າຮ່ສມການຫັດກາຍບໍລິຫານ, ການອອກກໍາລັງກາຍແລະ ເຂົ້າຮ່ວມກິດຈະກໍາອື່ນໆ, ສ່ວນຄາດໝາຍທີ່ຍັງບໍ່ບັນລຸມີ 5 ຄາດໝາຍຄື: ອັດຕາປະລະການຮຽນຂອງນັກຮຽນຊັ້ນປະຖົມ ແລະ ມັດທະຍົມຕົ້ນ, ອັດຕາເລື່ອນຂັ້ນ ຫາ ຈົບຊັ້ນປະຖົມ, ອັດຕາເລື່ອນຊັ້ນ ປ5 ຂຶ້ນ ມ1 ທັງນີ້ກໍເພື່ອຄົ້ນຄວ້າຫາວິທີທາງແກ້ໄຂໃຫ້ບັນລຸຕາມຄາດໝາຍທີ່ວາງໄວ້.

ຈາກນັ້ນ ທ່ານລັດຖະມົນຕີກະຊວງສຶກສາທິການ ແລະກິລາກໍໄດ້ເຂົ້າພົບປະໂອ້ລົມຜູ້ບໍລິຫານການສຶກສາ,ພະນັກງານຄູ-ອາຈານ ອ້ອມຂ້າງແຂວງທີ່ວິທະຍາໄລຄູ ແລະ ຢ້ຽມຢາມໂຮງຮຽນວິຊາຊີບແບບປະສົມແຂວງສາລະວັນຕື່ມອີກ.
------
ພາບ-ຂ່າວ: ທິດລານີ ໂຄດໂຍທາ.

แชร์