ກອງປະຊຸມຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ ສັດປ່າຂັ້ນແຂວງອຸດົມໄຊ

ກອງປະຊຸມຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ ສັດປ່າຂັ້ນແຂວງອຸດົມໄຊ. ( P-WEN)ພີ-ເວັນ ໄດ້ໄຂຂື້ນໃນວັນທີ່ 12 ສິງຫາ 2022 ທີ່ຫ້ອງປະຊຸມ ພະແນກກພະສິກໍາ ແລະ ປ່າໄມ້ ແຂວງອຸດົມໄຊ ໂດຍການເປັນປະທານຮ່ວມຂອງ ທ່ານ ບຸນເກີດ ສະໜອງໄຊ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ແລະ ທ່ານ ສຸນັນທາ ຈຸນລະມະນີ ຮອງຫົວໜ້າກົມກວດກາປ່າໄມ້, ມີບັນດາທ່ານເຈົ້າເມືອງ 7 ເມືອງ, ມີຕາງໜ້າພະແນກການ, ຄະນະທີມງານພີເວັນ ແລະ ອົງການກອງທຶນອະນຸລັກຮັກສາທຳມະຊາດໂລກ ຫຼື WWF ເຂົ້າຮ່ວມ.

ກອງປະຊຸມຄັ້ງນີ້ໄດ້ຜ່ານແຜນປະຕິບັດງານຂອງຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ ແລະສັດປ່າຂັ້ນແຂວງ (P-WEN) ). ຜ່ານບົດບັນທຶກການ ມອບ-ຮັບ ວຽກງານການ ດໍາເນີນຄະດີອາຊະຍາກຳສັດນໍ້າ-ສັດປ່າ ແລະ ປ່າໄມ້ . ເຜີຍແຜ່ບາງນິຕິກໍາກ່ຽວກັບການຄຸ້ມຄອງປ່າໄມ້, ຜ່ານຮ່າງຄູ່ມືການຈັດຕັ້ງປະຕິບັດວຽກງານເຄືອຂ່າຍການບັງຄັບໃຊ້ກົດໝາຍວ່າດ້ວຍສັດນໍ້າ ສັດປ່າ ທີ່ໄດ້ກຳນົດ ເນື້ອໃນ ທີ່ຕັ້ງ, ພາລະບົດບາດ, ສິດ, ໜ້າທີ່, ຄວາມຮັບຜິດຊອບ ແລະ ຂັ້ນ ຕອນດຳເນີນງານກຳນົດໜ້າວຽກລະອຽດ ຂອງຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ ແລະ ສັດປ່າ ແລະ ກົດໝາຍວ່າດ້ວຍປ່າໄມ້ (P-WEN) ລວມທັງວິທີການ ແລະ ຫຼັກການ. ການປະສານງານ ກັບພາກ ສ່ວນກ່ຽວຂ້ອງ ເພື່ອເຮັດໃຫ້ຄະນະປະສານງານເຄືອຂ່າຍບັງຄັບໃຊ້ກົດໝາຍວ່າດ້ວຍສັດນໍ້າ ແລະ ສັດປ່າ ແລະກົດໝາຍວ່າດ້ວຍປ່າໄມ້ (P-WEN) ສາມາດເຮັດວຽກຮ່ວມກັນ ແນ່ໃສ່ຍົກສູງປະສິດທິພາບໃນການສະກັດກັ້ນ ແລະຕ້ານ ອາຊະຍາກໍາສັດນໍ້າ ແລະ ສັດປ່າ ແລະ ຊັບພະຍາກອນປ່າໄມ້ໃນແຂວງອຸດົມໄຊ. ນອກນີ້ຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະປະສານງານເຄືອຂ່າຍບັງຄັບໃຊ້ ກົດໝາຍ ວ່າດ້ວຍ ສັດນໍ້າ ແລະ ສັດປ່າຂັ້ນແຂວງ (P-WEN) ). ໂດຍມີ ຄະນະຜູ້ຊີ້ນໍາ 7 ທ່ານ, ຄະນະປະສານງານຂັ້ນແຂວງ 9 ທ່ານ, ກອງເລຂາ 9 ທ່ານ, ຄະນະປະສານງານຂັ້ນເມືອງ 7 ທ່ານ, ໂດຍໄດ້ແບ່ງໜ້າທີ່ໃຫ້ແຕ່ລະພາກສ່ວນຢ່າງລະອຽດ, ກອງປະຊຸມຍັງໄດ້ຮັບຟັງການມີຄຳເຫັນຂອງຄະນະປະທານ ໂດຍລວມ ແມ່ນໄດ້ຍົກໃຫ້ເຫັນຄວາມໝາຍຄວາມສຳຄັນຂອງວຽກງານຕ້ານ ແລະສະກັດກັ້ນ ການລັກລອບຄ້າຂາຍ ສັດນໍ້າ ສັກປ່າ ທີ່ຫວງຫ້າມ, ພ້ອມທັງຮຽກຮ້ອງໃຫ້ຄະນະປະສານງານທຸກຂັ້ນຈົ່ງເອົາໃຈໃສ່ເຂົ້າໃນວຽກງານທີ່ໄດ້ຮັບມອບໝາຍຈາກຂັ້ນເທິງຢ່າງຈິງຈັງ.

แชร์