ໂຮມຊຸມນຸມສະເຫລີມສະຫລອງວັນສ້າງຕັ້ງເເນວລາວສ້າງຊາດ ຄົບຮອບ 72 ປີ

ໃນວັນທີ 12 ສິງຫາ 2022 ສູນກາງເເນວລາວສ້າງຊາດຈັດພິທີໂຮມຊຸມນຸມສະເຫລີມສະຫຼອງວັນສ້າງຕັ້ງເເນວລາວສ້າງຊາດວັນທີ 13 ສີງຫາ ຄົບຮອບ 72 ປີ ຢູ່ຫ້ອງປະຊຸມໃຫຍ່ສູນກາງເເນວລາວສ້າງຊາດ ນະຄອນຫຼວງວຽງຈັນ ມີທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງເເນວລາວສ້າງຊາດໃຫ້ກຽດເຂົ້າຮ່ວມມີທ່ານ ບຸນຍັງ ວໍລະຈິດ ອະດີດເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວອະດີດປະທານປະເທດ, ມີການນໍາຂັ້ນສູງພັກ-ລັດ, ອະດີດການນໍາຂັ້ນສູນພັກ-ລັດ,ຄະນະບໍລິຫານງານສູນກາງເເນວລາວສ້າງຊາດ, ອະດີດຄະນະບໍລິຫານງານສູນກາງເເນວລາວສ້າງຊາດພ້ອມດ້ວຍພາກສ່ວນກ່ຽວຂ້ອງ.

ໂອກາດນີ້ ທ່ານ ບຸນຍັງ ວໍລະຈິດ ຄໍາເຫັນໃນພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງເເນວລາວສ້າງຊາດວັນທີ 13 ສີງຫາຄົບຮອບ 72 ປີ ໂດຍທ່ານໄດ້ຍົກໃຫ້ເຫັນກ່ຽວກັບປະຫວັດຄວາມເປັນມາຂອງການສ້າງຕັ້ງ, ສະພາບການເຕີບໃຫຍ່ຂະຫຍາຍຕົວ, ພາລະບົດບາດສິດຫນ້າທີ່ຂອງເເນວລາວສ້າງຊາດໃນເເຕ່ລະໄລຍະລວມຖຶງ ການເນັ້ນຫນັກບາງບັນຫາເພື່ອເປັນທິດທາງໃຫ້ສູນກາງເເນວລາວສ້າງຊາດໄດ້ສືບຕໍ່ຈັດຕັ້ງປະຕິບັດໃຫ້ມີຜົນສໍາເລັດໃນຕໍ່ຫນ້າຊຶ່ງອົງການເເນວລາວສ້າງຊາດມີ 3 ຊື່ເອີ້ນນັບເເຕ່ມື້ສ້າງຕັ້ງມາຮອດປັດຈຸບັນຄື: ເເນວລາວອິດສະຫລະ, ເເນວລາວຮັກຊາດ ເເລະມາຮອດກອງປະຊຸມໃຫຍ່ເເນວລາວຮັກຊາດສະໄຫມທີ 4 ໄດ້ປ່ຽນຊື່ຈາກເເນວລາວຮັກຊາດມາເປັນເເນວລາວສ້າງຊາດຈົນມາເຖີງປັດຈຸບັນນັບເເຕ່ປະເທດຊາດໄດ້ຮັບການປັດປ່ອຍເເນວລາວສ້າງຊາດສືບຕໍ່ມີບົດບາດສໍາຄັນໃນການເສີມຂະຫຍາຍມູນເຊື້ອຮັດຊາດຄວາມສາມັກຄີປອງດອງ ເເລະເອກກະພາບຂອງປະຊາຊົນບັນດາເຜົ່າ, ສືບຕໍ່ປຸກລະດົມ, ສຶກສາອົບຮົມ, ເຕົ້າໂຮມທຸກຊັ້ນຄົນ,ຊົນເຜົ່າ, ສາສະຫນາເຂົ້າຮ່ວມໃນພາລະກິດປົກປັກຮັກສາເເລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງທ່ານ ບຸນຍັງ ວໍລິຈິດ ມີຄໍາເຫັນຕື່ມວ່າ: ໃນຕະຫຼອດ 46ປີ ແຫ່ງການປົກປັກຮັກສາ ແລະສ້າງສາລະບອບໃໝ່, ອົງການແນວລາວສ້າງຊາດຍັງໄດ້ສືບຕໍ່ເຕີບໃຫຍ່ ເຂັ້ມແຂງທາງດ້ານປະລິມານ ແລະຄຸນນະພາບນັບແຕ່ສູນກາງຮອດທ້ອງຖິ່ນ, ເປັນເຈົ້າການປະຕິບັດພາລະບົດບາດ ອັນໜັກໜ່ວງ ແລະມີກຽດໃນການນໍາເອົາແນວທາງ,ນະໂຍບາຍຂອງພັກ ແລະລັດໄປໂຄສະນາສຶກສາອົບຮົມ, ເຕົ້າໂຮມຄວາມສາມັກຄີເປັນປຶກແຜ່ນຂອງປະຊາຊົນຢູ່ແຕ່ລະຮາກຖານ, ແຕ່ລະທ້ອງຖິ່ນ ແນໃສ່ສ້າງຄວາມສາມັກຄີທົ່ວປວງຊົນ, ປຸກລະດົມທຸກຊັ້ນຄົນ, ຊົນເຜົ່າ, ສາສະໜາ ເຂົ້າຮ່ວມຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຕ່ລະໄລຍະ, ເຂົ້າຮ່ວມວຽກງານກໍ່ສ້າງຮາກຖານການເມືອງແລະພັດທະນາຊົນນະບົດ, ແກ້ໄຂຄວາມທຸກຍາກ, ປະກອບສ່ວນສ້າງ ແລະ ປັບປຸງລະບົບການເມືອງ,ເຂົ້າຮ່ວມໄກເກ່ຍ-ແກ້ໄຂບັນຫາສັງຄົມຕ່າງໆຢ່າງຕັ້ງໜ້າ. ສະເພາະໃນໄລຍະທີ່ຜ່ານມາ, ອົງການແນວລາວສ້າງຊາດ ແຕ່ລະຂັ້ນ ໄດ້ຈັດຕັ້ງຜັນຂະຫຍາຍຫຼາຍໜ້າວຽກ, ຫຼາຍໂຄງການ ທີ່ນຳປະໂຫຍດຕົວຈິງມາສູ່ປະຊາຊົນ ແລະສັງຄົມຊຶ່ງຜົນງານອັນລະອຽດນັ້ນກໍ່ໄດ້ຍົກໃຫ້ເຫັນຈະແຈ້ງໃນຕະຫຼອດໄລຍະແຫ່ງການເຕີບໃຫຍ່ຂະຫຍາຍຕົວ ແລະມູນເຊື້ອຂອງແນວລາວສ້າງຊາດໃນແຕ່ລະໄລຍະ.

ສັງລວມແລ້ວ, ໃນທຸກຜົນສຳເລັດ ແລະທຸກບາດກ້າວເດີນຂອງ ສປປ ລາວ ຕະຫຼອດ 46 ກວ່າປີ ແຫ່ງພາລະກິດປົກປັກຮັກສາ ແລະສ້າງສາລະບອບໃໝ່ເວົ້າລວມໃນໄລຍະທີ່ຜ່ານມາເວົ້າສະເພາະລ້ວນແຕ່ມີການປະກອບສ່ວນອັນໃຫຍ່ຫຼວງ ແລະສົມກຽດຂອງອົງການແນວລາວສ້າງຊາດແຕ່ລະຂັ້ນ.

ພ້ອມກັນນັ້ນ, ພີ່ນ້ອງຮ່ວມຊາດທຸກຊົນເຜົ່າ, ຊັ້ນຄົນ, ສາສະໜາ, ເພດ-ໄວ ທັງຢູ່ພາຍໃນ ແລະຢູ່ຕ່າງປະເທດທີ່ໄດ້ເຊີດຊູນໍ້າໃຈຮັກຊາດ, ສາມັກຄີເປັນຈິດໜຶ່ງໃຈດຽວ ບຸກບືນຜ່ານຜ່າຄວາມຫຍຸ້ງຍາກນາໆປະການລວມທັງການຕ້ານການລະບາດຂອງພະຍາດໂຄວິດ-19 ເພື່ອເຮັດສໍາເລັດໜ້າທີ່ການເມືອງອັນສູງສົ່ງຂອງຕົນ, ປະກອບສ່ວນຢ່າງສຳຄັນ ແລະສົມກຽດເຂົ້າໃນການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານ ແລະມີຫຼັກການຂອງພັກໃຫ້ມີຜົນສຳເລັດຢ່າງຈົບງາມ, ເຮັດໃຫ້ບົດບາດ, ກຽດ-ຊື່ສຽງ ຂອງປະເທດຊາດໄດ້ຮັບການຍົກສູງຂຶ້ນໃນເວທີພາກພື້ນ ແລະສາກົນຢ່າງບໍ່ຢຸດຢັ້ງ.

ໃນຕອນທ້າຍຂອງພິທີ ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງເເນວລາວສ້າງຊາດໄດ້ຕາງຫນ້າຄະນະພັກ-ຄະນະນໍາສູນກາງເເນວລາວສ້າງຊາດກ່າວຮັບຄຳໂອວາດຂອງອະດີດເລຂາທິການໃຫຍ່ອະດີດປະທານປະເທດທີ່ທີ່ມີຄໍາເຫັນໂອ້ລົມ ເເລະໃຫ້ທິດເຍືອງທາງຕໍ່ການຈັດຕັ້ງປະຕິບັດວຽກງານຂອງເເນວລາວສ້າງຊາດພ້ອມດຽວກັນນີ້ທ່ານໄດ້ສືບຕໍ່ລາຍງານກ່ຽວກັບທິດທາງ ແລະວິທີການປຸກລະດົມຂົນຂວາຍປະຊາຊົນຜ່ານຜ່າຄວາມຫຍຸ້ງຍາກເສດຖະກິດ-ການເງິນຂອງປະເທດໃນປັດຈຸບັນ,ຄຽງຄູ່ກັບການຈັດພິທີໂຮມຊຸມນຸມສະເຫລີມສະຫລອງວັນສ້າງຕັ້ງເເນວລາວສ້າງຊາດວັນທີ13ສີງຫາຄົບຮອບ 72 ປີ ຢູ່ຫ້ອງປະຊຸມໃຫຍ່ສູນກາງເເນວລາວສ້າງຊາດເເລ້ວ, ສູນກາງເເນວລາວສ້າງຊາດຍັງຈັດງານວາງສະເເດງສີນຄ້າ ເເລະ ອາຫານເພື່ອສະເຫລີມສະຫລອງປີສາມັກຄີມິດຕະພາບລະຫວ່າງລາວ-ຫວຽດນາມ ເເລະວັນສ້າງຕັ້ງສູນກາງເເນວລາວສ້າງຊາດວັນທີ 13ສີງ ຫາຄົບຮອບ72ປີ ໃຫ້ມີບັນຍາກາດຟົດຟື້ນມ່ວນຊື່ນຕື່ມອີກ.

แชร์