ຖວທ ກະກຽມດ້ານເນື້ອໃນການເປັນປະທານອາຊຽນຂອງ ສປປ ລາວ ໃນປີ 2024

ວັນທີ 11 ສິງຫາ 2022, ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ (ຖວທ) ໄດ້ຈັດກອງປະຊຸມ ປຶກສາຫາລືເພື່ອກະກຽມຄວາມພ້ອມດ້ານເນື້ອໃນຕ່າງໆ ໃນການເປັນປະທານອາຊຽນ ຂອງ ສປປ ລາວ ໃນປີ 2024. ພາຍໃຕ້ການເປັນປະທານຂອງທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ພ້ອມດ້ວຍຜູ້ຕ່າງບັນດາກົມກອງອ້ອມຂ້າງກະຊວງເຂົ້າຮ່ວມ.

ທ່ານ ນາງ ສວນສະຫວັນ ວິຍະເກດ ກ່າວວ່າ: ກອງປະຊຸມຄັ້ງນີ້ເພື່ອປຶກສາຫາລືກ່ຽວກັບບັນດາເນື້ອໃນຕ່າງໆເພື່ອກະກຽມຄວາມພ້ອມໃຫ້ແກ່ການເປັນປະທານອາ ຊຽນຂອງສປປ ລາວ ໃນປີ 2024 ໂດຍສະເພາະແມ່ນໃນຂົງເຂດວຽກງານເສົ້າຄໍ້າວັດທະນະທຳເຊິ່ງຜ່ານມາ ສປປ ລາວ ໄດ້ຮັບກຽດເປັນປະທານກອງປະຊຸມອາຊຽນມາແລ້ວ 2 ຄັ້ງ ເຊິ່ງໄດ້ຮັບຜົນສໍາເລັດອັນໃຫຍ່ຫລວງ. ເຖິງຢ່າງໃດກໍຕາມການເປັນປະທານອາຊຽນຂອງ ສປປ ລາວ ໃນປີ 2024 ນີ້ ຍັງມີສິ່ງທ້າທ້າຍຫລາຍຢ່າງເປັນຕົ້ນສະພາບພາກພື້ນ ແລະສາກົນມີສະພາບສົບສົນ, ສະເພາະ ສປປ ລາວ ສະພາບເສດຖະກິດຍັງມີຄວາມຫຍຸ້ງຍາກ ແລະອື່ນໆ ຈຶ່ງຮຽກຮ້ອງໃຫ້ຜູ້ເຂົ້າຮ່ວມຈົ່ງພ້ອມກັນເອົາໃຈໃສ່ຕິດຕາມ ແລະຄົ້ນຄ້ວາປະກອບຄຳຄິດຄຳເຫັນໃສ່ບັນດາເນື້ອໃນຕ່າງໆ ເພື່ອຮັບປະກັນໃຫ້ມີຄວາມຖືກຕ້ອງ ແລະສົມບູນທີ່ສຸດ.

ທ່ານ ນາງ ແພງຈັນ ແພງເມືອງ ຫົວໜ້າກົມແຜນການ ແລະການຮ່ວມມືສາກົນກະຊວງ ຖວທ ໄດ້ລາຍງານຂໍ້ຕົກລົງວ່າດ້ວຍການແຕ່ງຕັ້ງໜ່ວຍງານຊ່ວຍວຽກຂອງອະນຸກຳມະການ ໂຄສະ ນາເຜີຍແຜ່ວັດທະນະທຳ ແລະຂ່າວສານເພື່ອກະກຽມຄວາມພ້ອມທຸກດ້ານໃນການເປັນປະທານອາຊຽນ ຂອງ ສປປ ລາວ ໃນປີ 2024 ເພື່ອເປັນເຈົ້າການປະສານສົມທົບກັບຂະແໜງການທີ່ກ່ຽວຂ້ອງ ແລະ ສົມທົບຢ່າງໃກ້ຊິດກັບອະນຸກຳມະການກອງເລຂາກ່ຽວກັບທຸກເອກະສານທີ່ຈະນໍາສະເໜີໃນວາ ລະກອງປະຊຸມ. ພ້ອມນັ້ນ, ກະຊວງ ຖວທ ຍັງຈະເປັນຈຸດປະສານງານ ລະຫວ່າງກະຊວງກັບພາຍນອກ ແລະພາຍໃນໃນການກະກຽມ ແລະດໍາເນີນການເປັນປະທານອາຊຽນຂອງ ສປປ ລາວ ໃນປີ 2024, ກະກຽມວາລະ ແລະແຜນເຄື່ອນໄຫວລະອຽດຂອງບັນດາ ກອງປະຊຸມຕ່າງໆທີ່ກ່ຽວ ຂ້ອງ, ກະກຽມບົດປາໄສ ແລະ ບົດປະກອບຄຳເຫັນສຳລັບທ່ານປະທານປະເທດ, ນາຍົກລັດຖະມົນຕີ ແລະລັດຖະມົນຕີ (ຕາມວາລະກອງປະຊຸມ), ກະກຽມບົດອອກຂ່າວ, ບົດສະຫລຸບສັງລວມ ແລະບົດໃຫ້ສຳ ພາດຂ່າວ ກ່ຽວກັບການກະກຽມ ແລະ ຜົນສຳເລັດຂອງກອງປະຊຸມຕ່າງໆ, ທັງສະໜອງເນື້ອໃນ ແລະລາຍລະອຽດຕ່າງໆ ໃຫ້ແກ່ເວັບໄຊສ໌(Website) ປະທານອາຊຽນ. ນອກຈາກນີ້, ຍັງຕ້ອງປະສານສົມ ທົບກັບໜ່ວຍງານປະສານງານ ແລະກອງເລຂາ ໃນການກໍານົດ, ຕິດຕາມວຽກງານການສະແດງເພື່ອກະກຽມ ແລະ ດໍາເນີນການເປັນປະທານອາຊຽນຂອງ ສປປ ລາວ ໃນປີ 2024, ສ້າງວີດີໂອສັ້ນກ່ຽວກັບ 10 ປະເທດອາຊຽນ, ພິເສດໃຫ້ສຳເລັດວີດີໂອສັ້ນກ່ຽວກັບ ສປປ ລາວ ໃນການເປັນປະທານອາຊຽນ ເພື່ອນຳໄປເຜີຍແຜ່ໃນເວລາ ສປປ ລາວ ຮັບເປັນປະທານອາຊຽນຈາກອິນໂດເນເຊຍໃນທ້າຍປີ 2023, ອອກແບບການສະແດງໃນພິທີ ເປີດ-ປິດ ກອງປະຊຸມສຸດຍອດອາຊຽນ ແລະກອງປະຊຸມກ່ຽວຂ້ອງຕ່າງໆ.

ກອງປະຊຸມໃນຄັ້ງນີ້, ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ຂໍ້ຕົກລົງຂອງທ່ານນາຍົກລັດຖະມົນຕີວ່າດ້ວຍການແຕ່ງຕັ້ງຄະນະກຳມະການຊີ້ນຳລະດັບຊາດເພື່ອກະກຽມຄວາມພ້ອມ ແລະດຳເນີນການເປັນປະທານອາຊຽນຂອງ ສປປ ລາວ ໃນປີ 2024; ຂໍ້ຕົກລົງຂອງທ່ານຮອງນາຍົກລັດຖະມົນຕີວ່າດ້ວຍການແຕ່ງຕັ້ງບັນດາອະນຸກຳມະການຮັບຜິດຊອບວຽກງານສະເພາະ ແລະ ຂໍ້ຕົກລົງວ່າດ້ວຍການແຕ່ງຕັ້ງໜ່ວຍງານຊ່ວຍວຽກຂອງອະນຸກຳມະການໂຄສະນາເຜີຍແຜ່ວັດທະນະທຳ ແລະ ຂ່າວສານ, ລາຍງານຜົນຂອງກອງປະຊຸມປຶກສາຫາລືເພື່ອກະກຽມຄວາມພ້ອມ ແລະດຳເນີນການເປັນປະທານອາຊຽນຂອງ ສປປ ລາວ ໃນປີ 2024 ແລະ ອື່ນໆໃຫ້ມີຜົນສຳເລັດ.

แชร์