ກາເຟດາວ ກຽມເຂົ້ຕະຫຼາດຮຸ້ນໃຫ້ໄດ້ໃນປີ 2028

          ໃນສົກປີ 2023 ທີ່ຈະມາເຖີງນີ້ໂຮງງານກາເຟດາວຈະໄດ້ເດີ່ນໜ້າຢ່າງເຕັມທີ່ ເຂົ້າໃສ່ໃນການຜະລິດ ການຈໍາໜ່າຍ ແລະ ສ້າງຜະລິດຕະພັນໃໝ່ໆທີ່ສັງຄົມຕ້ອງການ ເພື່ອຂັບເຄື້ອນໃຫ້ທຸລະກິດມີການຂະຫຍາຍຕົວສູງຂື້ນ ຫວັງຈະສາມາດຖົມຂຸມໜີ້ສິນທີ່ຄຸມເຄືອງໃຫ້ໄດ້ຢ່າງຂາດຕົວ ພ້ອມວາງເປົ້າຈະນໍາທຸລະກິດເຂົ້າຂາຍໃນຕະຫລາດຮຸ້ນໃຫ້ໄດ້ໃນປີ 2028.

          ໂຮງງານຜະລິດກາເຟດາວ ແມ່ນໄດ້ຖືກສ້າງຕັ້ງຂື້ນໃນປີ 1998, ຊຶ່ງນອນໃນກຸ່ມບໍລິສັດ ດາວເຮືອງ ຈໍາກັດ ແລະ ເປັນຜູ້ສະໜັບສະໜູນສົ່ງເສີມການປູກກາເຟ ໃຫ້ປະຊາຊົນໃນເຂດພູພຽງບໍລະເວນ ເພື່ອຜະລິດເປັນສິນຄ້າສະໜອງພາຍໃນ ແລະ ຕ່າງປະເທດ, ມີກາໝາຍການຄ້າ ( ກາເຟດາວ )  ແລະ ເປັນຍີ່ຫໍ້ທີ່ສ້າງຊື່ສຽງເປັນຜະລິດຕະພັນຂອງ ສປປ ລາວ ທີ່ຖືກຍອມຮັບຂອງສັງຄົມທັງພາຍໃນ ແລະ ຕ່າງປະເທດ, ຕົກມາຮອດປີ 2016 ບໍລິສັດໄດ້ພົບຄວາມຫຍຸ້ງຍາກທາງດ້ານການເງິນ ຍ້ອນການບໍລິຫານທຸລະກິດຍັງບໍ່ທັນເປັນລະບົບ ແລະ ເປັນມືອາຊີບພຽງພໍ, ສະນັ້ນຈີ່ງນໍາໄປສູ່ການຂາດສະພາບຄ່ອງທາງດ້ານການເງິນ, ໂດຍສະເພາະແມ່ນທຶນໝູນວຽນທີ່ຈະມາສຶບຕໍ່ທໍາການຜະລິດ ແລະ ເກີດໜີ້ສິນຈໍານວນຫລາຍ ແລະ ຂາດທຶນສະສົມ, ດັ່ງນັ້ນໃນປີ 2018 ກຸ່ມບໍລິສັດ ດາວເຮືອງ ຈໍາກັດ ຈີ່ງໄດ້ສະເໜີຕໍ່ລັດຖະບານຊ່ວຍແກ້ໄຂສະພາບຄວາມຫຍຸ້ງຍາກດັ່ງກ່າວ ເພື່ອຊ່ວຍອຸ້ມຊູເອົາທຸລະກິດກາເຟໄວ້, ຊຶ່ງເປັນຜະລິດຕະພັນທີ່ເປັນລັກສະນະຍຸດທະສາດ ແລະ ເປັນທີ່ຍອມຮັບທັງພາຍໃນ ແລະ ຕ່າງປະເທດ.

          ທ່ານ ວັນນະດາ ພົມມະສະຖິດ ຜູ້ອໍານວຍການໃຫຍ່ໂຮງງານກາເຟລາວໃຫ້ຮູ້ວ່າ: ການເຂົ້າຮ່ວມທຶນຂອງລັດຖະບານໃນກຸ້ມບໍລິສັດດາວເຮືອງ ແມ່ນການປະຕິບັດຕາມແນວທາງຂອງພັກ ແລະ ລັດຖາບານ ໃນການຫັນໜີ້ເປັນທຶນ, ໂດຍໄດ້ມີການບັນລຸບົດບັນທຶກຄວາມເຂົ້າໃຈລະຫວ່າງ ກະຊວງການເງິນ ແລະ ກຸ່ມບໍລິສັດ ດາວເຮືອງ ຈໍາກັດ, ໃນການສຶກສາຄວາມເປັນໄປໄດ້ໃນການເຂົ້າຮ່ວມທຶນ, ໂດຍໄດ້ມີການແຕ່ຕັ້ງຄະນະວິຊາການຕ່າງໜ້າຈາກກະຊວງການເງິນ ແລະ ວ່າຈ້າງບໍລິສັດທີ່ປຶກສາທີ່ເປັນມືອາຊີບ ແລະ ເປັນທີ່ຍອມຮັບຂອງສາກົນ ແລະ ພາກພື້ນ, ມາເປັນທີ່ປຶກສາທາງດ້ານກົດໝາຍ ເພື່ອກວດກາຄວາມສອດຄ່ອງທາງດ້ານກົດໝາຍ, ການເງິນ ພ້ອມປະເມີນມູນຄ່າຊັບສິນ, ໜີ້ສີນທີ່ຕິດພັນກັບທຸລະກິດກາເຟ, ເພື່ອຮັບປະກັນຄວາມໂປ່ງໃສ ແລະ ຜົນປະໂຫຍດສູງສຸດຂອງລັດ, ຊຶ່ງທັງສອງຝ່າຍໄດ້ບັນລຸການຕົກລົງ ແລະ ໄດ້ສໍາເລັດການສັນຍາຮ່ວມທຶນ ລະຫວ່າງ ກະຊວງການເງິນ( ໃນນາມຜູ້ຖືຮຸ້ນຕ່າງໜ້າລັດຖະບານ ) ແລະ ກຸ່ມບໍລິສັດ ດາວເຮືອງ ຈໍາກັດ ໃນທ້າຍເດືອນຕຸລາ 2020, ໂດຍລັດຖະບານຖຸຮຸ້ນ 56%( 30.980.000 ຮຸ້ນ ) ແລະ ກຸ່ມບໍລິສັດ ດາວເຮືອງ ຈໍາກັດ ຖືຮຸ້ນ 44%( 24.630.000 ຮຸ້ນ ) ໃນຈໍານວນຮຸ້ນທັງໝົດ 55.610.000 ຮຸ້ນ, ໂດຍມີທຶນຈົດທະບຽນທັງໝົດ 278.050.000 ໂດລາສະຫະລັດ.

ທ່ານຜູ້ອໍານວຍການໃຫ້ຮູ້ຕື່ມວ່າ: ສໍາລັບການຜະລິດ ແລະ ການຈໍາໜ່າຍຜະລິດຕະພັນກາເຟດາວໃນ 6 ເດືອນຕົ້ນປີ 2022 ຜ່ານມາ ເຫັນວ່າຂະບວນການຜະລິດຈາກເມັດກາເຟມາເປັນກາເຟສໍາເລັດຮູບ ແມ່ນມີທ່າອ່ຽງເພີ່ມຂື້ນເລີ້ອຍໆ ນັບແຕ່ຕົ້ນເດືອນມັງກອນເປັນຕົ້ນມາ, ຊຶ່ງໄດ້ມີການດໍາເນີນການຜະລິດ, ການຄຸ້ມຄອງ ແລະ ການບໍລິຫານຈັດການ ເຫັນວ່າມີການເຕີບໂຕທາງດ້ານການຕະຫລາດ, ຊຶ່ງສະເລ່ຍແລ້ວສາມາດສ້າງລາຍຮັບໄດ້ປະມານ 20 ຕື້ກີບຕໍ່ເດືອນ, ພິເສດສະເພາະໃນເດືອນ ກໍລະກົດ 2022 ຜ່ານມາ ພວກເຮົາສາມາດສ້າງລາຍຮັບໄດ້ 30 ກວ່າຕື້ກີບ, ສະນັ້ນຈີ່ງເຮັດໃຫ້ໂຮງງານການມີລາຍຮັບ ຈາກການຈໍາໜ່າຍກາເຟດາວໃນເຄີ່ງປີຜ່ານມາ ໄດ້ທັງໝົດ 140 ຕື້ກີບ, ທຽບໃສ່ແຜນແມ່ນຫລຸດ 10%, ສາເຫດກໍ່ເນື່ອງຈາກວ່າຍັງຢູ່ໃນຊ້ວງການປັບປຸງລະບົບການບໍລິຫານ ແລະ ເຈລະຈາກັບທະນາຄານເຈົ້າໜີ້ ເພື່ອຂໍເງິນທຶນສະໜັບສະໜູນທຶນໝູນວຽນຕື່ມອີກ ເພື່ອນໍາເຂົ້າມາດຶງກໍາລັງການຜະລິດຂອງໂຮງງານໃຫ້ສູງຂື້ນຫລາຍກວ່າເເກົ່າ ແລະ ສໍາລັບໃນ 6 ເດືອນທ້າຍປີ 2022 ພວກເຮົາແມ່ນຈະເດີນໜ້າຢ່າງເຕັມກໍາລັງ ເນື່ອງຈາກວ່າພວກເຮົາໄດ້ຮັບການສະໜັບສະໜູນຈາກກະຊວງການເງິນ ມາຊ່ວຍທາງດ້ານວິຊາການ ບໍລິຫານທາງດ້ານການເງິນ, ຊຶ່ງເປັນທິມງານທີ່ມີຄວາມແຂງແກ່ນຂື້ນກວ່າເກົ່າ ເຮັດໃຫ້ພວກເຮົາຈະສາມາດໄດ້ຮັບການສະນັບສະໜູນທຶນໝູນວຽນ ຈາກທະນາຄານການຄ້າຕື່ມອີກ ແລະ ຄາດວ່າພວກເຮົາຈະສາມາດດໍາເນີນການຜະລິດໄດ້ເພີ່ມຂື້ນເຖີງ 30% ຈາກປົກຄະຕິມີກໍາລັງການຜະລິດຢູ່ປະມານ 35% ແລະ ຈະສູ້ຊົນດຶງການຜະລິດໃຫ້ສູງຂຶື້ນເຖີງ 65%, ຄາດວ່າໝົດປີ 2022 ໂຮງງານດາວກະເຟດາວຈະມີລາຍຮັບຈາກການຈໍາໜ່າຍກາເຟປະມານ 350 ຕື້ກີບ.

ທ່ານ ວັນນະດາ ພົມມະສະຖິດ ຢໍ້າວ່າ: ປະຈຸບັນທາງໂຮງງານຍັງມີຄວາມຕ້ອງການທຶນໝູນວຽນຢູ່ປະມານ  30 ຕື້ກີບ ແລະ ໃນຕົ້ນປີ 2023 ພວກເຮົາຕ້ອງການແຫລ່ງທຶນຕື່ມອີກ 150 ຕື້ກີບ, ເພື່ອນໍາໃຊ້ເຂົ້າໃນການເກັບຊື້ໝາກແດງມາເປັນກາເຟຂຽນ ແລະ ປ້ອນເຂົ້າສູ່ຂະບວນການຜະລິດໃນລະດູປີໜ້າ ກໍ່ຄືຕົ້ນປີ 2023 ແມ່ນຈະມີກໍາລັງການຜະລິດຫລາຍຂື້ນ ແລະ ຈະມີຫລາຍຮັບຫລາຍຂື້ນ, ຮອດເວລານັ້ນສາມາດເວົ້າໄດ້ວ່າພວກເຮົາເດີນນ້າສູ່ຂະບວນການຜະລິດຢ່າງເຕັມທີ່ ຈະພະຍາຍາມເລັ່ງການສົ່ງອອກເພື່ອນໍ້າເຂົ້າເງິນຕາໃຫ້ສູງຂື້ນ, ຊື່ງຕາມແຜນທີ່ທີ່ລັດຖະບານກໍານົດໄວ້ ຈະຕ້ອງນໍ້າຜະລິດຕະພັນ ກາເຟດາວ ເຂົ້າສູ່ຕະຫລາດຮຸ້ນພາຍໃນ 5ປີ, ສະນັ້ນພວກເຮົາຕິດວ່າ ນັບແຕ່ຕົ້ນປີ 2023 ເປັນຕົ້ນໄປ, ພວກເຮົາຈະຕ້ອງໄດ້ເລັ່ງຂັບເຄືອນກໍາລັບການຜະລິດ, ການຈໍາໜ່າຍ ເພື່ອເຮັດແນວໃດຈະສາມາດສ້າງຜົນກໍາໄລ ແລະ ສາມາດນໍາບໍລິສັດ ເຂົ້າສູ່ຕະຫລາດຮຸ້ນໃຫ້ໄດ້ໃນປີ 2028 ແລະ ພວກເຮົາຄິດວ່າຈະສາມາດເຮັດບັນລຸຄາດໝາຍໄດ້ຢ່າງແນ້ນອນ.

 

แชร์